MIRILUNGGU 34 - DEENA BAIBÉL (BSI)

Shédíke Ainamem Koyitdakla

¹ Ngo Ruutum bím rego takamlo koyityé, ngo meyimape bím rínggeyé.

² Ngokke aapíe Ruutumkíng mííte sudung; adír asongna kídíe tatla ashélangka.

³ Ruutumke bottena amínem pokanbosui; bíkke amínem ríngge bosulaju!

⁴ Ngo Ruutum bím kumto, delo bí ngom tatbito, delokke ngokke pesonam takamlokke ngom mopítto.

⁵ Iréénam kídíe bím kaala míípoto, bulu edílokom míngasumayé.

⁶ Si opan amisi kabbi suname, delo Ruutum bí bím tatbito, delokke bím lomnam gíínam takam lokke mosiito.

⁷ Ruutum ke teyong kotokie, bím pesona kídíem dunggo bomla mopítdo.

⁸ Ruutum bí edítko aidun, dem agísue matasukítoka. Séko bíkkíng edíípe duududí, bí gérne.

⁹ Ruutum me míngkesuna kídíe bím míngge langka, kapeila bím pesola mínggena kídíde píírammayé.

¹⁰ Donam paamangkolok myomure kenola magoodung, idakkom Ruutum bím mínggenade aina atíem píírammang.

¹¹ Aatola sisaana kídía, ngokke agomem tatgaptola, delo ngo Ruutum bím míngge penamem poyilyé.

¹² Nolu yénamem yépope míídonía? Nolu turtíla ashéngpe duulídonía?

¹³ Demílo atímana agom ponam delokke menam yadnamem melangka.

¹⁴ Atímanam lokke gílendokula aina agérem ilangka; yéponamem paape emla rallangka.

¹⁵ Ruutum bí deenampe yéna kídíem kaabomdung, delokke buluke kabbi sunamem tatbidung.

¹⁶ Idakkom bí atímana agér inem akdung, bulu sila bulum menape mitpan sudope emla míídung.

¹⁷ Deenampe yéne igul koyémílo Ruutum bí tatbido, delokke gíínam-lomnam takam lokke, bulum mosiido.

¹⁸ Aapí mínggíp sunalo, Ruutum aníndung, delokke mííla yimana kídíem isiidung.

¹⁹ Aina amie bojéko adírem paadung, idakkom Ruutum bím adír takamlokke mosiidung.

²⁰ Ruutum bí bím apíípe kaabomdung, bíkke along atelkote benmang.

²¹ Atí maname loorímana amikídíem petsuyéku. Deenampe yéna kídíem kangkinem irééyéku.

²² Ruutum bí bíkke amikídíem mosiidung; bíkkíng mosing kosupe aana kídíem mesambiyé.