MIRILUNGGU 39 - DEENA BAIBÉL (BSI)

Adírna Ami lokke Ponkan Sunamko

¹ Ngo poto, “Ngokke yédu-yébyang tabunglo ansula yéyé, atímana ami kídí dagguyém, ngokke paab nappasim pomem sumomayé.”

² Ngo agomkote pomape, aina atímana kote pomape asoope ito! Depe ilate, ngokke adírde bojéyayang ikai,

³ delokke kape imíloi emla míngkolo aapíe gusaato. Edítko ngo míítítodí, pakyangko ngo míídírto; delo ngo sikepe poto,

⁴ “Ruutum, edítko ngokke turpename duune? Edílo ngo siyén? Edítko ngokke longe nyokdun, ngom pobitola.”

⁵ Edítko no ngokke yépenamem ande motune! Nokke keralo ngokke turpenamde atí kamana kísa. Aropakde turkína ami takam si asar mutrum atele,

⁶ tani si ugyum kísape nyokdungku. Bíkke inam takamde are kamang; bí paadung remdung, idola séko dem bomyékudí bí kénmang.

⁷ Ruutume, demílo ingkokoda nokkelok ngo míínam supene? ngokke míínam suname nokkíng dung.

⁸ Ngokke paab takamlokke ngom mopít toika. Mitu soreng amiem ngok teyolo ngilkang momayika!

⁹ Ngo asoope duuyé, ngo gompil kote pomayé, kapeila nomin ngom sikepe adír monade.

¹⁰ Ngom demyi mapeka! Nokke kítkolok ngo sita pakdung.

¹¹ Tani paabem no lungééla, ingéédung, delokke bíkke ayang namemte, no takítpe dopak modung. Aropakpe tani si asar mutrum atel kísana komin!

¹² E Ruutum, ngokke kumnamem tatbika, delokke ngokke kapnamem tatbitoika; ngokke kapduem asoope no tatmayika! Ngokke buku neku takam kísa ngo nokkelo mibo enpatna kísadung.

¹³ Ashéng anyongko paadope, ngokke gínyok-nyokyik berok mangadape ngom petom duusumoika.