MIRILUNGGU 105 - DEENA BAIBÉL (BSI)

Shédílang Bíkke Amie

¹ Ruutum bím koyitlangka, bíkke bottena amínem pogelangka; opín abíd takamem bíkke agér inamem kénmolangka.

² Ruutum me miripe rínggelangka, bíkke irisinyo inam atí siríem pokanlangka.

³ Bíkke amínem matana kídíke aange ashélangka!

⁴ Ruutum me delokke bíkke ralnamem matalangka, bím kumyar langka!

⁵ Bíkke irisinyo inamem, bíkke iyod sangodem, bíkke kebang agomem kén gelangka.

⁶ Bíkke béérang Abrahamke otíng oyinem, bíkke ullennam Jakobke oo kídíem míípang sulangka.

⁷ Bímin Ruutum, ngoluke Shédíe; bíkke lunamde among takam legape ludung.

⁸ Bí bíkke daapongem agínpe duumoyé, pébi sunamde éjar éjar siirum legape kadung.

⁹ Bí Abrahamme luyin bosunam daapongem, delokke Isaakkíng pébisunamem bomgapyé.

¹⁰ Ruutum bí Jakobkíng daapongko ibosuto, de duuyarpena daapongko.

¹¹ Bí poto, “Ngo nom Kanaan amongem biyé, de nokke duuyar bompenam tarongpe iyé.”

¹² Shédíke amikídíe anyoto, Kanaan amolo mibope yéto.

¹³ Bulu doolung konlokke doolungkonlo, among konlokke among konlo magooto.

¹⁴ Idakkom Shédí bí sékomete iréé momangai, buluke legape rojakídíem bí lurítto.

¹⁵ “Ngokke tosaknam amikídíem imapeka, ngokke kaaluna miri kídíem míílo mapeka!”

¹⁶ Ruutum bí buluke amolo dírí kenuem melíkto, delokke buluke dope tíípenam takamem laanyokto.

¹⁷ Depe iduem bí buluke kerape abílpe konyoknam Joshephme melíkto.

¹⁸ Bíkke alem íkolilok yééla meto, delokke bíkke alínglo arem lungguko tulíkto

¹⁹ bíkke ponam agome aro mangadape Ruutumke agome bím aroem lengkanbito.

²⁰ Delo Ijipt lokke roje bím melentoku; angu opínem yébone bím laalentoku.

²¹ Rojade bím bíkke sorkariem duubom dope, delokke among takamlokke ruutumpe meto.

²² Bíkke migom kídíem Josephke rumkílo mela, bíkke mirokídíem kénnamem luyildope meto.

²³ Delokrongem Jakob bí Ijiptlo ento, enla delo mibuk byaklíkto.

²⁴ Delokrongem Ruutum bí bíkke amikídíem parmoto, delokke buluke miru empemílo edííyamoto.

²⁵ Ijipt amikídíem bíkke amikídí teyolo kangkimoto. delokke bíkke béérang kídíem yadmoto.

²⁶ Delo bíkke béérape ullennam Mosi melang Aaronme bí melíkto.

²⁷ Bínyi Shédíke irisinyo agérem ibito, delokke Ijipt amolo irisinyo iyod sangodem lengkanbito.

²⁸ Shédí bí doolu delo kaamuem melíkto, idola Ijipt ami kídíe bíkke lulíknamem mínggemang.

²⁹ Bí buluke asi korongem iyyipe batmoto, enguem petyinto.

³⁰ Buluke doolude tatík mílípe bíísétkai, roja dungkuemte bíísét bomkai.

³¹ Shédí bí políkname, tamidelang takome among tabungem bíísétbomto.

³² Pedong adumpe bí tapíemlang yaariem buluke amolo melíkto;

³³ buluke onggur arígemlang tapang anem, delokke esing takamem díryinto.

³⁴ Bíkke lulíklok sanam yimanam pemíre aabomto;

³⁵ dekede among delokke neyang takamem katyinto; buluke ali-ayé takamem doyinbito.

³⁶ Bí Ijipt amolokke ogenam oo kídíem petyinbito.

³⁷ Delokrongem bí Israel kídíem goolentoku; bulu arem delokke uunem giibomtoku, delokke bulu takame amíl amoe edííto.

³⁸ Ijipt amie buluke lenkunamem kaala ashéngkai, kapeila bulu amikídíem pesoto.

³⁹ Shédí bí doomugem ugyumpe melíkto, delokke yuem angunpe meruem bito.

⁴⁰ Bulu koname, delo bí kuél pettangem melíkbito, delokke teyong telok dotkéem alummadope melíkbito.

⁴¹ Bí líírengem kiiyaname delok sirunge lento; de mooruk amolok korong asipe tokto.

⁴² Legade bí bíkke deenampe pébisunam emlang, bíkke béérang Abrahamme míípasuto.

⁴³ Dekepe bí bíkke amikídíem ashépe goobomtoku, bíkke ullennam kídíe ashéla gokbatto.

⁴⁴ Bí bulum ami amongem bito, delokke buluke arígem yébomdope bito.

⁴⁵ Dekepe Shédí bí, bíkke amikídíem ayonemlang, poyilnamem iyar gedope ito. Ruutum me rínggelangka.