MARK 12 - DEENA BAIBÉL (BSI)

Onggur Aríklo Bara Ina Ami Kídílo Luyiisuname

¹ Delokrongem bí bulum luyiisunamlok polen bokai. “Amikone onggur aríkko ito. Bí dem etor torgosula, onggur alang sépkoko koola delo ippoko pobito. Delokrongem bí aríkdem arík ina ami ayokonlo barape bigeyéla mibolo en-gongkai.

² Gaddíku moodílo bí bara ina amikídí delok arík delokke aliem laapan sudokupe emla béérangko melíkto.

³ Idakkom bulu bím umla, dííla mola ipala arape melíktoku.

⁴ Delokrongem bí béérang konko melíktoku; bulu bím dumpolok demla delokke ipusilééto.

⁵ Bí akonko melík tokukéng, delo dem bulu petto. Bí abíd amiekete melíkto; ayokonem bulu moto, ayokonem bulu petto.

⁶ Atel petomko de bíkke ayanam ooko. Bí méélam yalumpe bím melíkdola poto, ‘Bulu ngokke uem míngge yépe.’

⁷ Idakkom bara ina ami kídíde mipile pobosuto, ‘Simin yége dakge kupenade. Kaju, bím petlaju, delo ruutum doge penamde ngolu kepe iyé.’

⁸ Depe iname bulu bím gakla petto, delokke arík ramgom delo yoppakto.

⁹ “Delo arík atode kape iyén? Bí aala delokke dem bara ina ami kídídem petpakyé delo aríkdem angukon amilo biyé.

¹⁰ Nolu dooying kitablo porimanía: ‘Ekum mona kídíke mepaknam elíde míngkepe ilatkai.

¹¹ Ruutum bí depe imotung, delokke ngoluke amig kangkolo de irisinyue’ ”

¹² Delokrongem bulu bím umpeko bedang matakai kapeila bí bulum aklídola luyii sunamlok ludung emla bulu kénto. Idola bulu mibamdem pesoto; depe iname bulu bím megeyéla gíkaku.

Kajanang Dornam Legangem Íngkí Bengkíname

¹³ Méélamdem bulu ayoko Pharisi kídíe kelang Herodia kídíeke Jisuke agomsulok bím umdope Jisukíng melíkto.

¹⁴ Bulu bíkkíng aala pokai, “Saare, no milo aroko emla ngolu kéndung. No amiem ríakdung, kapeila bulu sékuadí dem no deddíko ankímang; idakkom no arolok Shédíke bedang emmin poyil bodune. Kaisarme kajanang binamde bibang dunía bibaa manía? Ngolu bipía ma, bipe mangía?”

¹⁵ Idokom Jisu bí buluke aromana aapíem kaaluto. “Nolu ngom kapeila agotlo tobomkane?” emla bí íngkíto. “Adoliko ngokkíng bomatola, ngom kangkímoi.”

¹⁶ Bulu poisarem bomabito, delokke bí bulum tatkíto, “Sékoke mimange si? Delokke sékoke amíne?” “Kaisarke” emla bulu pobito.

¹⁷ Delo Jisu bí bulum poto, “Kaisarke atídem Kaisarme bilangka delokke Shédíke atídem Shédíme bilangka.” Delo bulu bím sai emla míngkai.

Sikolokke Gerepkunam Legangem Íngkí Bengkíname

¹⁸ Delokrongem gerep kunam kamang emna, Sadduki kídíe, bíkkíng agomko íngkípe emla aato.

¹⁹ Bulu pokai, “Saare, Mosi bí ngolum sikepe atbito, ami akonke bíroko ome-oo kamape, bíkke méngem sinyomílo, bíkke bírode meyédem laala sina delokkepe ome-oo obikupe aido.

²⁰ Depe iduem bíro kumsu kínítko dungai. Abí yalumde méngko kato delo ome-oo kamape sinyokai.

²¹ Annyi nape nade meyéng dem laatoku, idola bíte ome-oo kamape sikai. Angum nape nadete depe ikai.

²² Aropakpe kínít delokke atel koteng ome-oo katomang. Méélam yalumdelo mime dete singumkai.

