MARK 3 - DEENA BAIBÉL (BSI)

Alage Sina Amiko

¹ Lekoda bí kumkeng ekumdelo gítoku, delo alage sanna amiko dungai.

² Ayokone Jisume géngko luko agom mata tatídungai, depe iname Jisu bí Sabbath longelo bím ipíyédí ipímadí emla bulu kanggap bomto.

³ Jisu bí alage sanna amidem luto, “Takam keralo dakreptoka.”

⁴ Delokrongem Jisu bí bulum íngkíto, “Ingkue Sabbath longelo ibaa namde, ainam agérdía ma, aimanam agérdía, turnamem mosing kunamdía ma, mokanamdía?” Idakkom bulu asoope dongkai.

⁵ Bí aklínge idola bulum kanggosuto, delokke buluke aapí angkam genamem anla duukrupe míídola amidem “Nokke alage ígonto” emto. Bí ígon toname bíkke alagde apíípe aikaku.

⁶ Delokrongem Pharisi kídíde gílangkula Herodia kídíem idumsula kape kísa bulu Jisume petladodí dem ruubo sulento.

Sine Paatang Ampelo Deddína Milunge

⁷ Jisu bí bíkkelo luyilsuna kídíem lekope sine paatang ampeng delo gílat subotoku, delo milung ludí kokai Galil lokkekai gímín geto.

⁸ Edílo bulu bíkke inam takamem tattodí, deddína amie Judia, Jirusalem, Idumia, Jordan rotkon amolokke delokke Tur, delokke Sidon lokke bíkkíng gímín geto.

⁹ Deddína mibamem kaasu geyéla bím agom ayompe imadope mííla, bí bíkkelo luyilsuna kídíem améngona etkungko leeru bidope políkto.

¹⁰ Bí deddína amiem ipíkuname kinam kana kídíe bím ukkípe emla nyorkér nyoryérsula ibomto.

¹¹ Deemana aide bím kaayé mipíem, bulu bíkke keralo olík dola gokto, “Nomin Shédíke Ue.”

¹² Idakkom bí sékodí dem sékomete pobomadope tolnamrupe bulum lugapto.

Tomlíknam Midum Íying kolang annyiem Jisuke Tomname

¹³ Jisu bí etpalo saato delokke gílína kídí emte tomto, delo bulu bíkkíng gíto.

¹⁴ Bí midum íying kolang annyidem tomlíknam kídí emla amínem bila, bulu bíkkíng yébosudope delokke Shédíke agomem pobodope ullento.

¹⁵ Delo uyu kídíemte monku nana ralnamem bulum bito.

¹⁶ Bíkke ullennam íying kolang annyide si: Simon (bím Pitor emla mínlíkto);

¹⁷ Jebedike oo Jems, delokke bíkke bíro Joan (bulum bí Boanerge emla mínlíkto, depe emnamde doomír ue);

¹⁸ Andria, Philip, Bartholoma, Mati, Thoma, Alphaike oo Jems, Thadai, Simon Jilot

¹⁹ delokke bím yadna Judas Iskariot.

Jisu Delokke Biljébul

²⁰ Delokrongem bí ekumkolo aato, delo deddína mibame dumsu kuname, bíla bíkkíng luyilsuna kídíe dodí tíídí koteng kamato.

²¹ Bík ke ekum erange dem tayyédelo, bulu lukai, “Bí aapí dungkollo duumang.”

²² Jirusalemlok tokna ukil kídíe pokai, “Bím Biljebub duubomdung. Uyu ruutumlok bí uromem mondung.”

²³ Depe iname Jisu bí bulum tomla luyii sunamlok poboto: “Soitane kape kísa soitanem monyékun?

²⁴ Doolungde apan aran isumílo atelbosu lamang.

²⁵ Ekum erangde agí agíe bekpan sumílo, de ekumde lepong atelpe ilamang.

²⁶ Delokke Soitane agísuem aksula pekpan sumílo, bíkke nyokdíe píídung.

²⁷ “Aropakpe poyém, ralna amidem yéépo mamílo, sékokom ralna ami ekumdelo aala bíkke sérangem rotlamang. Yéépong mílomin ekuradem rotyéne.

²⁸ “Ngo nolum aruem podung, takam paabem delokke taniem lukang namem maab biyé.

²⁹ Idakkom séko Deena Aidem lukaayédí bím edílokom mesam bimayé; bí duuyarpena paab ajéngem gedung.”

³⁰ Bulu bím “Bí deemana aidko gedung” emgape bí sim pobito.

Jisuke Anelang Bírokídíe

³¹ Delokrongem Jisuke anelang bírokídíe píído. Luyulo dakdola bulu amiko bím tomdope melíkto.

³² Milungko bím dunggoodo, delo bulu bím, “Nokke anelang bíro kídíe nom toyala luyulo dakdung” embito.

³³ “Séko bulu ngokke anede delokke bíro kídíde?” emla bí mankai.

³⁴ Delokrongem bí bím dunggoona kídíem kanggo sudola poto, “Sike simin ngokke ane delokke bíro kídíe!

³⁵ Séko bulu Shédíke míínamem idudí bulumin ngokke bírue, bírme delokke ane.”