MIRILUNGGU 21 - DEENA BAIBÉL (BSI)

Ikumnamem Rínggename

¹ Nokke ralnamlo rojade ashédung E Ruutum; delokke nokke igullok edítko bí ashédun!

² No bíkke aang míínamem bito, delokke bíkke rogunamem tatmape imang.

³ No bottena utepooroem bomla aato; no bíkke dumpolo uun dumlubem lublíkto.

⁴ Bí turnamem koto, delo no bím turyarnamem bito.

⁵ Nokke igulkolok bíkke angun ralnamde bottedung; no bím mite migom amínem gemoto.

⁶ No bím botterupe utepooro agínpe kamoto. nokke yémín kolok bím airupe ashémoto.

⁷ Ruutum bíkkíng rojade, míída sudung, delokke Ralya yalumna Ruutumke duuyarna ayanglok bí edíng ayaryé.

⁸ Rojade bíkke miru takamem umyé; bím kangkina takamem bí umyé;

⁹ bí bulum meyo dorna emelok lenyékuem gupakyé. Ruutum agí marlílok bulum ménnyokyé, delokke eme bulum gupakyé.

¹⁰ Buluke otíng-oyine sékote turna kamayé, rojade bulum takam petyinyé.

¹¹ Bulu bím petpe ruutí bosuyé, idokom depe ilamayé.

¹² Bí bulum yokmolok apyé, delo bulu dugge yéku.

¹³ Nokke bottena ralnamem kaala ngolu Ruutum me rínggedung! ngolu nokke ralnamem miripe rínggeyé.