MIRILUNGGU 139 - DEENA BAIBÉL (BSI)Shédíke Kénpiname Delokke Ankíname 1 E Ruutum no ngom ankénto, delokke kénto. 2 No ngokke iyi sisang takamem kéndung, mooteng lokkekai no ngokke mííyi míísangem kéndung. 3 Ngo agér idudí imadí no kaadung; no ngokke iyi sisang takamem kéndung. 4 Ngokke polenmang adape no ngokke popenamem kénto sudubong. 5 No ngokke lamku kerang takamem duubomdung; no ngom nokke ralnamlok mopítdung. 6 Sikepe nokke kénnamsi ngokkepe eerírune; si ngokkepe míípíng kénpí maname. 7 Ingkolo ngo nokke lok duknyok geyéne? Nokke keralok ngo kape kísa gínyok gepene? 8 Ngo teyong telo saamílokom no delo dung; uyu amolo yédokom no delo dung. 9 Ngo alapgela sanggolokke yoplangala anggo kéényulo yopnyokla duudokom, 10 deloteng nokke alage ngom gakbomyé, delokke lakbíklok ngom igulyé. 11 Kaamue ngom mittumtoika emdokom, demangkom ngom ngunkaana angune kaamope batdokom, 12 kaamodete nokkepe kaamomayé, delokke yoh dete nokkepe angunpe iyé. Ruruk delang angunde nokkepe akamyé. 13 Kapeila no ngokke arang amíl takamem píto, no ngokke ane akiilo duudungem písutsuto. 14 Ngo nom koyiddung, kapeila no peso rupenamko; nokke inam takamde kangkí rumaname, delokke irisinyue. Ngo dem ngokke aapí ainang tabung lok kéndung. 15 Edílo ngokke alongem pítodí, ngokke ane akiilo aipakpe alonge tupdum sutodí, edílo ngo delo asoope siitodí, ngo ane akiilo dung emnamdem no kénto. 16 Ngom omang adape no ngom kaato, ngom binam longe kídíem, dekedem akone lenmang adapekai nokke kitablo atla metung. 17 E Shédíe! Nokke míínamem ngo míípíng kírame! Edítko dekede reppi bomdun! 18 Ngo dekedem sandomílo, dekede sulli empemílo bojéyadung, edílo ngo gerep dudí, delote ngo nokkíng dada dung. 19 Edítko atímana mirukídíem no petpakyépe emla ngo míídun, E Shédíe, eríl erol ina amikídíe atí imape meduamílo, emla ngo edítko míídun! 20 Bulu atímana atíem nokkíng tuulíkdung; nokke amínem atímape bulu ludung. 21 E Ruutum edítko nom kangkina kídíem ngo kangkidun! Nom ipéésuna kídíem edítko ngo míípakdun! 22 Ngo bulum berokrupe kangkidung; ngo bulum agíke miru kísape míísudung. 23 Ngom ankang kílangka, E Shédíe, delokke ngokke aapíem kénlangka. Ngom ikangkíla ngokke míínamem kénlangka! 24 Ngokkíng atímanako kadudí dem kaalangka, delokke turyarpeko bedalok ngom gíbolangka. |
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
Bible Society of India