MATI 26 - DEENA BAIBÉL (BSI)

Jisume Míírí Míínyo Bomname

¹ Jisu bí sim takamsim poyin yédem, bíkkíng luyilsuna kídídem poto,

² “Nolu kéndung, Gíbong gíídí loonyiko dungadape Tanike Uem pansaadope melíkyé.”

³ Delokrongem mirí ríne kídíde delokke Kaiapha emnam ríne ruutum kebang ekumlo dumsuna miro kídíe,

⁴ Jisume umsupla petpe emla pínbomkai.

⁵ Bulu pokai, “Doman longelo imangkom; depe imílo ami kídíe ebínpe ibomyé.”

Bethanilo Jisume Tél Nyooname

⁶ Jisuke Bethanilo, tííd gena Simon emnam ami ekumkolo duudungem

⁷ mimekone tema bíínakope arekana delokke nampona télko bomla Jisu bí dola duudungem bíkke dumpolo pílíkto.

⁸ Luyilsuna kídíde dem kaayédem, bulu kangkie ito, “Kapei sikepe pípakdune” emla bulu tatkíto.

⁹ “Sim nampona atí sim are kadope kola, murkongem opan kídílo bilatuai,” emkai.

¹⁰ Jisu bí bulum potumdola poto, kénsu topíam, “Nolu kapeila sim mime sim kangkikane?

¹¹ Opande nolum agínpe duuyar bosuyé idakkom nolu ngom agínpe duubo suyimayé.

¹² Bíkke sim nampona tél sim ngokke amílso pílík namde, bí ngom yupenamem iruutung.

¹³ Ngo nolum aruem podung, ingkolo sim tatpona ngiitom sim tani among tabuso pogooyédí bíkke itonam simkom bím míípang sunape pobiyé.”

Judaske Jisume Mirulo Yadlíkpe Emla Tolíksuname

¹⁴ Delokrongem midum íying kolang annyi lokke akonde Judas Iskariot emnamde miri ríne kídílo gíla

¹⁵ pokai, “Ngo bím nolukíng melíkmílo nolu ngom ingkoko biyéne?” Delo bulu bím balying angumko bipe emla lubosuto.

¹⁶ Delokke ilangala Judas bí bím mirulo yadlíkpe emla míílenkai.

Jisuke Luyilsuna Kídíem Gíbong Gíídílo Dotké Dobosuname

¹⁷ Siiyé líkmanam ettíng gíídí longedelo luyilsuna kídíde Jisukíng aala, íngkíto, “Ingkolo no ngolum nom gíbong gíídí aran dobo supekuem irung sarudope míídon?”

¹⁸ Bí poyansukai, “Taonlo amikolo gíkala bím potoka, ‘Babue podung: Ngokke moodíe píídakbong. Ngo nokke ekumlo ngokkelo luyilsuna kídíem lekope Gíbong gíídí aranem ipe.’”

¹⁹ Dekepe iname Jisuke pokampe luyilsuna kídíe gíla Gíbong gíídí aranem iruuto.

²⁰ Yume iyédelo, Jisu bí íying kolang annyi dem tébullo dotké dobo sudungai.

²¹ Delo buluke dobo sudungem, bí pokai, “Ngo nolum aruem podung, nolu akone ngom mirulo yadlíkyé.”

²² Bulu buulínge ito delokke mipile bím pokai, “Ruutum ngom lumanía?”

²³ Jisu bí poyansuto, “Ngom ekulo ettíngem níngnyom bosuna demoko ngom yadpenade.

²⁴ Tanike Ue Kitablo atbinam kísape siyé. Idola Tanike Uem yadpena amide gérmang daklangka! Bím omatuamílo bíkkepe aiyatuai.”

²⁵ Delokrongem bím yadpena Judas bí “Babue de ngomangía?” emto. Jisu bí “E, nomape” emto.

Probubuj

²⁶ Buluke dobosudo delo, Jisu bí ettíngem laala, yidgepala, dem pento, delokrongem dem bíkkíng luyilsuna kídíem sikepe podola bulum orto, “Laala dolangka, si ngokke amíl adíne.”

²⁷ Delokrongem bí batiem laala yidgeto delokrongem dem sikepe podola bulum orto, “Nolu takame sok tíílangka.

