MIRILUNGGU 25 - DEENA BAIBÉL (BSI)

Kaabomla Mosiidope Kumnamko

¹ E Ruutum nokkíng ngokke aapí ainang tabunglok kumdung.

² E ngokke Shédía, nokkíng ngo míída sudung, ngom annying momayika; ngokke miruem ngokke teyolo ashéng séman momayika.

³ Nom toyana takamem sékomete annying momayika; míílarung aklensuna kídíem annying motoka.

⁴ E Ruutum, nokke bedangem ngom kénmoika; nokke bene ayonem ngom luyiltoika,

⁵ nokke arolo ngom gíbola, ngom poyiltoika; kapeila no ngokke turkeng Shédíe; ngo agínpe nokkíng míída sudung.

⁶ E Ruutum, nokke ayang igul emlang nokke kerango pekai lengkannam eerína ayangem míípang sutokuika.

⁷ Ngokke yaamépe yédulokke paab kídíem mesamtoika. Nokke eerína ayangloklang ainamlok Ruutum, ngom míípang sutoika!

⁸ Kapeila Ruutum bí deenako, delokke ainako; bí paab gena kídíem bulu ingkolok gípe aidodí dem luyildung.

⁹ Bí mínggíp sunem aina bedalok gíbola, bulum bíkke míínamem luyildung.

¹⁰ Mínggap loklang ayanglok bí bíkke daapongem bomna, delokke bíkke lulígem igena takamem gíbodung.

¹¹ E Ruutum, nokke amín legape ngokke imemem mesam toika, kapeila si botterungkai.

¹² Ruutum bím belenggena kídíde, bulu gípeko bedang legangem bíkkelok kényé.

¹³ Bulu agínpe yéyé, delokke buluke ome-ue amongem bomyé.

¹⁴ Ruutum bí bím tatna kídílokke angonge, delo bí bulum bíkke daapongem kénmodung.

¹⁵ Ruutum bíkkíng ngo agínpe igul matadung, delokke bí ngom peso yirílokke mosiidung.

¹⁶ Ngokkíng ngéba dolangkula, ngom ayatoika; kapeila ngo rongngamdung, delokke míídír sudung.

¹⁷ Aapí míídírem míímo sumolangkula, ngom adírlokke laalen tokuika.

¹⁸ Ngokke adír asongem kénla, ngokke paab takamem mesam toika.

¹⁹ Míngkítoka edítko ngokke mirue kadun, delokke ngom kangkikolok edítko bulu ngome mope-díípe idune.

²⁰ Ngokke yénamem kaabomtoika, ngom iréé mayika, kapeila ngo nokkíng duusi gedung.

²¹ Ngokke ainame delokke dengomname ngom mosing daklangka, kapeila nom ngo míída sudung.

²² E Shédíe, adírnam takamlokke Israelem laasing tokuika!