MIRILUNGGU 10 - DEENA BAIBÉL (BSI)

Teteng Arolok Kumnamko

¹ E Ruutum, kapeila no mootengoolo duudune! Ngoluke adírduem kapeila no runyok gedune?

² Atímana ami kídíde míngkím sukolok opan kídíem monla, buluke mííru-irunam agérlo olíkmodo.

³ Legade aimana ami kídíde atímana aapí míísangem adum ale míísudung, delokke kaabo-tatbonade Ruutum bím béédo delokke mepaksudo.

⁴ Atímana amie Ruutum bím ankímang; Bíkke míngkím aapílok, “Shédí kamang,” emla mansudung.

⁵ Bíkke ibomnam takamlo apíídung. Bí Shédíke bisarem ankénmang; bíkke miru kídíem bí lungildung.

⁶ “Ngom ilamayé,” emla bí agí aanglo míísudung, “Yénam tabunglo ngo yépope yéyé,” emla mandung.

⁷ Bíkke nappadelo béénam rolname melí-yaddonge delokke iríde bíísétdung; bí belumnam agom lukolo aabandung.

⁸ Bí doolung aralo rula dung, delokke rorikolo emmum amiem petpe emla tobomdung, iréé penam amiem kaarung goodung.

⁹ Bí myomur kísape asoope rubomla dung. Bí opan aréénem tobomla dung; bí bulum egumlok umla satbomdungku.

¹⁰ Iréénam kídíde bíkke tolnamem doolang gemape olet gedung, dekepe ila iréénam kídíde bím tolya sula yimang.

¹¹ Atímana amide sikepe míísudung, “Shédí bí míípa sumang, bí agí mingmuem lengkan sumang, bí edílokom sim kaamang.”

¹² E Ruutum, atímana amikídíem ingéélangka! Adírna kídíem míípang sulangka.

¹³ Kape kísa Shédíme akna atímana amikídíe sikepe luyén, “Bí ngom ingéémayé?”

¹⁴ Idakkom Shédí no yényi-yésoemla adír-asongem kaadung, delokke agínpe igul lídung, iréénam kídíe nokkíng tolík sudung; no pííramna kídíem agínpe igulto.

¹⁵ Atímana ami kídílokke ralnamem benpak toika; buluke imemkolok bulum atímanem iyimadope ingéélangka.

¹⁶ Ruutum bí duuyarbona roje. Angu shédíem kumna amikídíe bíkke amolokke nyokyéku.

¹⁷ E Ruutum, no améngope míísuna kídílokke rogunamem tatbi toika; no buluke aangem edíímola nokke nyorunge genín bitoika.

¹⁸ No iréénam kídíemlang aatí opan kídíke kapnamem tatbilangka; no bulum aabo sulangka, demílomin turyar mana tanie irít lamayéne.