MARK 10 - DEENA BAIBÉL (BSI)

Milo Méng Mepan Sukunamem Jisuke Luyilname

¹ Delokrongem Jisu bí dem amodem mepala Judia rotkonlo gíto. Lekoda mití maklínge bíkkíng aato delo iyang iyape bí bulum luyilto.

² Pharisi kídíeke ayoko aala bím íngka darkaabomkai, “Milue agí méédem mepak ladokunía?”

³ “Mosi bí ingkueke nolum ngiitomtone?” emla bí ííyansuto.

⁴ Bulu pokai, “Mosi bí milue mekunana kakotko atbisula méngem meladoku emla tolíkbito.”

⁵ “Noluke aang angkam gekolokmin Mosi bí dem ayondem nolukepe atbitone” emla Jisu bí poyansuto.

⁶ “Idokom pílen ballendak delokai Shédí bí ‘bulum milo pelang delokke mimepe píto.’

⁷ Sok legalok milue agí ane abuem megeyéla delokke agí ménglo lekoyéku,

⁸ delokrongem annyide ‘dínbíng atelkope iyéku.’ Depe iname bulu angu eelenpe iyimayé, idakla atelpe ikai.

⁹ Delok legape ingkuem Shédí bí idum sutudí dem tanie ipan sukupe aimang.”

¹⁰ Bulu lekoda ekumlo duubo suyé kudem, luyilsuna kídíe sim legasim Jisume íngkíto.

¹¹ Bí pobikai, “Séko agí méngem mepak geyé langkula delokke angukon mimeko laayékudí, bí aku mimede akdope abír ine.

¹² Sékodí agí miluem mepak geyé langkula angukon milo kolo yéyékudí, bí abír ine.”

Koo Aména Kídíem Jisuke Lubéé Líkname

¹³ Ami kídíe koo aména kídarem Jisukíng bulum ukkí bidope emla bomabito, idakkom luyilsuna kídíde nooto.

¹⁴ Jisu bí dem kaayédem, bí míínyinge ikai. Bí pokai, “Koo aména kídíem ngokkíng aamotoka, delokke bulum luya mapeka, kapeila Shédíke amode sikena kookídí kemin.

¹⁵ Ngo nolum arorupe podung, séko koo ansoona kísape Shédíke yétem torík sumayédí bí delo edílokom aalamang.”

¹⁶ Delokrongem bí koo aména kídídem alaglo bola, bíkke alage buluke teyolo leetandola lubéélíkto.

Mirem Amiko

¹⁷ Jisu bí enpekolo gílen pakduem, amiko bíkkíng dugala bíkke alelo olíkla “Aina saare, ngo kape imíloi turyarna yénamem yébom yaryé kune” emla íngkíto.

¹⁸ “No kapeila ngom aine emla gokkane?” emla Jisu bí poto. “Sékote aina kamang, Shédí petommin.

¹⁹ No ngiitom kídarem kénsudung: ‘Ami petmapeka, abír imapeka, pyoomapeka, menam hakii bimapeka, yadmapeka, nokke ane abuem míngge langka.’ ”

²⁰ “Saare, sim takam sim ngo koo lokkekai bomdung,” emto.

²¹ Jisu bí kaasukai delokke bím ayange ikai. “Atel petomko no pííramdung,” emla bí poto. “Gílangkula nokke atí takamem koge yélangkula opan kídíem ortolangku, delo nokke kumsunge teyong amolo duuyé. Delokrongem kaju, ngokkíng gímín getola,” emto.

²² Delo ami delokke mingmode beggípkai. Bí buulangala gíkaku, kapeila bí sérang kana rungkuai.

²³ Jisu bí kanggo sudola bíkkíng luyilsuna kídíem pokai, “Mirem amikepe Shédíke amolo aanamde bomram runame!”

²⁴ Luyilsuna kídíe bíkke agomem talla sai emla mííto. Jisu bí lekoda poto kukéng, “Koo kídía, Shédíke amolo aanamde edítko bomram nampe idun!

²⁵ Mirem amie Shédíke amolo aapemílo uut simone pesi arulok pessuk namde ipoyaname.”

²⁶ Luyilsuna kídíde pakyape sai emla mííla akone akonem pobosukai, “Dekemílo séko turla yékune?”

²⁷ Jisu bí bulum kaasudola poto, “Shédíme emmape tanilok si ila sumaname; Shédíkelok atí takamem iladung.”

²⁸ Pitor bí bím poto, “Ngolu nokkíng gímín gekolok atí takamem mepaksuto!”

