MIRILUNGGU 102 - DEENA BAIBÉL (BSI)

Adírna Yaamélokke Kumnamko

¹ E Ruutum, ngokke kumnamem tatbika, ngokke igulkola kapnamem tatbika!

² Adírdo longem nokke mingmue ngéésik sumayika! Nokke nyorunge geníntoyika, ngokkíng ngokke gokdo longem menarupe no poyan sutoika!

³ Legade ngokke longe míkkí kísape gyanyokdung, delokke ngokke amíle mepom kísape guname idung.

⁴ Ngok aapí sim sanpakkuna ííng kísape demngaltung; ngo ngokke dotké emte dotope emla mííyimang.

⁵ Ngokke sigíne bottekolok ngo asigelang along petome ikai.

⁶ Ngo mooruk amolok pettang kísa, moopak amolokke pettun kísa.

⁷ Ngo darla ketdung; ngo míílong teyolo atelpe duusuna pettang kísa.

⁸ Longe rubungem ngokke mirukídíe ngom lungil lusola ludung, ngom luyé luléna kídíde ngokke amínlok béénadung.

⁹ Ngo metbuem apimpe dodung, delokke miksiem ngokke tíngkolo tíítaksudung,

¹⁰ de nokke yagorupe markolok ikai; kapeila no ngom laala elpakto.

¹¹ Ngokke longe kídarde doonyi orii kísadung; tami kísape ngo sanpakdung.

¹² Idakkom E Ruutum, nodan Rojape iyardung; siirum mipíe nom míípang suyardung.

¹³ No gerepla Jayonem ayasuyéku; si bím ayadíku longe; moodíe píngkapak.

¹⁴ Dem bénpak duakom nokke béérang kídíe dem ayadung; dem bulu ayang míípa sudung.

¹⁵ Angu opín kídíe Ruutum bím pesoyé; among sokke roja takame bíkke angun ralnamem pesoyé.

¹⁶ Edílo Ruutum bí Jayonem moyékudí, delo bí angun ralnamlok lengkan suyéku;

¹⁷ bí mepaknam ami kídílokke kumnamem tatbiyé, delokke buluke rogunamem tatgapyé.

¹⁸ Omang adanam amikídíe Ruutum me rínggedope; bíkke inam kídíem atla melangka.

¹⁹ Ruutum bí kedonko deena amolok toksudungku,

²⁰ bí patek duuna kídílokke sigínem tatla, delokke simopenam kídíem melentoku.

²¹ Dekepe bíkke amínem Jayonlo pokan gooyé, delokke Jirusalemlo bím rínggeyé.

²² Edílo amikídíela doolung kídíe dumsula iyédí, Ruutum bím bulu yidgeyé.

²³ Ruutum bí ngom ngokke yaamé dungadape ralmomato; bí ngokke yépenamem lootumoto.

²⁴ E Shédía, ngokke mijing mangadape supak ngom laapak mayika. E Ruutum no duuyarne.

²⁵ Kerango pekai no amongem píto, delokke agí alagrulok no talengem píto.

²⁶ Bulu nyokyéku, idakkom nodan duuyarne; bulu ege galuk kísape ínpakyéku. Ege galugem mepaknam kísape no dekedem mepakyéku, delo dekede nyokyéku;

²⁷ idakkom nodan akampe duuyé, delokke nokke duurí kamang.

²⁸ Nokke béérang lokke ome-oo kídíe duupope duuyé; nokke pegong aralo bulu edíípe duuyé.