MARK 1 - DEENA BAIBÉL (BSI)

Baptist Joanke Poboname

¹ Shédíke Oo Jisu Kristoke dooyingem polen puang agome.

² Sim Kaaluna miri Isaiahke kitablo attung, “Ngo ngokke kotokiem nokke kerape melíkyé, bí nokke bedangem iruubiyé.”

³ Mooruklo sikepe agom goknako tatto, “Ruutumke bedangem iruulangka.”

⁴ Dekepe iname mooruk amolo baptis ila delokke paab kídarem mesam biku penamem míílat sunakupe baptis inam legangem lubo pobola bí aato.

⁵ Judia amolokke delokke takam Jirusalem amikídíe bíkkíng gíto. Buluke paab kídarem pokan sukolok bulum Joan kelok Jordan asilo baptis ito.

⁶ Joan bí uut simon amítlok egepe gela, ayolok ugíílo uugpe gela, delokke pemír emlang ngullangem dotképe dotuai.

⁷ Delokke bí ngiitomem sikepe poto, “Ngokke méélampe ngom ralnam kayanako aayé, bíkke leyuk aanemte ngo gubadola taabi bamane.

⁸ Ngo nolum asilok baptis idung, idakkom bí nolum Deena Aidlok baptis iyé.”

Baptis Inamelang Jisume Darkaaname

⁹ Depe iduem Jisu bí Galil among Najareth doolulok aala Jordanlo Joankíng baptis isuto.

¹⁰ Jisu bí asilok darep yékudelo, Joan bí talengem barkédope kaala delokke Aide Jisukíng pekí kísape tokdope kaato.

¹¹ Delo taleng telok agomko pokai: “No ngokke Ue, nom ngo ayadung; nokkíng ngo mííyum sudung.”

¹² Menang asak Aidde bím mooruk amolo melíkto,

¹³ delo bím looying appiko mooruk amolo Soitane darkaato. Bí monkír kídí gooralo duuto delokke teyong kotoki kídíe bím kaabomto.

Esap Kuuna Appikonem Jisuke Tomname

¹⁴ Joanme pateklo merongem, Jisu bí Shédíke tatporuna ngiitomem pogoola Galillo gíto.

¹⁵ “Moodíe píngkai” emla bí poto, “Shédíke amonge anínkai. Míílat sulangkula delokke tatpona ngiitomem arope míílangka!”

¹⁶ Jisu bí Galil siyéng robelo gídagem, Simon melang bíkke bíro Andriame asi paatang delo esap kuudope kaato, legade bulu esap miyog ekíai.

¹⁷ “Aala, ngokkíng gímín getola, delo nolum ngo esaplok ami kuuna miyogpe imoyé,” emla Jisu bí tomto.

¹⁸ Menang asak bínyi esabem megeyéla bíkkíng gímín geto.

¹⁹ Bí anyongko gídokuem, Jebedike oo Jems melang bíkke bíro Joanme etkunglo esap podope kaato.

²⁰ Tekí teyang kamape bí bínyim tomsémto, delo bínyi buluke abu Jebedi melang hajirang ami kídíem etkung delo megeyéla bíkkíng gímín gesémto.

Urompe Tumna Amiko

²¹ Bulu Kapernaumlo gíto, delokke Sabbath nyodíe pííyédem Jisu bí kumkeng ekumlo gíla luyil poyil lento.

²² Amikídíe bíkke luyilem tatla sai emla mííto, kapeila bí ukil kísape imape, ralnam kasuna kísape bulum luyilto.

²³ Depe iduem buluke kumkeng ekumlo amiko urom duubomnamko, sikepe ulo gokto,

²⁴ “Najareth lokke Jisu, no ngolum ingkoko ipe míídun? No ngolum nyokmope emlangía aadune? No sékodí dem ngolu kéndung, no Shédíke Deena kotokie!”

²⁵ “Asope bíkke lokke gígéétoku” emla Jisu bí tolnamrupe luto.

²⁶ Atímana uyude amidem pesorupe dan go sumo geyéla delo bíkke lokke ngerpík langaala lenkaku.

²⁷ Ami takame kaperui emla míídola bulu mipile agí agíe lubosukai, “Si kape inamei, luyil aníko delokke ralnam kasunako! Bí uyuemte hukum binako delo bulute bím belenggedo.”

²⁸ Bíkke legange Galil among tabulo gígongkai.

Deddína Amiem Jisuke Ipíkuname

²⁹ Bulu kumkeng ekum delok gílen yékudem, Jems melang delokke Joanme lekope Simon kelang Andriake ekumlo aabosuto.

³⁰ Simonke ayo anede ippulo ramnam kila keddungai, dem bulu Jisume pobito.

³¹ Dekepe iname bí bíkkelo gíla, alaglok bím gakrepto. Ramnam kinamde gínyok kaku delo bí bulum ibo saabo lentoku.

³² Delo yumedelo doonyi uarongem kina amikídí takamem delokke uyu duubomnam kídíem Jisukíng aaboto.

³³ Taon tabung delokke amie eyab delo dumsukai,

³⁴ delo deddína angu angu kinam kana kídíem bí ipíto. Bí deddína uyuemkom monpaktoku, idakkom uyu kídíem bí agom pomomang kapeila bí sékodí dem bulu kéndungai.

Jisuke Galillo Pogoobiname

³⁵ Rokomope kaamo dungadape, Jisu bí gerepto, ekumdem mepala rongngamko amongkolo gíla delo bí kumsuto.

³⁶ Simonlang bíkke angong kídíe bím kaamín gepe emla gíto,

³⁷ delo bulu bím abaréméko, “Nom mipile matídung!” emto.

³⁸ Jisu bí, “Kaju ngolu doolung anínkolo gílaju, delote ngo pogoodope. Delok legapemin ngo aadune” emto.

³⁹ Dekepe iname bí Galil tabudelo, buluke kumkeng ekumlo poyilbola delokke uyuem monpakbola yéto.

Amikonem Jisuke Ipíkuname

⁴⁰ Tííd gena amiko bíkkíng aala lebíng koníla bím roguto, “Nokke míínam emílo, ngom no deemoyéku.”

⁴¹ Jisu bí ayang míípa sukane, bíkke alage meetardola amidem ukkíto, “Ngo míídung, deelangkuka” bí emto.

⁴² Depe idopagem tííde nyok langkula bím ipítoku.

⁴³ Jisu bí bím sikepe pogapdola melíktoku:

⁴⁴ “Sim séko meteng pomapeka dem no kéngap sulangka. Idakkom nodan gílangkula agíe miriem lengkan sutolangku delokke deedokupe Mosike pokampe amanem bitolangku.”

⁴⁵ Dem megeyéla bí gílangkula pomíípe popang kuname, agomde gígongkai. Dekepe ikolok Jisu bí taonlo kusiipe aala yimato idola luyulo rongngamko among kídar lomin dootone. Depe idolate ami kídíe bíkkíng rego regolok aatí teteto.