MATI 12 - DEENA BAIBÉL (BSI)

Sabbath Legangem Poboname

¹ Depe iduem Jisu bí Sabbath nyodo longem arík raadalok gíto. Bíkkelo luyil suna kídíe kenue ikane ambeng ayoko yirla doto.

² Pharisi kídíe dem kaayé delo bím sikepe pokai, “Kaasutola, nokkelo luyil suna kídíe Sabbath nyodo longelo ipemanam agéreke idung”.

³ Bí poyansukai, “Dabidlang bíkke gíbo sunam kídíe buluke keno duem kape ituadín deme nolu porimanía?

⁴ Bí Shédíke ekumlo aato, delo bílang bíkke angong kídíe kumlík jolíknam ettíngem doto de bulu kepe iperumanam agérekíai, kapeila dem mirí kídí petomemín dobatuane.

⁵ Demangkom mirí kídíe kumkeng ekumlo nyodo longem nyomape ilate imem kamang, dem nolu ayon kitablo porimanía?

⁶ Ngo nolum podung, Kumkeng Ekumdem botteyane si dung.

⁷ ‘Ngo sobo yaarem empemílo, yaasamem mííyadung’ emnam agom kídar sim nolu kéntuamílo, nolu ajéng gemana kídíem ajéng gedope imayai.

⁸ Kapeila Tanike Oo demin Sabbath lokke Ruutume.”

Alage sina Amiko

⁹ Delok amodelok gílangkula bí buluke kumkeng ekumdelo pííto,

¹⁰ delo alage sina amiko dungai. Depe iduem Jisume aknape míídola bulu bím sikepe íngkíto, “Sabbath nyodo longelo ipínamde ibaadunía?”

¹¹ Bí bulum pokai, “Nolu akone mér sobénko bomdo delokke de Sabbath nyodo longelo deerulo olíkkai imílo, nolu dem gakla, sorep kumayénía?

¹² Mér sobén empemílo tanide edítko botte yadun! Delok legape Sabbath nyodo longelo Ayone akonem igul namem luyamang.”

¹³ Delokrongem bí amidem “Nokke alage yamtarto” emto. Delo bí yamtarname alag akon delok kísape aikaku.

¹⁴ Idakkom Pharisi kídíe luyulo gíla kapepak imílo bulu Jisume petkandodí dem poruu bosuto.

Shédíke Ullennam Béérange

¹⁵ Jisu bí dem kénsula delok amodelokke gínyok toku. Bosi borange bíkkíng gímín geto, delo bí buluke kinam takamem ipíto,

¹⁶ delokke bí dem pokan mapeka emla bulum lutumto.

¹⁷ Si Kaaluna miri Isaiahke sikepe lunam agomem apíímope emla inameke:

¹⁸ “Simin ngokke ullennam béérange, ngokke ayaname, ngokke mííyum sukenge, ngo ngokke aidem bíkkíng biyé, delokke bí angu ami kídílo jonna agomem poboyé.

¹⁹ Bí lumín momín sumayé demangkom uggomayé, sékote bíkke agomem bedu bedalo tatpamayé.

²⁰ Jonnamlok bíkke ikum mangem, Gerna piikong kokom bí tírmayé.

²¹ Bíkke amínlok mipak ami kídíete míídasuyé.”

Jisu Delokke Biljebub

²² Delokrongem bulu bíkkíng epompe tumla mingmana delokke gommanako bomaname, Jisu bí, dem ipítoku.

²³ Ami takame sai emla mííla pokai, “Si Dabidke Oope ikandunía?”

²⁴ Idakkom Pharisi kídíde dem tayyédem bulu poto, “Si Biljebub, uyu ruutum lokmin Bí uyuem monpak nana ralnamem paatune.”

²⁵ Jisu bí buluke míngkorem kénla pokai, “Yéta takamde agí agísue angu arang iyémílo bulu agíe nyoksuyé, delokke agí agísue apan aran ina taonde demangkom ekum erade atelkope tolbo sulamang.

²⁶ Soitande Soitanem monpak kumílo, bí agí agísue ipan iran sudung. Demílo dekena yétade kape tolyéne?

²⁷ Delokke ngo uyu kídíem Biljebub kelok mondung kumílo, séko kelok ami kídíe uyu kídíem monpak dungkune? Demílo bulu nolum bisar ibinape iyé.

