MATI 25 - DEENA BAIBÉL (BSI)

Mime Íyingkolo Luyiisuname

¹ “Dekepe iyédelo teyong amode, agí agí meruem bomla makbuem gírík sukape gílenna mimum íying kísa iyé.

² Pilngode míírusuma neke delokke pilngode mííru suneke.

³ Mííru sumana kídíde buluke meruem bomtuai idola tél atí bomtak sumang.

⁴ Míírusuna kídí dedan gílenla agí agí télem bomtaksula meruem bomkai.

⁵ Delo bulu immiyé ila ipto.

⁶ “Yoh raajang delo ‘Sina makbue píídune! Bím gírík sutola’ emla ebínpe mankai.

⁷ Delo mimum takamde darepkai delokke agí agí meruem nyotkai.

⁸ Mííru sumana kídíde míírusuna kídídem, ‘Noluke tél ayokonem bisui; ngoluke merue middakbong’ emto.

⁹ Bulu ‘Bisulamang, nolu kepelang ngolu kepe pííramyé. Dempenem télkona kídílo gíkala nolu agí agí kepe resu tolangka.’ emto.

¹⁰ Idakkom bulu tél repe emla bedalo ennge sudungem, makbode pííputo. Míírusuna nyamne aro kídíde bíkkíng nyamranlo aabosuto. Delo eyabem sittumto.

¹¹ “Méélamdem abíd dete píídakku. ‘Migome! Migome, ngolum eyabem siyya bikui’ emla bulu gokto.

¹² Idakkom bí poyansukai, ‘Ngo nolum aruem podung, ngo nolum kénmang.’

¹³ “Delok legape ansulangka, kapeila aadíku longem, gontem nolu kénsumang.”

Béérang Angumkolo Luyiisuname

¹⁴ “Lekoda, teyong amode amikone mibolo endakla, agíke béérang kídíem tomla bíkke sérangem bulukíng melíknam kísape idung.

¹⁵ Akondem bí murkongem jarngoko bito, akondem jarnyiko bito, delokke akondem éjarko bito, mipildem mipil adulok bito. Delokrongem bí mibolo enkai.

¹⁶ Jarngoko paanade menape gíla bíkke poisar delokke agér gérname jarngoko paapek lento.

¹⁷ Dekepe jarnyi paana deteng jarnyiko paapek lento.

¹⁸ Idakkom jartel paana amide gílenla, among aralo deerungko koola delo bíkke ruutumke abalem yunyokto.

¹⁹ “Oolko doorongem delok béérang kídí delokke ruutumde enang langkula bulum isabem ibosutoku.

²⁰ Jarngo paana amide jarngo konko bomato. Bí pokai, ‘Ruutume no ngom jarngoko bila melíkto. Kaasutola, ngo jarngo konko paapekto.’

²¹ “Bíkke ruutumde poyansuto, ‘No aina delokke míngkesuna béérange, airudo! No anyongo atílok míngkesupa; ngo nokkíng atí takamem melíkyé. Aatola, delokke no nokke ruutumke ashéngkolo ashéng mínlangka!’

²² “Jarnyi paanade angkai. Bí pokai, ‘Ruutume, no ngom jarnyiko bila melíkto; kaasutola, ngo jarnyi konko paapekto.’

²³ Bíkke ruutumde poyansukai, ‘Aina delokke míngkesuna béérange, airudo. No anyongo atílok míngkesupa; ngo nokkíng atí takamem melíkpe. Aatola, no nokke ruutumke ashéngkolo ashéng mínlangka!’

²⁴ “Delokrongem jartel paanade aato. Bí pokai, ‘Ruutume, ngo nom míngkam keramna amiko, nokke kuujéng mangkolok no ali gatkunako delokke nokke pidjé mangkolok giidum sunako emla kénto.

²⁵ Depeila ngo pesola, gíla nokke abalem among aralo mesiito. Kaasutola, sina nokke abale.’

