MIRILUNGGU 109 - DEENA BAIBÉL (BSI)

Míídírna Amilokke Aknamko

¹ E ngokke rínggenam Shédía, asoope tarula duumapeka!

² Atímana mirul kídíde delokke mena yadne ngom ruabomdung. Bulu ngok teyolo metígoodung,

³ delokke bulu atí sirimape ngom potígedung, atíyang legang kamape ngom míílodung.

⁴ Ngo bulum ayala buluke legape kumbilate bulu ngom agtí tetenge.

⁵ Bulu ainam legape atímalok, ayanamem kangkilok iyansudung.

⁶ Atímana amiko ngokke miruem bisar motoka, delokke bíkke agíke miru akonem bím edo luket motoka.

⁷ Bím gusor iyém ajéng iket daklangka; bíkke kumnamdemte paabpe sandaklangka!

⁸ Bíkke yéname lootung daklangka; bíkke ami akone bíkke agérem laabín daklangka!

⁹ Bíkke ome-oo kídíe abu kaimape yédaklangka, delokke bíkke mime, meyépe idaklangka!

¹⁰ Bíkke ome-oo kídíe dungkeng kaimape magooyé; bulum bénromna ekumlokke monpak daklangka.

¹¹ Ajéng langkune bíkke eku sérangem langkam daklangka, delokke bíkke ankípe ibomsunam takamem mibue laayin daklangka.

¹² Sékote bím ayang kaapasuna kamang daklangka, delokke bíkke mekutsunam opanem sékote kaabomna kamang daklangka.

¹³ Bíkke otíng oyin takame siyin daklangka, delokke bíkke amínem yépenam siirumlo mitpan sudaklangka.

¹⁴ Ruutum bí bíkke buku imemem mííyar gedaklangka, delokke bíkke ane paabem edílokom mesamdope imadaklangka.

¹⁵ Ruutum bí buluke paabem míngge ayar daklangka, idola bulu agíem apíípe mitpan sudaklangka!

¹⁶ De tanide edílokom ayang lengkan sukímanako, idakla opanem, aréénem, adír asongnem petnam petomem míídung.

¹⁷ Bí béénam rolnamem aipe míídung, bíkkíng bééname aasu daklangka! Bí lubéé límang. Sékote bím lubéé madaklangka!

¹⁸ Bíkke béénamde agíke ege galuk genam akam suebong; bíkke bééname agí amíllo asi kísape juasudaklangka!

¹⁹ De bíkke kunggenam gasor kísape bíkkíng idaklangka. Loodíke énggenam uug kísape bíkkíng idaklangka.

²⁰ E Ruutum dekepe ngokke miru kídíem, ngom sikena atímana atíem lunakídíem ingéélangka.

²¹ Idakkom Ruutum, ngokke Shédía, nokke pébisukorlok ngom igultoyika, delokke nokke ainam ayang akorlok ngom mosiitoika.

²² Ngo pííram sémona opanko, ngo aang arang lokkekai míídírsue idung.

²³ Doonyi orii kísape ngo nyokdakbong, ngom takame tari kísape mon-gobomdung.

²⁴ Ngo donam paayi mangkolok tolyimang; ngo asigelang along petome ikai.

²⁵ Ami kaayém bulu ngom ngilkado; bulu dumponge mamang kitla ngom lukaado.

²⁶ E Ruutum, ngokke Shédía, ngom igultoika! Nokke duuyarna ayang akorlok ngom laasitoika!

²⁷ No ngom mopítne emnamdem ngokke miruem kénmolangka.

²⁸ Bulu ngom béélado, idola no ngom lubééyé. Ngom irééna kídíem rumkílo doomotoka, delokke ngom nokke béérangem ashémoika.

²⁹ Ngom lurééna kídíem annying sumotoika; buluke annyingem egepe bulum gemolangka.

³⁰ Ruutum bím ngokke nappalok botterupe yidgeyé, milung gooralo ngo bím rínggeyé.

³¹ Kapeila bí opanem aabosula, bím lukaana kídílokke laalendungku.