²⁸ Idakkom ngo uyu kídíem Shédíke Aidlok monpak dungkumílo, demílo Shédíke yéte nolukelo aadung.

²⁹ “Demangkom ralna amidem kerape bí yéépong mamílo, kape kísa akone ralna ekumdelo aala bíkke sérangem bomyékune? Yéépong mílomin bí bíkke ekumdelok atí-siríem giiruk laayéne.

³⁰ Ngokkíng duumanade ngom akne, delokke ngom gesii bosumanade pinnyokne.

³¹ Dekepe ila ngo nolum podung ami kídíke paab takamdem delokke lukaa luyé namem maab biladung, idakkom Aidem lukaa namem maab bimayé.

³² Sékodí Tanike Uem akpé suyédí bím maab bilayé, idakkom séko Deena Aidem akpé suyédí bím so yérum sokom demangkom yépenam lokom maab bimayé.

Esing kolang sokke Ayé

³³ “Esiidem aipe mosang mílo sokke ayékom aiyé, demangkom esiidem take taredope imílo sokke ayékom aimayé, kapeila esiidem ayé lokmin kangkén nadune.

³⁴ Nolu tabí opín kídía kape kísa nolu agíe atímape inade aina agomko pokényéne? Legade aapí ainalok míngat emmin nappalok polendune.

³⁵ Aina amie kumsulok aina atíem laalen bidung, delokke atímana amie atímana kumsulok aimana atíem laalen bidung.

³⁶ Idakkom ngo nolum podung, dekena ami kídíde buluke míngíímape potonam agom takamem bisardíku longelo posukupe aiyé.

³⁷ Legade noluk agomsulok nolum mesam biyé, delokke noluke agomsulok nolum ajéng iyé.”

Irisinyoem Mataname

³⁸ Delokrongem Pharisi ayokon elang ukil ayokone bím sikepe pokai, “Babue, ngolu nokkelok irisinyo iyodko kaalídung.”

³⁹ Bí poyansukai, “Mirul amielang abír ina siirume irisinyo iyodem matadunía! Idakkom Kaaluna Miri Jonahme binam iyod kékonlo séko mekom iyod ibimayé.

⁴⁰ Kapeila Jonah bí longum kolang yongumko ngone akiilo duuto, dekepe Tanike Ue longum kolang yongumko kédeng arabelo duuyé.

⁴¹ Ninebi lokke ami kídíe sim siirum sim bisarlo dakbo suyéku delo bulum ajéng gemoyé; kapeila bulu Jonahke pogoo bikolok míílat sutoku, delokke supak Jonah mempemílo botte yanako si dung.

⁴² Sokko danlokke mime roje sim siirum sim bisarlo dakbosuyé delokke bulum ajéng gemoyé; kapeila bí among kéényung lok aala Solomonke ngiitom kénnamem tatgapto, delokke supak Solomon mempemílo botte yanako so dung.

Atímana Aidlokke Aalatkuname

⁴³ “Edílo deemana aidde tanilok lendokudi, de erengko amolo gígoola duupeko matadung idokom dem paamang.

⁴⁴ Delo de pokai, ‘Ngo ngokke gírong ekumlo aalat suyéku.’ De aayé kudem kaaname ekumde arape dung deename delokke kamporupe repla metung.

⁴⁵ Delo de gílangkula agíem rulyana aideke kínítko langaala, delo bulu gíla dungkai. Delo delok ami delokke yékore kerang kempenem loorí mayape ikai. Dekepemin si mirul siirum si iyéne.”

Jisuke Ane delokke Bírokídíe

⁴⁶ Jisuke milung delo pobo dungadape, bíkke anelang bíro kídíe bím luposupe emla luyulo dakya dungai.

⁴⁷ Akone bím “Nokke anelang bíro kídíe, nom luposupe emla luyulo dakdung” emla pobito.

⁴⁸ Bí poyansuto, “Séko ngokke anede, delokke séko ngokke bíro kídíde?”

⁴⁹ Bíkke lo luyilsuna kídílo sullíkdola, bí poto, “Sikesimin ngokke ane delokke ngokke bíro kídíe.

⁵⁰ Legade sékodí teyong telo duuna ngokke Abuke míínamem ibidudí demin ngokke bírue delokke bírme delokke ane.”