MIKAH 5 - DEENA BAIBÉL (BSI)

¹ “Jirusalem lok ami kídía, noluke sipaying kídíem laadum sutola! Ngolume miru maglínge gargoo bomkai! Bulu Israelke ruutumem arem banggén kolok kém-kém lok dembomkai.”

Bethlehemlok Ruutumko Shédíke Pébisuname

² Ruutum bí podung, “E Bethlehem Ephrathah, no Judah opín aralokke amé yalumna opínkone. Idokom ngo nokkelok, Israel opínem ruutum bopenako, sékoke erang odongem konnying-mennying kelokai siglík kunamko ullenyé.”

³ Dekepeila mime anede okii kila oodem olenma tetelope, Ruutum bí bíkke ami kídíem mepak poyé. Delok rongem monnyoknam ami kídíe, buluke agí Israel aní-bíro kídílo lekope duubo suyéku.

⁴ Edílo bí aayédí, delo bí Ruutum kelok aana ralnam, delokke Ruutum Shédí bíkke agíke angun-abéna agíl-apyolok, bí bíkke ami kídíem ruutum bomyé. Bíkke ami kídíe pesopenam kamape míípodola duuyé, legade bíkke agíl-apyodem tani among kéényung-regoke tani takame kényinyé,

⁵ delokke bí eetet em bomayé. Edílodí Assiria kídíe ngoluke among sim mimakpe aabomla, ngoluke yapgo kídíem bénla aabom yédí, delo ngoluke miram kereng kídíem bulume mimak imín sudope ngolu melíkyé.

Mopítname Delokke Ingéngname

⁶ Gíníng-yoksa ralnamlok, bulu Assiria kídíem, Nimrod amongem bulu ikumyé, delokke Assiria kídíe ngoluke dei-degongem maglíngpe aabomyém bulu ngolume mopítyé.

⁷ Mopísula turla duuna Israel ami kídíe, deddína bosi-dadi opín kepe Ruutum ke melíknam eker-essa mokuna tangar kísape, delokke garrepna nesi-neyanglo pedong olíknam kísa iyé. Bulu tanilo míída sumape Shédí kelo míídasuyé.

⁸ Bosi-dadi opín delokke ummape menam kídíde moonam kolo, demangkom mér alung kolo donam legape monta goona myomur simyo kísape iyé. Bí mér alunglo aalíkla, bulume pijém-rekjémla, alop-aloppe puké-puyédung. Delokke sékokom mopí sudope míínam sunam kamayé.

⁹ Israel bí bíkke miru kídíem ikum kumyinyé, delokke bulum takam nyokyin moyé.

¹⁰ Ruutum bí podung, “Delo longe delo ngo noluke guré kídíem laabínla, guré-gaari kídíem dempen penyin biyé.

¹¹ Ngo noluke among lokke luune bottena kídíem nyokmoyé, delokke noluke yapgo tabungem bénpak biyé.

¹² Ngo noluke jadu-montrong inam kídíem nyokmola, nolume lubééla kerang yépenam legangem luto subipena kídíem kamoyimayé.

¹³ Ngo noluke pínam mimang kídíem, delokke deenampe míísu bomnam dabu gaang kídíem benmík-míkyinyé. Nolu agíke alaglok písunam mimang kídíem kumsu yimayé.

¹⁴ Ngo noluke among lokke uyu mime Asherahke mimang kídíem pungkutyé, delokke noluke luune bottena kídíem nyokyin moyé.

¹⁵ Delokke ngokke martíklok, ngokke ponamem igemana bosi-dadi opín takamke teyolo ngo edo rayé.”