MATI 3 - DEENA BAIBÉL (BSI)

Joan Baptist

¹ Depe yédudelo Joan Baptist emnamko aala Judia lokke mooruk amolo gogyito.

² “Míílat sulangkuka, legade teyong amonge mongnyokai” emla pokai.

³ Simin sékoke legangem Kaaluna miri Isaiah kelok potudíde: “Mooruklo gogyinake agome; ‘Ruutumke bedangem iruulangka, bíkke bedangem jonmo langka.’ ”

⁴ Joanke egede uut simon amídlok inameke, delokke bí ugílo uugem ayolok getuai. Bíkke dotkéde takom tarie delokke tangut alange,

⁵ Jirusalemlok, takam Judialok delokke Jordan ayirlokke amikídíe gíla bíkkelo aato.

⁶ Buluke paabem pobeng sukolok, Jordan korolo bí bulum baptis ito.

⁷ Dekom Pharisi elang Sadduki kídílokke bojéko bíkke baptis ikolo gínamem kaala, bí bulum sikepe poto, “Nolu tabí opín kídía! Yépenam mardí longe lokke duknyok yépe emla nolum séko potune?

⁸ Noluke paab lokke mooteng kunana agérem ilangka.

⁹ Delo nolu agísue ‘Abraham bí ngoluke abue’ emla míírí sumapeka. Ngo nolum podung, Shédíbí sok dabu kídar sokte Abrahamke uem pílen bilayé.

¹⁰ Esing lerííso egíngem leelík tubong, delokke ingko ingko esinge aina ayé éémadudí beela emelo romyé.

¹¹ Aang míílatsuna pemin ngo nolum asilo baptis idune. Idakkom ngokke méélamlo aapena bímin ngompenem ralyane; ngo bíkke leyuk emte bombang bimane. Bí nolum Deena Aidlokla emelok baptis iyé.

¹² Bíkke epode bíkkelo duuyardung, delokke bí bíkke aamem deedope kabbínyé, aam agíem bíkke kumsulo gesiiyé, idola amyangem miyyimana emelo romyé.”

Jisuke Baptis Isuname

¹³ Delokrongem Jisu bí Galil lokke Jordanlo Joanme baptis ikosupe emla bíkkíng anggeto.

¹⁴ Idola Joan bí luya sudola sikepe poto, “Ngomin nokkíng baptis isupene, depe ilate no ngokkíng aalat gedung.”

¹⁵ Idola Jisu bí poyansuto, “Supak dekepe ipootoka. Kapeila sikeru pemin Shédíke míínam takamem ipe aiyéne.” Delo Joan bí tolíkto.

¹⁶ Jisu bí baptis isurodem asilokke menape lentoku. Delopak teyong eyabe siyyato, delokke Shédíke Aide pekí kísape tokla bíkke teyolo unaadope kaato.

¹⁷ Delo teyong telok “Si ngokke ayaru sunam Ue, bíkke teyolo ngo mííyum sudung” emna agomko polento.