MIRILUNGGU 35 - DEENA BAIBÉL (BSI)

Iguldope Kumnamko

¹ E Ruutum, ngom ikísunem nokom ikísulangka, ngom mimak inem nokom mimak ibilangka.

² Nokke mimak ekurangem bomla ngom mopítdope aalangka.

³ Nokke gíníng yoksem orbomla, ngom monmínna kídíem monyabika. “Ngom no mopítne,” emla kénsu motoyika.

⁴ Ngom petpe emla raltína kídíem ikumla bulum annying sumolangka. Ngom míírí-míínyo bomna kídíem monpan-monran subika!

⁵ Ruutumke teyong kotokie monyém, bulum asarlo ampe kísape gyapakdope itoika.

⁶ Ruutumke teyong kotokie bulum monbomyém, buluke bedange kaamue ila belab daklangka!

⁷ Atí legang kamape bulu ngom agotlo tobomdung, delokke ngom umpe emla arungko koorutung.

⁸ Buluke kénsu maduem gíímang-gérmange bulukíng pííyé; bulu agíke etku egumlo olíksula nyokyinyé.

⁹ Delo Ruutumke legalok ngo mííyumsuyé; bíkke mosing kukolok ngo ashéngyé.

¹⁰ Ngokke aapí ainang tabunglok Ruutum bím sikepe luyé, “Delo sékote nok kísana kamang. No ralmanem ralnalokke mosiidung, opanem iréénalokke motumdung.”

¹¹ Míngkina amikídíe ngom akla ludung, delokke lugíímape ajéng luket líkdung.

¹² Bulu ainem atímalok iyansudung, ngo míngasula dung.

¹³ Idakkom buluke kiduem, ngo ankí-keno egem geto; ngo doyi-tííyimape yéla; dumponge ngemgípdola,

¹⁴ ngo ngokke angong, demangkom bírokon legape adíryém inam kísape; delokke akone agíke ane legape ankíyém inam kísape beggípdola kumto.

¹⁵ Idola edílo ngo ankí-kenola duutodí, delo bulu takam ashéngto, delokke ngom gargoola lukaato; mibue ngom demto, delokke demto dandan itíto.

¹⁶ Bulu ibaarumape bojéyape ngom lungilto, ngom kangkie séngééto.

¹⁷ Ruutum edítko dekepe ngom kaatíla duuyéne? Buluke díngko-moko lokke ngom mosiitoika. Sok myomur kídísokke ngom mosii toika.

¹⁸ Delo ngo nokke ami kídíke kebang gooralo nom koyityé; ngo bulu takamke keralo nom rínggeyé.

¹⁹ Ngokke teyolo ngokke miru kídíem ngilkanggíng kamape ngilkang momayika, delokke ngom nena kídíemkom ngok teyolo igíng kamape mikkír nyokírla imomayika.

²⁰ Bulu daapong agomem pomape igeyéla, atí atí menam agom mílílo dengomna ami kídíem pogedung.

²¹ Bulu goktoola sikepe ngom ludung, “Nokke inam pagem ngolu kaato!”

²² Idakkom E Ruutum, no sim kaasuto. Dekepe ila Ruutume, asoope kaamayika; no ngokkelok mootepe yémayika!

²³ E Ruutum, no agíe darepla ngom igultoika; ngokke Shédíe, ngokke legangem aabo sutoika.

²⁴ E Ruutum, no arolok yéne, depe iname ngokke deenamem pokan botoika, ngokke teyolo miruem ashéng momayika.

²⁵ Bulum agí aapílo sikepe pomo mapeka, “Ngoluke aapí míínamem ipííto!” Bulum sikepete pomo mayika, “Ngolu bím ménnyokto.”

²⁶ Ngokke adír teyolo ngilkana kídíem ikum berokla byakpan sumotoka. Ngom aiyape míísuna kídíem annyingla mínggíp sumotoyika.

²⁷ Ngokke yéjiinamem kaalína kídíem ernampe ashéngmola sikepe potí motoyika, “Ruutum bí botterunako! Bí agí bééranglok ardanamem mííyum sudung.”

²⁸ Delokrongem ngo nokke aronamem pogeyé, delokke loodíke ngo nom rínggeyé.