²⁸ Si paab kídíem maab bikunape takamlo pílík binam ngokke daapong iyyie.

²⁹ Ngo nolum podung, ngokke Abuke amolo anípe nolum tííbo sudíku longe píímang tetengem ngo supak kelokke sim onggur alang sim tíípong yimayé.”

³⁰ Bulu miriko gokto, delokrongem Olib díítelo gílento

Pitorke Possunamem Jisuke Pokan Biname

³¹ Delokrongem Jisu bí bulum poto, “Siyumke yume so ngokke legalo nolu takame dukpansuyé, sim sikepe attung: ‘Ngo mér sobén kaabomnem demyé, delokke mér bénbamde dukpansuyé.’

³² “Idakkom ngokke gerep rongkuem, ngo noluke kerape Galillo gíto suyéku.”

³³ Pitor bí poyansuto, “Nokke legalok takame dukpan sudokom, ngodan depe edílokom imayé.”

³⁴ Jisu bí poyansuto, “Ngo nolum aruem pobidung, siyoh peroge kokmang adape, no ngom lengum kokai kénmang emla possuyé.”

³⁵ Idakkom Pitor bí poyansukai, “Ngo nom sibo sudokom, ngo dekepe pomayé.” Delo luyilsuna abíd takam deteng akampe poto.

Jisuke Gethsemanilo Kumsuname

³⁶ Delokrongem Jisu bí bíkkelo luyilsuna kídíem gíbosula Gethsemani emnam amongkolo gíto, delo bí bulum poto, “Ngo elo gíla kumdungem so duupotoka.”

³⁷ Bí Pitor melang delokke Jebedike oo annyiem lekope gíbosuto delokke buulínge ila míídírsue ilenkai.

³⁸ Delo bí bulum sikepe posukai, “Ngokke ainasi buulínge séngéé dune bengale sita simang idung. So duula nolu ngom darbo sulangka.”

³⁹ Anyongko gígeyéla, bíkke mingmue amolo gubala kumto, “Ngokke Yayie, paklayémílo, sim bati sim ngokke lokke langgé toyika. Depe idokom ngokke míínammang, nokke míínam emino.”

⁴⁰ Delokrongem bí bíkkelo luyilsuna kídílo aalat kuname bulum iptapdupe kaato, “Nolu gonta atel emte ngom darbo sulamanía?” emla bí Pitorme luto.

⁴¹ “Dardula kumtola demílomin nolu ikang darkaalo olíkmayéne. Aidde míídungai idakkom amíle bengaldung.”

⁴² Bí lennyinape gílangkula sikepe kumto, “Ngokke Yayie, sim bati sim ngo tíímadope laabín kanmamílo nokke míínampe idak langka.”

⁴³ Bí gílangkula kaaname, bulum iptap dokupe kaato kukéng, kapeila buluke amig kídare tebege idungai.

⁴⁴ Dekepe iname bí bulum mepala lekoda gílangkula lengumnape kumnam atelem kumtoku.

⁴⁵ Delokrongem bí bíkkelo luyilsuna kídídelo gílat langkula bulum luto, “Nolu supakpete ipman dooman dunía? Kaatola, moodíe anínkai, delokke Tanike Uem paabna ami kídílo yadlíkdak.

⁴⁶ Dareptola, gílape! Sina ngom yadpene píídune!”

Jisume Umname

⁴⁷ Bíkke pongo dungadape, midum íying kolang annyi lokke akon Judas bí píído. Bím gíbosune, rínekídí elang mirokídí melíknam gíníng yoksa bomna mibamko.

⁴⁸ Delo yadnade bulum ruuyilbito; “Ngokke gomrík sunam ami simoko; bím umtopíam.”

⁴⁹ Jisukíng jonnampe aasémla, Judas bí poto, “Babue, salam!” delo bí bím gomríksuto.

⁵⁰ Jisu bí poyansukai, “Angong kídía, nolu ingkuem aabomdudí ilangka.” Delo ami kídíde gíala Jisume umla alagem yééto.

⁵¹ Delo Jisukíng yémín gena akone yoksem satsula miri rínelokke béérang nyorungem papakto.

⁵² Jisu bí pana amidem luto, “Yoksadem sobuklo íklík sutolangku, kapeila yoksem satsula beleena takamde yoksalo siyéku.

