MATI 11 - DEENA BAIBÉL (BSI)

Baptis Joanke Kotoki Melíkname

¹ Jisu bí bíkkelo luyilsuna íying kolang annyidem ngiitom birongem, delok amo delokke Galil taonlo luyilla, delokke pogoola ipe emla gíto.

² Edílo Joan bí pateklo duudola Kristoke inam saanamem tattodí bí bíkkelo luyilsuna kídíem

³ “Nua Joanke bí aayé emla mantí bomname, demangke ngolu angukonko aayé emla míínam supía?” emla Jisume tatkítoka emla melíkto.

⁴ Jisu bí, poyansuto, “Gílat langkula Joanme potoka no ingkuem taddudí delokke kaadudí demoko.

⁵ Mingmane migdar kaku, lebaane gíkaku, tíídnem aimotoku, ruubénem tatmotoku sinem turmotoku, delokke opan kídílo tatpona dooyingem kíbito.

⁶ Ngokke lokke gílat kumana amide gérne.”

⁷ Joankelo luyilsuna kídíe gírongkuem, Jisu bí milung delo Joanke legangem sikepe polento, “Mooruk amolo nolu ingkuem kaape emla gítuane?

⁸ Dem kaamamílo ingkuem kaape emla gítuane? Kampona ege galuk gena amikua? Demang, ege galuk kampona gena kídíde roja dungkolomin duudune.

⁹ Demílo ingkuem kaape emla gílentuane? Kaaluna mirikua? E, ngo nolum podung, kaaluna miriem pakya nemmin kaatone.

¹⁰ Simin sékoke legangem attudí de: “ ‘Ngo ngokke kotokiem noluke kerape melíkpe bí noluke bedangem noluke kerape iruubiyé’

¹¹ “Ngo nolum arorupe podung; mime anelok oname sékote Baptis Joanme botteyana lenmarung; depe idokom séko teyong yétalo amé yalumdudí bí bím botteyadung.

¹² Joan ke yédo longe kídí delokke ila supaklope teyong yétade ralperung en gedung, delokke ralna amikídíe dem yébomdung.

¹³ Kapeila kaaluna miri takamelang delokke ayone Joanke kerape polupoor bitung.

¹⁴ Delo nolu dem torík sulídumílo, aapena Elijahmoko de amide.

¹⁵ Séko nyorung gedudí, de tatsu langka.

¹⁶ “Ingkoloi sim siirum sim luyii supene? Bulu bojar amolo duudula amiem sikepe tomlenna koo alung kísaneke.

¹⁷ “ ‘Ngolu nolum tapung mutbituai; depe ilate nolu miri momato; ngolu pengé lubituai depe ilate nolu ankímang.’

¹⁸ “Depe emnamde Joan bí angkane doma tíímape yéto, delo amikídíe, ‘Bí uyu gedung’ emto.

¹⁹ Tanike Ue angkane dola tííla ito, delo amie ‘Si domon tíímon nako kajanang ulna kídí lokke delokke Paab gena kídíke angongko’ emto. Idakkom kénnam kepe bíkke agér kídarsulok lengkansupa.”

Arope Míímana Taone

²⁰ Bulu míílat suku mangkolok, bíkke irisinyo alumem iko taondem Jisu bí lukaa lenkai.

²¹ “Korajin doolunga, no gérmadak; Bethsaida, no gérmadak! Noluke keralo irisinyo inam kísape Tur lolang Sidonlo ibi tuamílo bulu konnyi mennyingkai muun ege gela duuk ankíem metbu nyoolum sula míílat suyékuai.

²² Idakkom ngo nolum aruem podung nolum pemílo bisardí longelo Tur delang Sidon kede hakjém gepoyé.

²³ Delokke no Kapernaum no, teyong amolo dupía? Depe imayé, no rumkíng yalum belo tokyé. Noluke keralo ibinam irisinyoem Sodom lo ibiamílo, de silo melope duuyai.

²⁴ Idakkom ngo nolum podung, nolum pemílo, Sodom kede bisardí longelo dongge popoyayé”.

Ngokkíng Aala Duuno Sutola

²⁵ Delo Jisu bí pokai, “Yayie, teyong among kelang tani amongke Ruutum nom ngo koyiddung, kapeila no kénna paana kídí lokke sim atí kídí sim mesupto, delokke dekedem koo kídí lodan lengkan bito.

²⁶ Yayie, De arorunge, kapeila de nokke ibasuname.”

²⁷ “Takam atíem ngokke abue ngom tolíkdung. Uem sékote kénmang ngokke abu petome kénsudung, delokke sékote Abu me kénmang Oo petom elang Ue bím lengkan bipe emla ullennam kídí petome kénsudung.

²⁸ Ngokkíng aatola, nolu adírna delokke eget gena kídíe, delo ngo nolum duuno sumope.

²⁹ Nolu ngokke jungoliem getoka delokke ngokkelok kéntoka, kapeila ngo dengomnako delokke ainange remagnako, delo noluke aid legape duuno supekuem paayé.

³⁰ Legade ngokke jungoli de geponako delokke ngokke eget si essanako”.