MARK 5 - DEENA BAIBÉL (BSI)

Urom Duubomnam Amikonem Jisuke Ipíkuname

¹ Bulu sine rotkon Geraset amolo gíto.

² Jisu bí etkudelok oiyédem amiko urompe tumnako ago kídarlok aala bím ríksupe gíto.

³ Si amisi ago kídarlo duutuai delokke sékoteng bím yéélana kaimang, íkoli lokteng rínla yimang.

⁴ Kapeila bím leko leko ale alaglok yééla metuai ilate íkoliem bíntung bínyula delokke aremem alelok tutír tuyirla ito. Sékote bím ralyana katomang.

⁵ Longe yohpe ago kídarlo, dííte moopalo bí ulo goktíla delokke elílok agíem gatsudungai.

⁶ Jisume mootengo lokke bí kaayédem, bí dukla bíkke keralo lebíng koníla ito.

⁷ Bí séngéépe ulo gokla pokai, “Kedon yalumna Shédíke Oo Jisu, Nom Shédíke amínlok rogudung ngom iréé mayika!”

⁸ Kapeila bím sikepe lutuai, “No deemana aid no, sok ami sokke gígéétoku!”

⁹ Delokrongem Jisu bí bím “Nokke amíne ingkue?” emla tatkíto. “Ngokke amíne Rombame, ngolu bojékokai idung” emla posuto.

¹⁰ Delo bí Jisume lennyi lengum delok amo delokke bulum monpak kumadope rogu gutíto.

¹¹ Éék yékbamko erak ampeng delo dotala yéduai.

¹² Uromde Jisume, “Ngolum yékbam elo melíktola; bulukíng ngolum aamotola” emla roguto.

¹³ Bí bulum tolíkbito, delo deemana uyude lenlangkula, éék kídar delo aalíkto. Yékbamde isabe jarnyi kopekai ido, de dukkane eraklo dukboola sinelo olíkla asilo aayinkai.

¹⁴ Éék kídar dem kaabomna kídíde duklangkula sim kobor sim delo taon delolang doolung delo pokan bitoku, delo ami kídíe kape ikadí dem kangkí tatkípe emla gílento.

¹⁵ Edílo bulu Jisukíng aatodí delo bulu urom maklíng duubomnam amidem, ege galugem gesula, aapíe berok langkula delo duudope kaato, delo bulu pesue ito.

¹⁶ Dem kaana kídíe urom duubomnam ami demlang éék kídíe kape ikadí. dem legadem ami kídíem pobito.

¹⁷ Delokrongem ami kídíde Jisume buluke amodelokke gígéé dokupe roguto.

¹⁸ Jisu bí etkudelo duudungem urom duubom kolok kina amide bíkkíng gíbosupe emla roguto.

¹⁹ Jisu bí bím gímomang, idola bí sikepe poto, “Nokke ekum eranglo enlangkula edítko Ruutum bí nokke legape itodí delokke edítko nom bí yaasam todí dem bulum pokan botolangku.”

²⁰ Dekepe iname amide gílangkula Jisu edítko bíkke legape ibitodí dem Dekapolilo pobotoku.

Jairike Ome Delokke Jisuke Egem Ukkína Mimeko

²¹ Jisu bí lekoda etkulok sine rotkon delo koolen yédem, deddína mibame bíkkíng yémín geto. Bíkke sine robeng delo yédungem,

²² Jairi emnam, kumkeng ekumlokke ruutume delo aato. Jisume kaala, bí bíkke alelo olíkdola,

²³ bím rogu gugapdola, poto, “Ngokke ome améne sidakbong. Ayasula aala bí eker langkula yédokupe nokke alage bím ukkí bitoka!”

²⁴ Depe iname Jisu bí bíkkíng gímín geto. Deddína miti maklínge bíkkíng gímín gela bím daklub bomto.

²⁵ Tagying kolang tagnyi kokai iyyi bíttína mimeko delo yéduai.

²⁶ Bí ipenam takamem daktorlo ingéé sutobong iname bí ingkuem katuadí demteng iyin sutobong, depe ilate aiyangku penamem mangkam yape imo imodung.

²⁷ Jisuke legangem tayyédem, bí bíkke méélamlo mibamdelo aala bíkke egedem ukíto,

²⁸ kapeila bí sikepe mííto, “Ngo bíkke ege petomem ukkí petom dokom ngo aiyéku.”

²⁹ Menang asak bíkke iyyide tengap kaku delo bíkke adírpe kige namem eker motoku emla bíkke amílde ansuto.

³⁰ Letellok Jisu bí bíkkelok pauare gíkai emla kénsuto. Delo bí milung delo pelkut sulangkula, “Séko ngokke egem ukkítone” emla íngkíto.

³¹ Bíkkelo luyilsuna kídíde poto, “Ami kídíe nom ebín ebon ibom namem kaadula, no ‘Sékoi ngom ukkítone emdulanga?’ ”

³² Sékoi depe itone dem kaape emla Jisu bí kanggosuto.

³³ Delokrongem mimede, bí kape ikadí dem kénsula, aala, bíkke aledelo olíkla pesuem dan-goosudola aruem poyinbito.

³⁴ Bí mimedem pokai, “Ome, nokke míngkenge nom ipísutoku. Aiyope gílangkula nokke kinam lokke eker langkuka.”

³⁵ Jisu bí agom pongo dungadape, amieke ayoko kumkeng ekumlokke ruutum Jairike ekumlok píído. Bulu “Nokke ome sikai, Babuem tomtí kupenam kaimang” emla pokai.

³⁶ Buluke ponamem tatna kaamang kísa idola Jisu bí kumkeng ekumlokke ruutumdem poto, “Pesonam kamang; arope míngke sutoka.”

³⁷ Pitor, Jems delokke Jemske bíro Joan buluke kékondelo bí séko meteng bíkkíng gímín gemomang.

³⁸ Bulu kumkeng ekumlokke ruutum ekumdelo píídodelo, Jisu bí kaatoname amikídíe bottepe kapla rííla pupéé ruréé ido.

³⁹ Bí aradelo aala bulum poto, “Kape inamei siddípe tayyémpe kapla rííla inamsi? Koosi simang ipdu namino!”

⁴⁰ Depe idokom bulu bím ngilka latto. Méélamdem bí bulum takamem luyapala, koo delokke ane abu demlang delokke bíkkíng gíbosuna luyilsuna kídídem tomla koo delokke ketko delo aabosuto.

⁴¹ Bí koodem alaglo borepdola poto, “Talitha Koum!” (Depe emnamde ansoona mimekue, ngo nom gerep tolangku emdung.)

⁴² Menang asak mime koode dakrepla gígong sukaku (bí tagying kolang tagnyi nakuai). Dem kaala bulu kaperui inakone emla mííto.

⁴³ Bí sim legasim séko meteng kénmo mapeka emla sepekrupe pogapto, delokke koodem dopenamko bidope bulum políkto.