MIRILUNGGU 141 - DEENA BAIBÉL (BSI)

Yumem Kumname

¹ Ruutum nom ngo tomdung, menape ngom igultoika supak! Ngokke nom gogyém no tatgap bika.

² Ngokke kumnamem nokke keralo pakyak rombinam kísape míílangka, ngokke alage lengonla kumnam sim yume amanpe míílangka.

³ Ngokke nappangem kaabomnako melíklangka E Ruutum, ngokke nabbélem lutumnako melík langka.

⁴ Imem míímem pekolokke, delokke atímana mirul kídílo gyappeko lokke, ngom mengu sulangka. Ngom bulukíng domín tíímín gemo mapeka.

⁵ Aina amie ngom ayalok ingéé lungéélado, idakkom ngo atímana amilok mínggenamem torík sumayé, kapeila ngo agínpe buluke aimanam agér kídíem akla kumdung.

⁶ Edílo bulum yébona kídíem dííte tukjunglok yoppak yédí, delo amikídíe ngokke agomde arokuai emla kényé.

⁷ Esingem gattula, delokke gatkéla inam kísape, buluke along kídíemkom agolo kalpan kalran sumoyé.

⁸ Idakkom ngo nokkíng mínggapdung. E Ruutum Shédíe; nokkíng ngo duusigedung; ngom simomayika!

⁹ Buluke etku gorunam lokke ngom mopítoika, atímana ami kídílokke ngom umbomtoika.

¹⁰ Ngokke gíbít rongem atímana amikídíem, buluke agí etkue batsu daklangkuka.