MARK 4 - DEENA BAIBÉL (BSI)

Amli Kuujénalo Luyiisuname

¹ Jisu bí sine ampeng delo porum konpe luyiisunam agomlok pokai. Delo dumsuna amikídíe deddí kokai iname bí etkudelo rengala siyéng teyodelo duuto, delo ami takame asi robeng delo dakto.

² Bí bulum luyiisunam poyillok bojéko poboto, delokke bíkke luyilde sikepe pokai:

³ “Tatgaptola! arík ina amikone bíkke amliem kuupe emla enkai.

⁴ Bí alidem kuuname, ayokone bedalo okai, dem pettange aala dongumto.

⁵ Ayokone kédeng anyongko líírelo olíkkai. De menape sangkai kapeila kédenge bojémang.

⁶ Doonyie saala pamki yédem asul kídíem baaléto, delo dekede sankai kapeila bulu appír aro pírketmang.

⁷ Abíde taanyum tatké gooralo olíkkai, de siirep yédem taange dokato, depeila bulu ayé éémang.

⁸ Ayokonedan moonelo olíkkai, delo ambede ayokone íying angumpe, ayokone íying akképe, ayokone língkope ampile lento.”

⁹ Delo Jisu bí “Séko nyorung gedudí tatsulangka” emto.

Luyiisubomname

¹⁰ Bí petom iduem, íying kolang annyide delokke bíkkíng yébosuna abíde luyiisunam agomdem, bím íngkíto.

¹¹ Bí bulum poto, “Shédíke yéta lokke arang agomem nolum bitung. Idakkom luyu kídí takam kepe luyiisunamlok podung,

¹² “Kapeila bulu kaatuakom, mínggetope imang, delokke tattuakom tatkéndí kamang; demangamílo buluke míílat sudokuem maab biyékuai!”

Ali Pinnalo Luyiisunamem Jisuke Pobeng Bikuname.

¹³ Delokrongem Jisu bí bulum luto, “Nolu sim luyiisunam agomsim tatkén manía? Demílo kape kísa nolu luyiisunam agomem tatkényéne?

¹⁴ Arík ina amide agomem kuujédung.

¹⁵ Ayokon amie bedalo agom kuujénam amli kísa. Bulu tayyédem bulukíng kuujénam agomem Soitane aala laabín dungku.

¹⁶ Abíde líírelo amli kuujénam ami kísa, agomem tatla, menang asak ashépe dem laarík sudung.

¹⁷ Idakkom bulu appír kamala, duutemang, delokke kísa edílo adírelang ebíne Shédíke agom delok legape ibomyédí bulu menape nyokdungku.

¹⁸ Ayokone taanyum tatké gooralo olíkna ami kísa, agomem taddung;

¹⁹ idola yénam daknam legalo paatem dotem namem míítídung delokke agomem menyokla, ayé, lenmomape idung.

²⁰ Ayokonedan, aina moonelo kuujénam kísa agomem taddung, dem torík sudung delokke ambeng íying angumpe, íying akképe demangkom língkope pinnamem bojéyape aliem lenmodung.”

Egín Bayé Aralo Meru Nyotname

²¹ Bí bulum pokai, “Nolu egín bayé aralo demangkom bisonang rumkílo meruem nyotpe emla bomadunía?

²² Legade ingkuem mesup tudí dem kénbee moyéku, yusupnam kídíem ngunkan yéku.

²³ Séko nyorung gedudí de tatlangka.”

²⁴ Bí podan teteng kane, “Nolu ingkuem taddudí dem aipe míngíítoka” emto. “Noluke kíkí nanalok, nolumkom kínayékudem pakyapete iyéku.

²⁵ Séko kadudí bím bojéyape bitemyé; séko kamadudí, bíkke kanam anyong demkom laabínyéku.”

Asul Saana Amílo Luyiisuname

²⁶ Bí sikepe poto, “Sikepemin Shédíke yétalo idune. Amikone amolo amíem pitjéto.

²⁷ Bí yoh dokom, longe dokom demangke ipdokom dardokom amíde kapedí garla sisangkan dem kénmín gemang.

²⁸ Kédeng sude dem asul dem saamola delokke ayé éémoto.

²⁹ Aame minyéname, bí kassiem delo leelíkla gatto, kapeila gaddíe píngkai.”

Tulang Amílo Luyiisuname

³⁰ Lekoda bí poto, “Shédíke yétadem kape kísa naloi ngo polík kupene, demangkom ingkona luyiisunam koloi ngo dem polík kupene?

³¹ Si ansoo yalumna noluke aríklokke alie.

³² Depe idokom edílo kuulíkyédí, delo si saado delokke baganlokke pettang kídíete sokke ukyumlo asup supkedope bojé yalumpe aag kado.”

³³ Bulu tatkén podope sikena luyiisunam agomem Jisu bí bulum poboto.

³⁴ Bí luyiisumanam atíyang bulum agom pomang. Idakkom bíkke agíke luyiisunam kídíem bí rongngampe duubo sudokuem takamem pobeng bitoku.

Gumnamem Jisuke Lumap Kuname

³⁵ Delo longedelo adenge iyédem bí bíkkíng luyilsuna kídíem “Rotkon elo koolaju” emto.

³⁶ Milung kídíem mekut sugeyéla, Jisuke dungko etkudelo luyilsuna kídíete lekope duula kongkai. Abíd etkung ekom bíkke lekope koobosuto.

³⁷ Botteruna gumnamko angkane sipyare etkudelo pyagala, etkude giilum tatadubong ito.

³⁸ Jisu bí kungkong kéényung delo dumtenko bomla ipdungai. Luyilsuna kídíde bím urep pala, poto, “Babue, asilo giilum dokom no ngolum ankímanía?”

³⁹ Bí gerepla, asar emlang sipyarem sikepe luto, “Tengaptoku! Eetet tokui!” Delokrongem asarde nyokkaku delokke eetet berok kaku.

⁴⁰ Bí bíkkelo luyilsuna kídíem lutoku, “Nolu kape ila deddípe pesokane? Supakkom noluke míngkeng kamanía?”

⁴¹ Bulu pesodola mipile, “Kapena amikoi si amisi? Asar elang delokke sipyareteng bíkke agomem tatbido!” emla íngkí bosuto.