MATI 10 - DEENA BAIBÉL (BSI)

Tomlíknam Íying Kolang Annyi Kídíe

¹ Delo bí agíkelo luyilsuna midum íying kolang annyidem tomdum sutula, atímana aidem monpak kunana delokke kimo rammona delokke kina takamem ipíkunana ralnamem bulukíng bilíkto.

² Sike simin íying kolang annyi tomlíknam ami kídílokke amíne; Kerayalumpe, Simon, bím Pitor emlangkom mandung, delokke bíkke aní Andria; Jebedike oo Jemslang bíkke bíro Joan;

³ Philip delokke Bartholoma; Thoma delokke kajanang ulna Mati; Alphaike oo Jems delokke Thaddai;

⁴ Simon lang Jisume mirulo yadlíkna Iskariot Judas.

Midum Íying Kolang Annyi Delokke Misone

⁵ Sim midum íying kolang annyi sim Jisu bí melen líkdola, rumkíngke agom kídar sim ngiitom líkto. “Mipak kídílo gímapeka demangkom Samari kídílokke taonlo aamapeka.

⁶ Dempenem nyokna Israel mér sobén kídílo aalangka.

⁷ Nolu magoodula, ‘Teyong amonge anín dubong’ emnam ngiitom sim pogoo langka.

⁸ Kinem ipílangka, sinem itur langkuka, tííd gena kídíem deemo langkuka, urom kídíem monpak langka. Asampe nolu paato, asampe bilangka.

⁹ Noluke ugíílo uun dakkom demangkom baldín dakkom pirlíng dakkom,

¹⁰ mibo ennana talí dakkom demangkom galuk apek dokom, demangkom leyuk dokom demangkom banggén dokom bommapeka; kapeila agér gérbo nadem tíílíng kenuem kaape aido.

¹¹ “Taon dokom, doolung dokom ingkolo nolu enayédí, delo ami aroko mata langka delokke noluke enkupe mííma tetengem delo duupo langka.

¹² Nolu ekumlo enayém, noluke salamem bilangka.

¹³ Delo de ekum erangde nolum torík sudumílo, noluke mííponame delo duudaklangka; delokke de depe imamílo noluke mííponame nolukíng aalat sudak langkuka.

¹⁴ Nolum torík sumanako kayémílo, demangkom noluke agomem tatbi mayémílo, dem ekumdem demangkom taondem noluke gínyo yékuem noluke alelokke pemugem pibín sulangala gílangkuka.

¹⁵ Ngo aruem nolum podung, bisardí longelo Sodom delokke Gomorrahde dem taon dempenem doojém gepoyayé.”

Aré-anyo Pename

¹⁶ “Ngo nolum mérbéno kísape sipyang gooralo melen líkdung. Delok legape, tabí kísape ansu langka delokke pekí kísape yayo langka.

¹⁷ Depe idakkom nolu tani kídíem ansulangka; bulu nolum doolung kebalo melíkyé delo buluke musup kídarlo demngééyé.

¹⁸ Ngokke legalok nolum gobornor keralo delokke rojakídí keralo bomala bulukílang mipak kídí keralo tatpona dooyingem pokan bidope iyé.

¹⁹ Idakkom edílo bulu nolum umyédí, ingkuem polapei demangkom kape kísa polapei emla mínga sumapeka. Dekepe iyédelo nolu ingkuem pope aidudí dem nolum biyé,

²⁰ delo popenade nolumang, noluke Abulokke Aidemin nolum pomoyéne.

²¹ “Bírue bíruem sipekolo yadlíkyé, delokke abue agí ome-uem; ome-oo kídare buluke ane abuem aklenyé delokke bulum sipekolo melíkyé.

²² Ami takame nolum ngokke legalok belumyé, idakkom séko yéyinlope edíípe dooyédí bí turyé.

²³ Among kolo nolum iréé yémílo, among konlo byaggetoka. Ngo nolum aruem podung, nolu Israel lokke takam taonem gíyin mangadape Tanike Ue aapuyéku.

²⁴ “Pori koode agí babuem kedon yamang, béérang dekom agí ruutumem kedon yamang.

²⁵ Pori koode agí babu kísape inamde, delokke béérade agí ruutum kísape imíngenamde aisudung. Ekumlokke ruutumdem Biljebub emmílo bíkke ekum erade edítko pakyape amín atímanem geyéne.”

Peso Penamde Sékoda

²⁶ “Depe iname bulum pesue emla míímapeka. Supnam atí kídídem tatmape ipeko kamang, delokke supnam atí kídídem kénmape ipeko kamang.

²⁷ Kaamolo ngo nolum ingkuem podudí, dem nolu angunlo polangka; ingkuem noluke nyorulo positodí, dem ekum teyong lokke gogying langka.

²⁸ Amílem petdola, aidem petlamana dem peso mapeka. Dempenem doorum líísamlo amíl emlang, aidem petlana dem peso langka.

²⁹ Ngiitíperí annyiem pirtel kope komanía? Dekom noluke Abuke míínam kékon delo sékote amolo oletmayé.

³⁰ Noluke dumpong lokke dumíd takam emte sanyinla metung.

³¹ Depeila peso mapeka; nolu ngiitíperí alung emkom are kayane.”

Jisume Agíkepe Posuname Delokke Lupak Suname

³² “Séko peebepe Jisu bí ngokke emsududí, ngokom bím teyotelo duuna ngokke Abuke keralo depe emyé.

³³ Idakkom séko ngom peebepe topak sududí, ngokom teyotelo duuna ngokke Yayike keralo topak suyé.”

Yéponammang Idola Yoksa Komino

³⁴ “Ngom tani amoso yéponamem bomadope aadung emla míímem mapeka. Ngo yéponamem bomabope aamang, idakkom yoksa komin bomadune.

³⁵ Kapeila ngokke anggade Ue abuem akla, ome anem akla, nyamenge ayuem akla,

³⁶ ami lokke miru kídíde bíkke ekum eranglok lensuyé.

³⁷ “Séko agí abuem demangkom anem ngom penem aya yadudí, bí ngokkepe ibaamane; séko agí uem demangkom omem ngompenem ayang yadudí, bí ngokkepe ibaamane;

³⁸ delokke séko agíe kross em joosula, ngokkelo gímadudí, bí ngokkepe ibaamane.

³⁹ Séko agí yépenamem aabanyape míídudí, bí dem menyoksuyé, delokke séko agí yépenamem ngokke legape menyok sududí bí dem paayéku.

Paapenam Amane

⁴⁰ “Séko nolum torík sududí ngomkom todung, delokke séko ngom torík sududí, ngom melíknemkom torík sudung.

⁴¹ Séko kaaluna mirie emla kaaluna miriem toríksududí, bí kaaluna mirilokke amanem paayé; delokke séko deedung emla deenem torík suyédí, bí deenalokke amanem paayé.

⁴² Delokke séko sok koo kídí sokke akonem bí ngokkelo luyilsunako emla mííla asi batiko, biyédí, ngo nolum arope podung, bí agíke amanem berokrupe menyok sumayé.”