MALAKI 4 - DEENA BAIBÉL (BSI)

Ruutum ke Longe Legange

¹ Maglíngke Ruutum bí podung, “Berokpe longede píídak. Delo longe delo míngkímsuna kídíem, atímana agér mílílo itína kídíem, asék-arék, nyosuk-nyoruk kídíem emelo rombínnam kísa rombínyé. Appír, aag atíkote kaima dupe romkut-romlutyé.

² Idola ngokke agom-aangem tatna kídí noluke teyolo, ngokke deenam-ralname doonyi kísa saarepla asir kídíde ipítnamem bomabiyé. Delo bulu, gooru guallok melennam asarpe duggosuna gooru oo kísa ashéng alooyéku.

³ Dekepe ngokke agér idoku longe delo, nolu atímana kídíem ale tujém bomyéku, delokke bulu noluke lepyo rumkí lokke deemul kísa iyéku.

⁴ “Israel ami takame igela yédope, Sinai díítelo ngokke ayon kídíemla lulígnam kídíem, ngome agér ibina Mosikelo ngo bilíkla, bíkke luyilnam tabungem nolu mínggelangka.

⁵ “Kaatola, dekena botteruna reyubrunam Ruutum ke longe, píímang adape ngo kaaluna miri Elijah me melíkyé.

⁶ Bí abu kídíke aapíem oo kídíke aapílo gyabbo sudokupe, delokke oo kídíke aapíem abu kídíke aapílo gyabbo sudokupe iyéku; dekepe imamílo ngo agíe aalangkula asi-among deme pénam kolok nyokmoyéku.”