MATI 8 - DEENA BAIBÉL (BSI)

Amikonem Jisuke Ipíkuname

¹ Bíkke díítelok oidokuem deddína amie bíkke méélamlo mamín getoku.

² Delo tíídna amiko aala bíkke keralo peladola poto, “Ruutum, nokke míísang emílo, no ngom ipíyéku”.

³ Jisu bí agí alage meetandola amidem ukkídola poto, “Ngo míídung, deetolangku”. Menang asak ami delok tííd kiname aikaku.

⁴ Delo Jisu bí amidem poto, “Tattola, sékomete pomapeka idola jonnampe Mirilo gíla bím kaamo toka delokke nokke aikunamem lengkan nape Mosike ponampe amanem bilangka.”

Rom Amolokke Migom Béérang konem Jisuke Ipíkuname

⁵ Edílo Jisu bí Kapernaumlo píítodí, delo sipaying ruutum kone bíkkíng aala, igul koto.

⁶ Bí pokai, “Ruutume, Ngokke béérange ekumlo gíkén yimape keddung delokke pesorupe kidung”.

⁷ Jisu bí bím poto, “Ngo gíla bím ipíyé”.

⁸ Delo sipaying ruutum de pokai, “Ruutume ngo nom ngokke ekumlo aamopeteng annyisue idung. Depe iname agom atel petomko pobiyika delo ngokke béérange ekeryéku.

⁹ Kapeila ngo agíete ami rumkílo dung; ngokke rumkí loteng sipaying kadung; ngo akonem ‘gíkaala’ emmílo, bí gído; delokke akonem ‘Aato’ emmílo, bí aado. Delo ngokke béérangem ‘Sim ilangka’ emmílo bí dem ido”.

¹⁰ Edílo Jisu bí dem tattodí, delo bí sai “emla” míídola bíkkíng gímín gena kídíem pokai, “Ngo nolum aro rupe podung, Ngo Israel aralo sikepe míngkeng edíína atel kokom kaapamang.

¹¹ Ngo nolum podung, bosie sanggo loklang anggo danlok aala, teyong amonglo Abraham, Isaak delokke Jakob bulum duubosula doomanlo dobosuyé.

¹² Idola among delokke ami kídíem luyulo, kaamo ruruklo yoppakyé, delo iipangem koteksula kapnam ríínam mílípe iyé.”

¹³ Delok rongem Jisu bí sipaying ruutum dem poto, “Gíka langku! Nokke arope iyé emla míínam kísape iyé”. Delo béérade delopak aikaku.

Jisuke Bosi-borang Amiem Ipíkuname

¹⁴ Edílo Jisu bí Pitorke ekumlo aatodí, delo bí Pitorke ayo anem ippulo kisala keddope kaato.

¹⁵ Bí bíkke alagem ukkí toname ramnam kiname nyokkaku, delo ayo anede bím ibo saabokupe emla gereptoku.

¹⁶ Adenge pííyédem, urom duubomnam ami kídíem bíkkíng bojéko bomabito, delo bí urom kídíem agomlok lupak langkula, kina takamdem ipítoku.

¹⁷ Shédíke Kaaluna miri Isaiahke ponam agomem aromope emla depe ikai, “Bí ngoluke deemangem laanyok bito, delokke ngolum kimona kídarem bomnyokbito.”

Jisukíng Gímín Genam Are

¹⁸ Edílo Jisu bí bíkkíng gígoo mínna ami kídíem kaasutodí, bí sine rotkondelo koodope lulíkto.

¹⁹ Delo ukilkone bíkkíng aala, poto, “Babue, no ingkolo gíyédí, ngo nokkíng gímín gepe.”

²⁰ Jisu bí poyansuto, “Ménsurungke arung kado delokke pettangke asup kado, idakkom Tanike Ue bíkke dumpongem ingkolote leepeko kamang.”

²¹ Delo luyilsuna akone pokane, “Ruutum, ngom kerape gímo langkula ngokke abuem yumopoyika.”

²² Idakkom Jisu bí bím poto, “Ngokkíng gímín getola, delokke sina kídíem agí agí simangem yusu motoka.”

Jisuke Gumnam Asarem Eetet Mokuname

²³ Delokrongem bí etkungdelo aato delo bíkkelo luyilsuna kídíete bíkkíng gímín geto.

²⁴ Delo gumgíng kamarupe sine paatang delo séngéépe gumname ila, delo etkungde sipyardelo kuppé kupléla ikai. Depe iduemte Jisu bí ipla dooto.

²⁵ Luyilsuna kídíe gíla bím utrepdola poto, “Ruutume, ngolum mopítoyi! Ngolu nyok dakbong!”

²⁶ Bí pokai, “Míngkeng pííramna kídí nolu, kapeila deddípe pesokane?” Delo bí darep langkula gumnam asar demlang sipyar dem luto, delokrongem de eetet kaku.

²⁷ Ami kídí de kapei emla íngkíbosuto, “Si kapena amikoi? Asarelang sipyarete bíkke agomem tatbito!”

Urom Duubomnam Annyikonem Jisuke Ipíkuname

²⁸ Edílo bí rotkonlo Gedaren amolo píítodí, delo urom duubomnam ami annyiko ago kídarlok lenla bím ríksuto. Bulu írmí ormo iname sékote delok bedang delok gítakna kamato.

²⁹ “Shédíke Ue, no ingkoko ngolum ipe míídune?” emla bulu gokkai. “No ngolum moodíe píímang adape iréékape emlangía aadune?” emla pokai.

³⁰ Depe iduem buluke yéko delokke mooteng gamlo yékbamko dotala yéto.

³¹ Urom kídíe Jisume “No ngolum monpak kupemílo, ngolum yékbam elo melíktola,” emla roguto.

³² Bí bulum “Gílangka” emto. Delo bulu gílen langkula, yékbam delo gíto, delo yékbam tabude sine robengkíng dukboo danla, asidelo olíkla siyinkai.

³³ Éék kaabomna kídíde duklangkula taondelo angkaku delo sim inam takam simlang urompe tumna ami kídí delokke legangemte pokan bitoku.

³⁴ Delokrongem taon tabung delokke amie Jisume kangkíkape emla gílento. Delo bulu bím kaayédem, buluke amolokke gígéé dokupe bím roguto.