⁵³ Ngo ngokke Abuem tomla, delo bí íying kolang annyi teyong kotoki sipayingem bojéyangko ngom menape mopít dokupe ilamang emla míídunía?

⁵⁴ Idakkom depe imílo, si sikepe iyérung emla dooying kitablo atnam si kape kísa aroyéne?”

⁵⁵ Depe iduem Jisu bí mibamdem luto, “Ngo ebín agér gérbonakua nolu yoksa gela, singgil bomla ngom umkape aadune? Loodí mipíem ngo kumkeng ekumlo luyil poyilla duuboto, delo nolu ngom ummang.

⁵⁶ Idakkom si takam si kaaluna miri kídíke atname apíídope ikai.” Delo luyilsuna kídí takame bím mepaktola duknyok gekai.

Jisuke Kebalo Dakname

⁵⁷ Jisume umna kídíde bím ukil kídí kelang miro kídíke dumsuko, ríne ruutum Kaiaphakíng bomato.

⁵⁸ Depe iduem Pitor bí mootepe bíkkíng gímín gela, ríne ruutum gurang deloope píímín geto. Bí aala sontori dungko delo kapepak iyédí dem kaape emla duuto.

⁵⁹ Ríne kídí delang kebang baane tabude Jisume petdope menamlok bím aknape emla hakii agom matadungai.

⁶⁰ Deddíne menamlok hakii bina amie kerang kerang aatuai, idakkom bulu atírung akpenam paamang, Méélam yalumpe ami annyiko lenla

⁶¹ pokan lento, “Si ami si sikepe potuai, ‘Ngo Shédíke kumkeng ekum sim benpak geyéla sim longumlok moladoku.’ ”

⁶² Delo ríne ruutumde darepla Jisume poto, “No poyan subi mayénía? Sok amikídí sokke nokkíng ajéng luket líknam si ingkue?”

⁶³ Idakkom Jisu bí agom poyan sumang. Delo ríne ruutumde pokai, “Ngo turna Shédíkíng pésudola nom ludung. No Shédíke Oo Kristomílo ngolum posutola.”

⁶⁴ “E, de nokke ponamde” emla Jisu bí poyansudola pokai, “Idakkom ngo nolum takamem pokandung; yépenam longelo Tanike Uem Ralna Shédíke lakbíklo duudope delokke bím taleng telo doomuglok aadak kupe nolu kaayé.”

⁶⁵ Delokrongem ríne ruutumde marlílok agí egem bédsudola pokai, “Bí Shédíme lungilnam agomem podung! Ngolu ingkona hakii yangko míídun? Tatsutola, nolu supak Shédíme lukaa namem tattobong.

⁶⁶ Nolu kape míídun?” “Bí sibadung” emla bulu poto.

⁶⁷ Delokrongem mingmolo bulu takil suklum pala Jisume demto. Abíde bím pidola

⁶⁸ pokai, “Kristo, ngolum posutola, séko nom kíttone?”

Pitorke Possuname

⁶⁹ Supak Pitor bí gíídanglo dungai. Depe iduem mime béérang annyiko bíkkíng aala poto, “Nokom Galillo duuna Jisukíng yémín geto.”

⁷⁰ Idakkom bí buluke takam keralo de mename emsuto. “No ingkuem podudí ngo kénmang” bí emto.

⁷¹ Delokrongem bí etor eyab delo gílen dakkuem mimekonko bím kaala delo yéna ami kídídelo pokanbito, “Si ami si Najareth lo duuna Jisume yébo sudungai.”

⁷² Bí pésudola possu tokukéng, “Ngo dem amidem kénmang!”

⁷³ Anyongko doorongem, delo dakna kídíde Pitorkíng gínínla pokai, “No buluke aralokke akonrunge, kape ila nokke gomukde nom tanngu sumodung.”

⁷⁴ Delokrongem bí agíem pélík sudola buluke keralo poto, “Ngo dem amidem kénmarung!” Dekepe idopagem peroge kokkai.

⁷⁵ Delo Pitor bí Jisuke sikepe pobitonam agomdem míípang sutoku: “Perok kokmang adape no ngom lengum kokai possuyé.” Delokrongem bí luyulo gílen langkula ríríng emla kapsutoku.