²⁹ “Ngo nolum arorupe podung,” emdola Jisu bí poyansuto, “Ekumem demangkom bírme bíruem, demangkom ane abuem demangkom ome-uem demangkom arík anamem ngok legapelang ngiitom tatpona legape mepaksuna takamde

³⁰ yédunam sokke (ekumem, bírme bíruem, ane abuem, ome-uem delokke arík anamem delokke bulukelok iréé kosunamde) delokke yépenamlo turyarnam amanem língko língkope ngatnape paayé.

³¹ Idakkom deddína amie kera neteng méélamyéku, delokke méélam neteng kerayéku.”

Jisuke Agí Sipenamem Lengumnape Pokan Subiname

³² Jisu bí bedangem enbola, bulu Jirusalem bedalo endungai delokke luyilsuna kídíe kapei emla míngkai, bíkkíng gímín genakídí deteng pesope mííto. Lekoda bí luyilsuna íying kolang annyiem gíngu subola bulum bíkke yépenamlo kape iyédí dem pobito.

³³ Bí poto, “Ngolu Jirusalemlo endak, delokke Tanike Uem rínekídí lolang ukil kídílo yadlíkyé. Bulu bím petdope luyin bosuyé delo mipak kídílo bím melíkyé,

³⁴ bulu bím lungil lusoola lula takil sukkatla díngka mokayé. Longum méélamlo bí gerepyéku.”

Jems Kelang Joanke Roguname

³⁵ Delokrongem Jemslang Joan bínyi, Jebedike oo kídíe, bíkkíng aato. “Saare, ngolu ingkuem rogududí dem no ibidomílo aido,” emto.

³⁶ “Nonyi ingkoko ngom imodomílo emla míídune?” emla bí íngkíto.

³⁷ Bulu pobito, “Ngonyim akone nokke lakbíklo delokke akone nokke lakkélo, nokke angun ralnam gooralo duumoyika!” emkai.

³⁸ “Nolu ingkuem rogududí dem nolu kénmang” Jisu bí emto. “Nolu ngok tíngko batilo tíímín gelayédí demangkom ngokke baptis ikolo nolu baptis ilamínyédí?” emto.

³⁹ “Ngolu ilayé” emla bulu pokai. Jisu bí bulum poto, “Nolu ngokke tíngko batilo tíímínlayé delokke ngokke baptis ikolo baptis imínlayé,

⁴⁰ idakkom ngokke lakbíklo demangkom lakkélo duudope inamde ngokke lokmang. Si among kídísi séko bulu kepe iruutudí bulu kepemin idune.”

⁴¹ Íyingde dem tayyédem, bulu Jems melang Joanme kangkie ito.

⁴² Jisu bí bulum tomdum sugeyéla poto, “Séko bulu mipak kídíke ruutumpe idudí bulu bulum yébodung, delokke buluke migom kídíde buluke teyolo ruutum agérem gérbodung, emnamdem nolu kénsudung.

⁴³ Idokom noluke teyolodan depe kamang. Dempenem séko bulu noluke gooralo botte lídudí bí buluke béérape ipe aido.

⁴⁴ Legade séko keralídudí bí takamke pakbo kísarupe ipe aido.

⁴⁵ Kapeila Tanike Uete igul kosupe emla tokmang, idakla ami takamem repít nadokupe agíke turnamem bisupe emlamin toktone.”

Mingmana Bartimaime Jisuke Ipíkuname

⁴⁶ Delokrongem bulu Jerikolo ento. Jisulang bíkkelo luyilsuna kídíde, deddína mibamdem lekope, taonem gíbíd dakkuem, Bartimai (bí Timaike ue) emnam mingmala magoo dogoola yénako bedang ampeng delo dungai.

⁴⁷ Bí Najareth lokke Jisume tatpang yédem, “Dabidke Oo, Jisu ngom ayatoyika!” emla gokto.

⁴⁸ Ami kídíe bím asoope emla lusiituai, idakkom bí mangkam yape goktoola pokai, “Dabidke Ue, ngom ayatoyika!”

⁴⁹ Jisu bí dakpodola, “Bím tomtoka!” emto. Depe iname bulu mingmana amidem tombito, “Ashélangka! Dareptola! bí nom gokdung.”

⁵⁰ Bíkke galugem lenggé supala, bí tíkrep danla Jisukíng aato.

⁵¹ “Nokkepe ngom no ingkoko imope míídune!” emla Jisu bí bím tatkíto. Mingmana amide poto, “Saare, ngo nom kaape míídung.”

⁵² “Gíkalangku” emla podola Jisu bí pokai, “Nokke míngkenge nom ipísutoku.” Menang asak bíkke amige kangkaku delokke bedadelok Jisukíng gímín geto.