MIRILUNGGU 148 - DEENA BAIBÉL (BSI)

Taleng Kuppo Takame Shédíme Ríngge Bosudope

¹ Ruutum me ríngge langka! T Teyolo duuna kídíe, teyolo duuna Ruutum me rínggelangka.

² Bím ríngge langka teyong kotoki takame, teyong amolok sipaying takame.

³ Bím ríngge langka, doonyielang pooloe; bím ríngge langka, angunna takar kídíe.

⁴ Bím ríngge langka teyong yalum kídíe, delokke taleng teyolo duuna asie.

⁵ Ruutumke amínem bulum takam kummo langka! Bíkke lulíklok bulum pílento.

⁶ Bíkke lulíklok bulum agí dungkolo agínpe dunggap bosudope píto, delokke bulu tatmape ilamang.

⁷ Ruutum me amosokke ríngge langka, siyéng aralo duuna takamete,

⁸ yaarie, tapíe, tapame, delokke doomuge, bíkke lulígem tatna gumnam asar takame.

⁹ Bím ríngge langka, dííte moopange, siipí-siiyé esing, mooname, delokke takam sidar esing kídí;

¹⁰ simon sili takame, bomname lang bommaname, tabí-tayue, delokke kebung pettang takame.

¹¹ Bím ríngge langka, rojakídíe, delokke ami takame, roja dogene, delokke abíd ruutum takame;

¹² mime kooe, delokke yaamé koo kídíe, mijinge, delokke ojing kídíe.

¹³ Bulum takam Ruutumke amínem yidge molangka! Bíkke amínde abíd takam empemílo botteyane; bíkke angun ralnamde among talengem kedonyane;

¹⁴ bí bíkke opínem ardamodung, delo bíkke ami takame bím koyiddung. Israel ami kídíe bíkke ayarunampe idung. Ruutum me rínggelangka!