MIKAH 4 - DEENA BAIBÉL (BSI)

Ruutum ke Taleng-kuppoem Eetetlok Yéboname

¹ Yépenam longe kídílo, Kumkeng Ekum dungko díítede, dííte takamem sangkodola, kedon yalumna díítepe kyopo bomyé. Bosi amie, asi korong kísape mír-mírem delo aadum sula,

² bulu poyé, “Kaju ngolu Ruutum ke díítelo saalaju, Israelke Shédíke Kumkeng Ekumlo. Legade bíkke ngolume igedope míínamem bí poyilyé; bíkke sutlíkko bedalok ngolu gíyé. Legade Ruutum ke ngiitome Jirusalemlok aadung; Jayonlok bíkke ami kídíem bí lupodung.”

³ Opín-buang kídí aralokke kebang kídíem, mongékela mootengke mite-mirem aralokke kebang kídíem, bí luyinbiyé. Bulu buluke yoksa kídíem aal gínana pangpe, gítunglok dííbyab yéku, delokke buluke gíníng kídíem esing ngébín nana kassik-yoksikpe píyin yéku. Opín-buang kídíe lekoda midu-mimak enyimayé, edíloteng mimak leemo irung yimayé.

⁴ Agíke onggur bagan kídí lolang pik esing kídí gooralo, mipile eetetpe duuyéku, delo sékokom bíme morít yimayé. Ralya yalumna Ruutum bí sim togesuto.

⁵ Opín-opíne agí-agí uyueme kumsula, delokke deke delok lulígnamem tatdung. Idola ngolu Ruutum ngoluke Shédíme kumsula, bíkke lulígnamem agínpe iyaryé.

Israele Monnyokko lokke Aalatsuyéku

⁶ Ruutum bí podung, “Ngokke ingéngnam, monnyokkolo adír paana ami kídíem, ngokke lekope laadum sudíku moodíe píídak.

⁷ Bulu lebyadung, delokke agí ekum lokke mootenglo dung. Idakkom dungkína bulukíng ngo anípe yélen kunamko ilenyé, delokke bulu botteruna opín kope iyéku. Ngo buluke teyolo, Jayon Díítumlo duudola, delok moodí delokke ila agínpe ruutum bomyaryéku.”

⁸ Delokke Shédíke, mér kaabomna kísape bíkke ami kídíem kaabom sutíko doolung Jirusalem no lekoda, nokke ruutum bomtuanam among yéta delokke ruutum leríng luunepe iyéku.

⁹ Kape no siddípe ulo jérla kapdune? Mime aneke okii kinam kísape no kape idune? Nolu roja kamang kología, delokke nolume luyil-poyilbona kídíke sinam legapía sikepe nolu kapdune?

¹⁰ Nganga olendagem mimeke yikkup-yiklatsula sigínnam kísape, Jirusalem lokke ami kídí nolu itola, kapeila nolu supak luune sokke gílenla mooyana among delo duupe aiyé. Nolu Babilonlo gípe aiyé, idokom delo Ruutum bí nolume noluke miru kídílok mopítyé.

¹¹ Deddína opín-buange nolum mimak ipe gídum sukai. Bulu sikepe podung, “Jirusalem me nyokmoperung aido! Ngolu sim luune sim kumrom-bénrom dope kaayé!”

¹² Idokom si opín-buang kídísi Ruutum ke aapílo míínamem kénmang. Aliem yikdope joodum sunam kísape bulume ingéng dope goodum subomdung emla bulu atí kénsumang.

¹³ Ruutum bí podung, “Jirusalem lokke ami kídía, gíla noluke miru kídíem ingéngtola! Ngo nolume arem reebung kídíem, delokke pitol lepuk kídíem gena rubo ralna kísape imoyé. Nolu deddína opín-buang ami kídíem ikumyé, delokke buluke momín-pamínlok paanam gumí-dogíng kídídem, taleng kuppo sokke Ruutum, ngokkelo nolu bomabipe aiyé.”