MARK 13 - DEENA BAIBÉL (BSI)

Kumkeng Ekumlokke Nyokku Penamem Jisuke Poboname

¹ Bí kumkeng ekum delokke gídakkuem bíkkelo luyilsuna akonde bím pokaí “Saare kaatola: Edítna elíngem kumtem sutune! Kangam runam bilding ekumko si:”

² “Nolu sim botteruna bilding ekum sim kaadunía?” emla Jisu bí poyansuto. “Si elíng kídar si atelkote kumtemsula duuyimayé; takamem bénpakyéku,” emto.

Ebín Penam Elang Taronang Ipename

³ Jisu bí kumkeng ekum kékonke Olib Díítelo duudungem, Pitor, Jems, Joan delokke Andria bulu bím pesuppe tatkíto,

⁴ “Ngolum pobika, edílodí de atíkídíde aroyéne? Delokrongem dem takam dem ipíínape ingkona iyode lenyédí?”

⁵ Jisu bí bulum poto: “Sékote nolum yadmadope an-gap sulangka.

⁶ Deddína amie ngokke amínlok aala, ‘Ngomin bí’ emsuyé delokke dekepe deddína amiem yadyé.

⁷ Edílo nolu mimagem delokke mimak idunaike emnamem tayyédí, pesue emla míímapeka. Dekena atí kídare iperung aiyé, idokom delo yéyin longede píímangada.

⁸ Doolung doolunge dakdí mínsuyé, delokke among amonge akmín surepyé. Rego regolo mooton tarone tonyé, delokke dírí keno mílípe iyé. Dekede okii kilene.

⁹ “Nolu agíem edíípe mesulangka. Nolum doolung baanelo melíkyé delokke kumkeng ekumlo demngééyé. Ngokke legalok nolu gobornor delokke rojakídí keralo tatpona dooying legape hakiipe dakpayé.

¹⁰ Delokke tatpona dooyingem kerape opín takamlo poyinbiyé.

¹¹ Edílo nolum umla delokke bisarkolo gíboyédí, kape pomíloi, emla kerape míídír sumapeka. Ingko pakna moodíem nolum podope bitudí delo polangka, kapeila de pobonade nolumang idakkom Deena Aidemin pomodune.

¹² Bírosue bíruem delokke abue agí kuem sipekolo yadlíkyé. Ome-ue agí ane abuem akyé delokke bulum petmoyé.

¹³ Ngokke legalok ami takame nolum gééyé, idakkom séko yéyinlope edííyédí bí turyé.

Pesoruname

¹⁴ “Edílo nolu ‘Nyokyimana ekurangem,’ duupe mangkolo duupe kaayédí porine kangkén sulangka delo Judialo duuna kídíe dííte moopalo dugge daklangka.

¹⁵ Ekum míílonglo duune oikuma daklangka demangkom ekum aralo aalangkula atí laalen kuma daklangka.

¹⁶ Aríklo yéne sékote agí egem langku madak langka.

¹⁷ De longe kídíde koogena delokke anyun sunna mime kídí kepe edítko pesorunampe iyéne!

¹⁸ Si dígínlo imadope kumbom langka;

¹⁹ kapeila de longe kídíde lendak, depe emnamde, Shédíke tani amongem pílendak delokke ilangala, supaklope delokke lekoyate iyi pemana, pakyape atímana adír longepe iyé.

²⁰ Idokom Ruutum bí dem longedem andeng motung; bí dem andeng momangamílo sékoteng turla duumayai. Idakkom bíkke ullennam kídí legape bí dem andeng motung.

²¹ “Delo longedelo akone nolum ‘Kaasutola, Kristo bí so dung!’ demangkom ‘Kaasutola! bí elo dung!’ emyé mílokom dem arope míímem mapeka.

²² Legade mena Kristo kídíe delokke mena kotoki kídíe lenla, iyod sangot delokke irisinyo ibila, ullennam kídíem yadpenamem yadlenyé.

²³ Dekepe iname agíe ansulangka; Ngo moodí legape nolum takamem pobitobong.

²⁴ Idakkom dem ebín longe kídídem píímín gena longe kídídelo, Doonyie ruakyé, poolue angun biyimayé;

²⁵ takar kídíe taleng telok oletyé, taleng telokke atíkídíe engenyé.”

²⁶ Depe iduem Tanike Uem ami kídíe pauar delokke angun ralnam kaperung doomuglok aadak kupe kaayé.

²⁷ Delo bí bíkke teyong kotoki kídíem melíkla among kéényung appisok, among taleng kerelok bíkke ullennam kídíem giidum suyéku.

Tapang Esinglok Kaayiisuname

²⁸ “Supak tapang esing kolok kangkén sutoka. Sokke aage lenrongem annete lendo, delo díyue anín dung emla kénsupe aido.

²⁹ Dekepe iname, sim atíkídí sim nolu kaasuyém, yaplelope anín dubong emla nolu kénsu langka.

³⁰ Ngo nolum aruem pobidung, si atí takam si imatetengem, si yérum si nyokmayé.

³¹ Among talenge nyokyé, idakkom ngokke agome edílokom nyokmayé.

Sékote Moodíem Kénmang

³² “Sékote dem longedem demangkom gonta isabem kénmang, teyong telokke teyong kotoki kídí ekom kénmang, delokke Oo ete kénmang, idola Abu petome kénsudung.

³³ Agíe ansulangka! Beréé langka! De moodíde edílo pííyédí nolu kénmang.

³⁴ Si gínyok kuna ami kísane: Bí bíkke béérang kídílo bíkke ekum erangem kaabom yépe emla melíkto, mipillo agérem melík geyéla delokke akonem lamgédelo dakbom dope poto.

³⁵ Delok legape kéngap sulangka kapeila edílo ekum atode pííyékudí nolu kénmang- yumelodí, yoh raajanglodí, peroge kokdíemdí, demangkom píang lodí pííyékune nolu kénsumang.

³⁶ Bí píílom kumílo, bím nolu ipnge sudope kangko sumang daklangka.

³⁷ Ngo ingkuem nolum podudí, mipil miyongem ngo podung: ‘An-gap bomlangka!’ ”