MIRILUNGGU 18 - DEENA BAIBÉL (BSI)

Dabidke Ikumnam Mirie

¹ Edítko nom ngo ayadun, E Ruutum! No ngom mopítne.

² Ruutum bí ngokke líídunge, ngokke yapgue, delokke ngom mopítne ngokke Shédíe, delokke líírenge, ngokke duusi sukenge, ngokke tamte, ngokke turkupekue ngokke aane gaange.

³ Ngo Ruutum bím gokdung, delokke bí ngom ngokke mirulokke mopítdung. Ruutum bím yidge daklangka!

⁴ Gííma-siimue ngokkíng daggutuai, gérma-paamue ngokkíng aanínto.

⁵ Gííma-siimue ngokkíng aanínto, agoe ngom tobomto.

⁶ Ngokke adírduem ngokke Shédí Ruutum bím iguldope ngo kabbisuto. Bíkke Kumkeng Ekumlo ngokke agomem bí tatto; bí iguldope ngokke kabbi sunamem tatbito.

⁷ Delo amosi ngenla tonkai; dííte lerínge engenkai, kapeila Shédí bí marto.

⁸ Bíkke nyobulok míkkíe sangkai, delokke bíkke nappalok eme lenla dorna meponge bíkkelok lento.

⁹ Bí talengem pépansula tokto, bíkke ale rumkíde ruakna doomuge ido.

¹⁰ Bí Serubim kolo reesala, delok yopto, bí menarupe asarlokke alap kídílok yoptokto.

¹¹ Bí kaamo aralo duudo, pedong doomuge bím yédgo bomdo.

¹² Bíkke keralok tapíelang yaarie lendo, delokke de ruakna doomugem patkuldo.

¹³ Ruutum bí taleng telo doomír mírto; kedon yalumna tesi agom poto, pedong tapíe delokke líídore oletto.

¹⁴ Bí epugem aplíkto, delo mirue dukpan suto, bí yaarilok latla bulum monpansuto.

¹⁵ E Ruutum, nokke mirukídíem luyédem delokke bulum marlíílok ugbom yédem siyénge onggekai, deeyin derangem kaapangkai.

¹⁶ Ruutum bí teyong telok oila ngom gakto; bí ngom asi arabelok laasatoku.

¹⁷ Bí ngokke bomramnam miru lokke lang ngom kangkina lokke motumto; kapeila bulum ngo ilamín sumang.

¹⁸ Ngokke adír-asola duuduem bulu ngom míílo aabomto; idakkom ngo Ruutumkíng dunggeto.

¹⁹ Bí sipe kolokke ngom igulto; bí ngom mosiito kapeila bí ngom aipe mííto.

²⁰ Ruutum bí ngom amanem bito, kapeila ngo aina atíem idung; bí ngom lubéélíkdung, kapeila ngokke imem kamang.

²¹ Kapeila ngo Ruutumke ngiitomem bomdung, delokke ngokke Shédíkelok atímape ila ngo gípek kumang.

²² Ngo bíkke ayon takamem bomdung, ngo bíkke ngiitomem mepak kímang.

²³ Ngo bíkke keralo lupenam kamang, delokke ngo agíe imem mape yédung.

²⁴ Dekepe iname bí ngom amanem bidung, kapeila ngo aina atíem idung, legade ngo deesune emnamdem bí ngom kéndung.

²⁵ E Ruutum, nom míngkesuna kídíem nokom arope míídung, aropakna kídíem apíípe no aibosudung.

²⁶ Deena kídílo deenamem no lengkan sudung; delokke atímape ina kídílo aknamem lengkan sudung.

²⁷ Ansoope míísuna kídíem no mopídung, idola míngkímsuna kídíem mínggíp sumodungku.

²⁸ No ngokke meruem nyottoika; ngokke Ruutum, ngokke kaamuem nguntít toika.

²⁹ Nokke ralnamlok ngo maklíngem ikumladung, delokke Shédí kelok ngo yapgo língkumem yobbo ladung.

³⁰ Shédí kepedan bíkke bedade aropage; Ruutumke pébisunam aroem bí lengkandung; bíkkíng duusigena takam lokke bí mimak tamte.

³¹ Ruutum bí petom Shédí bí. Shédí petommin ngolum iturne.

³² Shédí bímin ngom ralmonade, delokke ngokke bedangem aromone.

³³ Bí ngokke alem sidum ale kísape píto, delokke dííte moopalo yépope yémoto.

³⁴ Ngo ralnarung iyyiem holadope, bí ngom mimak inana alagem bitung.

³⁵ No ngom mopíto delokke mosiito, delokke nokke lakbíge ngom igulto, delo nokke igule ngom botte motung.

³⁶ No ngokke ale tukuem bortakmola, ngokke alem yullap sumomato.

³⁷ Ngo ngokke miruem monla umto; delokke bulum melík kumape petpakto.

³⁸ Ngo bulum níkkato, bulu gerep layikumape ngokke ale rumkílo dooto.

³⁹ No ngom mimak idope tolnamem bitung, delokke ngokke miru kídíem ikumdope ito.

⁴⁰ Ngom mirue dugge dokupe no ito; ngom kangkina kídíem ngo petpakto.

⁴¹ Bulu igul matala kapyé, idola delo sékote iturna kamayé, bulu Ruutum bíkkíng kabbisuyé, idola bulum bí tatbimayé.

⁴² Ngo bulum deemulpe idope, asarlo yaptak sudope relmíkdung; bedalok suyung kísape ngo bulum tujémdung.

⁴³ Ngom no miru amilokke mopíto, delokke ngom angu opín kídíem yébodope meto; ngokke kénmanam ami kídíde supak ngokke rumkílo yéna amipe ikaku.

⁴⁴ Luyu amikídíe ngokke keralo kumdung, ngokke legangem tayyém bulu beleng gedung.

⁴⁵ Mibokídíde misokai, bulu buluke mimak yapgolok danla lendo.

⁴⁶ Ruutum bí turyarne! ngom itumbonem ngo rínggedung! ngom mopína Shédíke bottenamem pogoo langka.

⁴⁷ Miruem ikumnamem bí ngom bito, ngokke rumkílo angu opín kídíem bí meto;

⁴⁸ bí ngom mirulokke laalentoku. No miruem ikumdope ngom tolnamem bito, E Ruutum, díína-mona ami kídílokke ngom mopíto.

⁴⁹ Dekepe ila angu opín gooralo, ngo nom rínggedung.

⁵⁰ Shédí bí bíkke rojalo botterupe ikumnamem bidung; delokke dunggapna ayangem bíkke tosaknam Dabid kílang bíkke otíng-oyin kídílo agínpe lengkandung.