MIKAH 2 - DEENA BAIBÉL (BSI)

Opanem Irééna Buluke Yéyine

¹ Séko bulu isi-siyo ipenamem buluke ippulo ketdola, míírung-ruutí dudí, delokke atímana agérlo míítí goodudí, bulukíng gérmange kayé. Edílo roh angune ngunlenyédí, delo buluke míírung-irung bomnam isi-siyo atímana deme bulu ilendung, kapeila dekepe inane buluke alaglo duusudung.

² Bulu edílo arík kídíem kaaboyédí, delo dekedem bulu roddo; edílo bulu ekum kídíem míídodí, dekedem bulu laado. Ingkon amike ekum-erangem, demangkom ekuserang kídíem bulu kelok ipítlamato.

³ Dekepeila Ruutum bí podung, “Ngo noluke teyolo botteruna adírem laalíkpe míírudung, delokke delok nolu agíem mopí sulamayé. Nolu agíem ebín aralo yédope kaapasuyé, delokke nolu kekímrupe míísula magooyimayé.

⁴ Edílo de longe de pííyédí, ami kídíe noluke legangem botteruna adírem luyisunana dooyingpe pogela, bulu noluke yénamlo paanam sim pengé miripe gogyé: “Ngolu apíírupe nyokkai! Ruutum bí ngoluke among kídíem langkut bila, ngolume umnyoknalo ngoluke arík kídíem panlíkkai.”

⁵ Dekepeila, among-asidem Ruutum ke ami kídíem bilat sudíkue edílo pííyédí, delo noluke séko kepeteng tarong kakumayé.

⁶ Ami kídíe ngome ngiitom dola, “Ngolume ngiitom tommapeka. Dekena legang kídíem ngiitom mapeka. Shédí bí ngolume annyingem paamomayé.

⁷ Israel lokke ami kídíe béélíknam arang kolo duudung emla no míídunía? Ruutum kelo jémgapname kaimanía? Bí sikena agér kídíem arorupe iyénía? Bí ayang agomlok, aroem igena kídíem pomanía?” emla podung.

⁸ Ruutum bí poyansudung, “Nolu miru kídí lokke kísape ngokke ami kídíem aabomdung. Ami kídíe mimaklok ekumlo mopísula duuyé emla aalat sudungku. Idola delo nolu, buluke lamku kídílok buluke ege-galugem rotkutpe toyadung.

⁹ Nolu ngokke ami kídí lokke mime kídíem buluke míísula eetetpe duusuko ekum eranglok monpak bidung, delokke agínpe ngokke utepooro kídíem buluke ome-oo kídíe paayimadope nolu rotbíndung.

¹⁰ Gerepto, delokke gílangka; so nokke duusi supeko kamang. Sim moolop sim nokke paab kídíe ibít-ikatla nyoknamlo aamotung.

¹¹ “Si ami kídí si menam kídí emla tatmem sumopena kídíem megoo-yatgoo dola, ‘Apong elang kedíkna tííname nolukepe biibiyé emla ngo polu-poor bidung,’ emna kaalu miriem bulu míídung.

¹² “Idola duudung adana Israel ami kídí takam nolum ngo berokrupe laadum suyéku. Ngo nolume guallo mére aadum sukunam kísape, laadum suyéku. Neyang kako amolo mére alung-abampe yénam kísape, noluke among sime lekoda amie milu-mibampe ibomyéku.”

¹³ Shédíbí bulukepe bedangem iyabila, monnyoknam lokke bulume gílen boyéku. Bulu luunelok yabgo lamgé kídíem bénpak pala, delokke asarpe gílen yéku. Buluke roja, Ruutum agísue, bulume gílen boyéku.