MATI 22 - DEENA BAIBÉL (BSI)

Nyamranlo Luyiisuname

¹ Jisu bí lekoda bulum sikepe luyiisunam agomko potoku:

² “Teyong amode rojakone agí oo nyamran legape iruu saarunam kísadung.

³ Bí agíke béérang kídíem nyamranlo goknam ami kídíem aadope potoka emla melíkto, idakkom bulu aalímang emkai.

⁴ Delokrongem bí béérang aluyangko melíkdola pokai, ‘Tomnam kídíem ngo nyamranem itubong, ngokke unarung runem ranmík tubong, delokke takamem iruu tubong, nyamranlo aalangka emtoka’ emla políkto.

⁵ Idakkom bulu atí tatbimang delokke ennyokai, akone agí aríklo, akone agí paata dotalo gínyokkai.

⁶ Abíde bíkke béérang kídíem umla, ipu siléé pala bulum mokato.

⁷ Rojade séngéépe markai. Bí agí sipayingem melíkla mokana amikídíem petyin geyéla buluke dungko taondem rompakto.

⁸ Delokrongem bí agí béérang kídíem poto, ‘Nyamranem iruu tubong idola ngokke tomnam ami kídíe so aape maneke.

⁹ Bedalo gíkaala noluke kaanam kénnam takamem nyamranlo goktoka.’

¹⁰ Delo béérade bedalo gíla edítko paklayédí ami kídíem, ainem delokke aimanem, gokdumsula iname nyamran ekumde mibo mílí bííbomkai.

¹¹ “Idakkom rojade mibo kídíem kaayédem, amiko nyamran ege gemanako bí kaapato.

¹² Bí tatkíto, angonge, nyamran ege gemape no kape kísa so aatone? Amide agom atírung pomang.

¹³ Delo rojade ibi saabina kídíem lulíkto, ‘bím alagemlang alem yééla luyulo kaamo ruruklo yoplíktoka, delo kapla rííla delokke iipange koteksula duuyépe.’ ”

¹⁴ “Legade tomname bojéko toname anyongko.”

Kajanang Binam Legangem Íngkíname

¹⁵ Delokrongem Pharisi kídíe gílangkula bíkke agomlok bím língkitlok gakpe emla míírusuto.

¹⁶ Bulu buluke luyilsuna kídíem Herodia kídíem lekope bíkkíng melíkto. Bulu pokai, “Babue, no Shédíke bedangem poyil bodung dem ngolu kéndung.

¹⁷ Demílo, nokke míínamem ngolum potola? Kaisarme kajanang binamde bibaa namkua ma, bibaa manamkua?”

¹⁸ Idakkom Jisu bí buluke atímana aapíem kaala pokai, “Nolu aromana kídía! Nolu kapeila ngom língkitlok gakpe emla idune?

¹⁹ Kajanape bipenam poisarko ngom lengkantola!” Bulu adoliko bím laabito,

²⁰ delo bí bulum poto, “Sékoke mimange si? Delokke sékoke amíne si?”

²¹ “Kaisar” emla bulu pobito. Delo bí bulum poto, “Kaisar kedem Kaisarme bitoka, delokke Shédí kedem Shédíme bitoka.”

²² Bulu dem tayyédelo kapei emla mííto. Depeila bulu bím mege yéla gítoku.

Sinakídí Lokke Gerep Kunam Legangem Íngkíname

²³ Delo longedelo gerep kunamde mename emna Sadduki kídíe, bím íngkí bengkípe aato.

²⁴ Bulu pokai, “Babue, Mosi bí ngolum sikepe poto milue ome-oo kamape siyémílo, bíkke bírue meyédem laalangkula bíkkepe ome-oo okupe aido.

²⁵ Ngoluke aralo bíro kumsu kínítko kato. Abíyalumde méng laatuai idokom sikai, delokke bí ome-oo kamape siname, bí agíke méngem bíkke bírolo mebito.

²⁶ Deke akampe annyi napena delokke angum napena, delok ilangala kínít napena deloope depe ikai.

²⁷ Méélam yalumpe mimede sikai.

²⁸ Supak demílo, sina kídí lokke gerep yékuem sékoke méépe bí iyékune? Takamde bím méépe ito.”

²⁹ Jisu bí poyansuto, “Nolu míímul sudung kapeila nolu dooying kitabem demangkom Shédíke ralnamem kénmang.

³⁰ Sina kídí lokke gerep yékuem amikídíe mime milo laabo sumayé; buludan teyong kotoki kísape iyé.

³¹ Idakkom sina kídílokke turlat kupenam legangem; Shédí bí nolum kape emtudí dem nolu porikímanía?

³² ‘Ngomin Abrahamke Shédíe, Isaakke Shédíe, delokke Jakobke Shédíe.’ Bí sina kídíke Shédímang idakkom turna kídíke Shédíemin.”

³³ Mibamde dem tayyédem, bulu bíkke luyilnam em talla sai emla míngkai.

Bottena Ngiitome

³⁴ Jisuke Sadduki kídíem pokum namem talla, Pharisi kídíe leko bosukai.

³⁵ Ayonlo kénna akonde bím ankangkípe emla sim agomsim íngkíto;

³⁶ “Babue, ingkuei ayon lokke ngiitom botte yalumne?”

³⁷ Jisu bí poyansuto, “‘Nokke Ruutumme nokke aang tabulok, nokke aid tabulok delokke nokke aapí tabulok ayalangka.’

³⁸ Simin kerayalum delokke botte yalumna ngiitome.

³⁹ Delokke annyinape nade si: ‘Nokke kumríem agí kísape ayalangka.’

⁴⁰ Takam ayonde delokke kaaluna miri luyilde so ngiitom annyiso dungke sudung.”

Messiahke Legangem íngkíname

⁴¹ Pharisi kídíe dumsu yédem, Jisu bí bulum íngkíto,

⁴² “Nolu Kristome kape kape míídune? Sékoke ue bí?” “Dabidke ue” emla bulu poyansukai.

⁴³ Bí bulum poto, “Demílo kapeila Dabid bí Aidlok poyém, bím ‘Ruutum’ emla gokkane? Legade bí sikepe poto,

⁴⁴ “ ‘Ruutume ngokke Ruutumem poto, Ngo nokke miruem nokke lepyo rumkílo yédope ima tetengem Ngokke lakbíklo duulangka.’ ”

⁴⁵ Dabid bí bím “ ‘Ruutum’ emdumílo, bí kape kísa bíkke oope iyéne?”

⁴⁶ Sékote bím gompil koteng poyansukén mato, delokke delok longe delokke ila sékote bím agom íngkítope emla ilana kaimang.