²⁶ “Bíkke ruutumde poyansukai. ‘Atímana loobakna bééra no! Ngokke kuujé manam aliem ngo gaddokupe delokke pidjé manam amliem ngo giidum sudokupe no kéntonía?

²⁷ Demílo, no ngokke poisarem bénglo melík penamíai! Delo ngokke aalat yékuem ngo ngokke laabem paatak suyékuai.

²⁸ Éjar murkodem bíkkelok laalangkula jarying kana amidelo bitokuka.’

²⁹ Legade séko kadudí bím bojéyape biyéku, delo bí jéyé. Séko kamadudí, bíkke kanam anyong emteng bíkkelokke laabín yéku.

³⁰ Delokke ‘dem loorímana bééradem luyulo kaamo ruruklo yoplíkto, delo kapnam ríínam mílí delokke iipange koteksuna mílí iyé.’

Iyinnana Bisare

³¹ “Edílo Tanike Ue angun ralnamlok aayékudí, delokke teyong kotoki takame bíkkíng aabo suyékudí, delo bí angun kanarung teyong amolokke palenglo duuyé.

³² Opín takamem bíkke keralo goodumsuyé, delo ami kídíem mér kaabomne mér sobén kídarem sobén kídar lokke langusunam kísape bí akonlokke akonem langu suyéku.

³³ Mér sobénem bí agí lakbík danlo delokke sobén kídíem bíkke lakké danlo meyé.

³⁴ Delokrongem Rojade lakbíklo duuna kídídem poyé, ‘Aatola, nolu ngokke Yayike lubéélíknam kídíe; noluke dungko tarongem tani amongem pílendak delokai nolukepe meruubinam amongem laalangka.

³⁵ Kapeila ngokke kenola yédungem nolu ngom dope namem bito, ngokke tíílíla dungem nolu ngom tíípenamem bito, ngokke mibope endungem, nolu ngom dobo tomto,

³⁶ ngokke mílípe yédungem nolu ngom ege galugem bito, ngokke kila duudungem nolu ngom kaabomto, ngokke pateklo duudungem nolu ngom kangaato.’

³⁷ “Delokrongem yéjina kídíde poyansuyé, ‘Ruutume edílo ngolu nom donam bidope, kenodope kaatone, demangkom tíípenam bidope nom asi tíílídope kaatone?

³⁸ Edílo ngolu nom dobo tomdope. no mibope endope kaatone, demangkom ege galuk píllíkdope nom arape yédope kaatone?

³⁹ Edílo ngolu nom kangaadope no kidope demangkom pateklo duudope kaatone?’

⁴⁰ Rojade pobiyé, ‘ngo nolum aruem pobidung, nolu ingkuem sim amé yalumna ngokke bírokídí sim ibitodí, nolu ngomkom ibito.’

⁴¹ “Delokrongem bíkke lakké danlo duuna kídí dem bí poyé, ‘Nolu uyu kepelang delokke uyu kotoki kepe iruubinam, miyyimana emelo béélíknam kídí nolu ngokke lokke gígéétoku.

⁴² Kapeila ngokke kenola duudungem nolu ngom atí dopenam bimato; ngokke tíílíla yédungem nolu ngom tíípenam bimato,

⁴³ ngokke mibope yédungem nolu ngom dobo tommang, ngokke mílípe yédungem nolu ngom ege galuk píllík mato, ngokke kila delokke pateklo duudungem nolu ngom kaapatmato.’

⁴⁴ “Bulukom poyansuyé, ‘Ruutume, nom kenodope demangkom tíílídope demangkom mibope yédope demangkom mílípe yédope demangkom kila duudope demangkom pateklo duudope kaatola, ngolu nom edílo igulmape itone?’

⁴⁵ Bí pobiyé, ‘Ngo nolum aruem pobidung, ingkuem nolu sim aména kídíkepe imatodí, nolu ngomkom ibimang.’

⁴⁶ Delokrongem bulu nyokyimana ingéékolo gíyé, idakkom yéjina kídí dedan turyar pekolo duuyé.”