MIRILUNGGU 17 - DEENA BAIBÉL (BSI)

Imem Kamana Amilokke Kumname

¹ E Ruutum ngokke aro legangem matanamem tatbika; ngokke tetena nappalok kumnam sim tatbika!

² No ngokke ainam legape bisaryé, kapeila ingkue aidudí dem no kéndung.

³ No ngokke aangem kéndung, no ngokkíng yohlo aato; no ngom apíípe ankí-kangkíto, delokke ngokkelo atímana mííyi míísang paamang.

⁴ Ngo abíd kísape gomreng lumang; ngo nokke ngiitomem igeto delokke ngo díínam-monam bedangem meto.

⁵ Ngo agínpe nokke bedalok gídung, delokke ngo gípek sumang.

⁶ E Shédía, nom ngo gokdung, kapeila no ngom kaabiyé; nokke nyorunge ngokkíng genínla ngokke agomem tatgap toika.

⁷ Irisinyorupe nokke duuyarna ayangem ngom lengkanla mosii toika; nokkelo mirulokke ngo atí pesomang.

⁸ Nokke agí amigruulok ngom mosii toika, nokke labbíng rumkílo taapop bomtoika,

⁹ ngom petpena atímana gargoona mirulokke mosiitoika.

¹⁰ Bulukelo ayang emnam atírung kamang, bulu lue sumape ludung.

¹¹ Bulu ngom gonggitdung; ngom gargoodung, ngom soletkupe emla kaatí bomdung.

¹² Bulu sérképe emla ina myomur kísa, tobomna simyo kísadung.

¹³ E Ruutum! Ngokke miruem imín sutoika, bulum ikumtoika! Nokke yoksalok ngokke turnamem mosiitoika.

¹⁴ E Ruutum, turla yéduso takamem kayinsuna amikídí lokke ngom mopítoika. Nokke bulum ingéénape mekumnam delok bulum ingéétoika. Buluke koo kídíem koo adulok ingéé langka, delokke buluke oten ome-oo kídíkepe ingéépenam ayokonem mebilangka.

¹⁵ Ngokke pedan, ngo nokke mingmuem kaayé, kapeila ngokke imem kamang; Edílo ngo daryékudí delo ngo nokke dunggu namem kaala ashéyé.