MIRILUNGGU 144 - DEENA BAIBÉL (BSI)

Rojake Ikumkolok Shédíme Koyitname

¹ Ruutum bím ríngge langka; bí ngokke tamte! Bí pamín níkmín sunamem ngom iyildung, delokke mimak legape leemobidung.

² Bí ngom mopítbone, delokke ngom aabosune, ngoluke duusi sukenge, delokke turmokune. Bíkkíng ngo edíípe míídasudung, bí amikídíem ngok rumkílo duumodung.

³ E Ruutum, nokke kanggap bomnam tanide ingkuedí; koret kamana amiem nokke an-gap bomnamde ingkuedí?

⁴ Tani yénamsi ngarum atel kísanako, bíkke yénamde nyokkuna ugyum kísanako.

⁵ E Ruutum talengem pépansula toklangka; díítem ukkílangka, delo dekedelok míkkíe lenyé.

⁶ Yaariem latmola nokke mirukídíem monpan sulangka; nokke epugem aplíkla bulum dugge molangka.

⁷ Teyong telok tokla, asilok ngom gakrep langkula mosiitoika; mibo ralnamlokke ngom mopítoika,

⁸ bulu edílokom aro agom pokímang, delokke pésudolate menakídíe.

⁹ Ngo nom aní miriko lubiyé E Shédía; ngo kéékung tapungem bomla nom miri lubiyé.

¹⁰ No roja kídíem ikumnamdem bidung, delokke nokke béérang Dabidme laasito.

¹¹ Kaníína miru kídílokke ngom mopítoika; mibo ralnamlokke ngom mosiitoika, bulu edílote aro lukímang, delokke pésugeyéla mekune.

¹² Ngoluke oo kídíke yaamé siisange, edíípe saana esing amum kísape idaklangka. Ngoluke ome kídíde roja ekumem kampomona gaang kísape idaklangka.

¹³ Ngoluke kumsungem atí takam alie bíísét bomdaklangka. Ngoluke aríklo yéna mér sobéne jarying jarngope ngangem odaklangka.

¹⁴ Ngoluke bomnam simone orí oyang kamape, demangkom onyok osokmape bojépe ngangem odaklangka. Ngoluke bedalo aatí opan kapnam ríínam kamang daklangka.

¹⁵ Sikepe yéna opínde gérne; séko buluke Shédípe Ruutum idudí bulu gérne.