MIRILUNGGU 16 - DEENA BAIBÉL (BSI)

Míídíí Sudope Kumname

¹ Ngom mosing toika E Shédíe; duusi sukepe nokkíng ngo míída sudung.

² Ngo Ruutum bím sikepe podung, “Nomin ngokke Ruutume; nokke kékonlo aina atí kamang.”

³ Ruutumke míngkesuna ami kídíde milo aroeke! Bulukíng ngokke botterupe mííyum suname duuyé.

⁴ Séko bulu pílenmana shédíem matadudí, agíke ankí-kenuem bojé modung; Ngo buluke yilum biilíkko ipaklo yémín gemayé; ngo buluke pílenmana shédíem kumsumayé.

⁵ Ruutum no, ngokke tabungsue, delokke no ngokke míínam takamem bidung; ngokke yépenamsi nokke alaglo dung.

⁶ Nokke ngom binam amansi míngkírula binamko, de edítko aidun!

⁷ Ngo Ruutum bím rínggedung, kapeila bí ngom yégap bodung, delokke yuem ngokke aange ngom luyil sudung.

⁸ Ngo Ruutumke yégunamem kénsudung; bí anínlo yédung, ngom ingkuete ngenkí lamang.

⁹ Delok legape ngokke aangsi ashédung, delokke ngokke aapí si erdung; ngo edíírupe míísu dung.

¹⁰ Kapeila no ngom sinam lokke mopítto; delokke nokke ayanam amidem sipeko amolo no melíkmayé.

¹¹ Turpeko bedangem no ngom sutlíkyé, nokke dagguname ngokke ashéngem apíí modung, delokke yéngampe ngom yémodung.