²³ Bíro kínít de bím méépe iname, gerep yékudelo sékoke méépe bí iyékun?”

²⁴ Jisu bí poyansuto, “Nolu imem manía? Kapeila nolu Dooying kitabem demangkom Shédíke ralnamem kénmang.

²⁵ Edílo sina kídíe gerep yékudí, bulu méng kapete kamayé demangkom méng ipete imayé; bulu teyotelo teyong kotoki kísape iyé.

²⁶ Supak sinalokke gerep kunam legangem nolu Mosike kitablo kaayémílo eme dorna emko agomdelo porimanía? Delo sikepe attung; Shédí bí bím poto, ‘Ngomin Abrahamke, Isaakke delokke Jakobke Shédíe’

²⁷ Bí sina kídí lokke Shédímang, idakkom turna kídíke Shédí emino. Nolu lumem berokdo!”

Botte Yalumna Ngiitome

²⁸ Ukil akone aala bulum akmín sudope tatto. Jisu bí bulum aina agomem pobito emnamdem anla, bí bím íngkíto, “Ngiitom kídarlokke ingkuei leríí yalume?”

²⁹ Gomlong yalumde si: “Israel no, tatsutola, ngoluke Ruutum Shédí bí, Ruutum atele.

³⁰ Noluke Shédí Ruutumme noluke aanglok purape, noluke aidlok apíípe, noluke takam aapílok delokke noluke takam tolnamlok ayalangka.”

³¹ Annyi napenade si: “Nokke kumríem agí kísape ayalangka” “Sike simin ngiitom botte yalumne.”

³² “Saare, de pojido,” amide emkai. “Shédíe atelko delokke delo bíkke kékondelo anguyang kamang nokke emnamde arodung.

³³ Bím noluke takam aanglok, takam kénnamlok, takam tolnamlok ayalangka, delokke nokke kumríem agí kísape míílangka emnamde romnam ipak takamem delokke asampe binyok sunam emte botteyane.”

³⁴ Jisu bí bím pojirupe poyan sunamem kaayédelo, bím poto, “No Shédíke amolokke moote yimang.” Delokke ilangala sékote bím agom yang íngkítope míílana kaimang.

Messiahke Legangem Íngkí Bengkíname

³⁵ Jisu bí kumkeng ekumlo luyil yilngo dula íngkíto, “Kape kísape ukil kídíe Kristo bí Dabidke ue emkane?

³⁶ Dabid bí agíe Deena Aidlok sikepe poto: “ ‘Ruutum bí ngokke Ruutumme poto; Nokke miruem ngokke ale rumkílo mekuma tetengem ngokke lakbíklo duutola.’

³⁷ “Dabid bí agíe bím ‘Ruutum’ emla gokdung. Demílo bí kape kísa bíkke oope iyéne?” Miti miling aapíde bím eraprupe tatto.

Ukil Kídíem Ansudope Jisuke Lutosubiname

³⁸ Bí luyildola poto, “Ukil kídíem an-gap sulangka. Bulu ege bodona gela dukan bojarlo gígoola kumsu joosu namem matadung,

³⁹ delokke kumkeng ekumlo aiyana dungkuem delokke dokul tíngkullo míngge namem míídung.

⁴⁰ Bulu meyéng serangem rotbíndung delokke kaayé tayyépe emla bodo dora kumdung. sikena amikídíem ingéé sékré yéku.”

Meyéng Anelokke Dokang Biname

⁴¹ Jisu bí daan líkkeng dem dungkasula duuto delo ami kídíde kumkeng ekum lokke kumsu delo daan poisar líknamem kanggapto. Deddína mirem amie bojé bojépe líkto.

⁴² Idola opan meyéng anekone aala delo abal lokke remíkna sarlíng annyi petomko líkto.

⁴³ Bíkkelo luyilsuna kídídem bíkkíng tomnín supala, Jisu bí pokai, “Ngo nolum aruem pobidung, si opan meyéng anesi abíd takam empemílo kumsudelo bojé yalumpe líkto.

⁴⁴ Bulu takam agíke kanam kamang akorlok bito; idakkom si mime ane si, opane séngéédola, bíkke kanam anyongem bingumsuto.”