LUKKE ATNAM TATPONA DOOYINGE 8 - DEENA BAIBÉL (BSI)

Jisukíng Gímín Gena Mimekídíe

¹ Sokke méélamlo, Jisu bí taonlo delokke doolung doolulo Shédíke yéta dooyingem pogoobila gígooto. Midum íying kolang annyide bíkkíng yémín geto,

² delokke uyu duubom namem delokke kinamem ipíkunam mime kekom ayoko bíkkíng yémín geto; delok aradelok Magdalini emnam Mari bí, bíkkelok uyu kínítko lenkaku;

³ Herodke ekum erangem kaadu tattokna, Kujake méng Joanna; Susanna; delokke abíd abíde. Si mime kídísi agí agí sérang sulok bulum iguldungai.

Amli Pinnalo Luyiisuname

⁴ Deddína miti milinge, taon taon lokke amie Jisukíng aadum suduem, bí sim luyii sunam agom sim poto:

⁵ “Arík ina amikone amli pitpe emla gílento. Bí amlidem pinname, ayokone bedalo okai; dem tujém sayémla, delokke pettange doyinto.

⁶ Ayokone líírelo olíkkai, de siirep yédem asulde sukai kapeila de agíl kamato.

⁷ Ayokone taanyum tatké gooralo olíkkai, de siirep yédem taange dokato.

⁸ Abíde among ainalo olíkname de siirep yédem lííying língope pinnam amliem bojéyangko ayé éébitoku.” Bí dem poyédelo, “Séko nyorung gedudí bím tatsu motoka,” emla poto.

Luyii Subomname

⁹ Bíkkelo luyilsuna kídíde sim luyii subomnam si ingkuedí dem bím tatkíto.

¹⁰ Bí pobito, “Shédíke yétalokke arang agomem nolum bitung, idola abíd emdan ngo luyii sunamlok podung, kapeila “ ‘Bulu kaadokom, kangkénmang; taddokom tatkénmang.’ ”

Amli Pinnalo Luyii Sunamem Jisuke Pobeng Bikuname

¹¹ “Luyii sunam sokke legade si: Amlide Shédíke agome.

¹² Bedalo olíkna amlide, agomem taddungai idola bulu míngke sumape delokke turnamem paamadope Soitane delo aala buluke aapídelok agomem rotbín kunam amikídíe.

¹³ Líírelo ona kídíde agomem tatla ashépe laarík sudungai idola buluke appír leríng kamang. Buluke míngkede ool doomang, aro menam ikaa darkaayém bulu nyoksémyéku.

¹⁴ Taanyum gooralo olíkna kídíde séko bulu agomem taddung idakkom bulu yénam daknam, mirem sobo legange bulum edíí momape inam kídíe.

¹⁵ Idola moone kédelo olíknade agomem talla aapí arolok mínggap bomla, ardape ayém ééna kídíe.

Bayé Aralo Meru Nyotname

¹⁶ “Sékote meruem nyotpala, bayé aralo mela bisonang rumkílo menarung kamang. Depe imape, bí umké teyolomin dem aralo aana takame kaapa dope medune.

¹⁷ “Kapeila atí takamem kaamang kolo leesup supeko kamang, delokke mesup sunamem ingkuemte kénmape ipeko kamang demangkom laalen mape ipeko kamang.

¹⁸ “Delok legape kape kísa nolu taddudí dem kénsu langka. Séko kadudí bím bojéyape biyé; séko kamadí dem bíkke kadung emla míísunam anyong demte bíkke lokke laabínyéku.”

Jisuke Anelang Bírokídíe

¹⁹ Depe iduem Jisuke anelang bíro kídíe bím kaarík supe emla aato, idola bulu ami alung abam ikolok bíkke anínlo aalamato.

²⁰ Ami ayokone bím, “Nokke anelang bíro kídíe nom kaarík supe emla luyulo dakyadak” embito.

²¹ Bí poyansukai, “Séko bulu Shédíke agomem tatla dem igedudí, bulumin ngokke ane delokke ngokke bíro kídíe.”

Gumnamem Jisuke Eetet Mokuname

²² Longe konem Jisu bí bíkkelo Luyilsuna kídíem, “Kaju, sine paatang rotkonlo koolaju” emto. Depe iname bulu etkudelo reesala gílento.

²³ Buluke koodudem bulu ipmiyé ila ipto. Sinedelo gumname séngéépe ila etkude kuppé kupléla iname bulu míípeko upai kaimang.

²⁴ Luyilsuna kídíde gíla bím urepdola poto, “Saare, Saare, ngolu asi aadakbong!” Bí gerep langkula asaremlang silungem nooto; gumname remak kaku, delokke takame eetet kaku

²⁵ “Noluke míngkenge ingkolo?” emla bí bíkkelo luyilsuna kídídem luto. Bulu pesueku delokke mínga sudola mipil miyonge pobosuto, “Sékoi si ami si? Asarelang asiete bíkke agomem taddo!”

Urom Duubomnam Amikonem Jisuke Ipíkuname

²⁶ Bulu Galil siyéng rotkonlo duuna Geresen amodanpe yudato.

²⁷ Jisu bí moopílo oiyédem, taon delokke urom duubomnam amiko bím ríksuto. Si ami si ege galuk gemape demangkom ekumlo duumape, ago golulo deddína longem dunggooto.

²⁸ Jisume kaayédem, bí bottepe ulogokla bíkke alelo lebíng koníla poto, “Kedon yalumna Shédíke Oo Jisu no ngom ingkoko ipe emla aadun? Ngo nom rogudung, ngom iréémayika!”

²⁹ Kapeila Jisu bí deemana uromdem amidelokke gílen dokupe luto. Uromde bím duutí bomname, bíkke ale alagem íkolilok yééla sontori melíkla idokom, bí íkolidem bíntung bínyula, rongngamko amolo uromde bím gíboto.

³⁰ Jisu bí bím, “Nokke amíne ingkuedí?” emla íngkíto. “Urom maklínge” emla bí pobisuto, kapeila uyue bojéko bíkkíng angkai.

³¹ Delo bulum mongku mooralo melík madope bím rogu gutíto.

³² Éék yékbamko adi danlo dotagoola yéto. Urom kídíde bulum delo gímodope Jisume roguto, delo bí bulum gílado embito.

³³ Edílo bulu amidelokke lenlang kula, éék kídídelo angkadí delo yékbamde erak robengkíng dukboosula sine paatang delo olíkla asilo aayinkai.

³⁴ Éék kaabomna kídíde dem kaapala, bulu duklangkula, taon delolang dooludelo lubi kuname,

³⁵ delo ami kídíde depe inamdem kaape emla lomdum suto. Bulu Jisukíng aayédem urom gíruk kunam amidem Jisuke ale ampelo, ege galugem gela aapíe berok langkula duudope kaayédem bulu pesope mííto.

³⁶ Dem kaana kídíde kape kísa urom duubomnam amidem ipí tokudí dem legadem ami kídídem pokantoku.

³⁷ Delo Gerasen among tabulokke ami takamde Jisume bulu kelokke gígéé dokupe roguto, kapeila pesue mola yimape ito. Delo bí etkudelo renga langkula gítoku.

³⁸ Urom kídí lokke lenkuko amide bíkkíng gímín gepe emtuai, idokom Jisu bí bím sikepe polík dolangkula melíktoku.

³⁹ “Ekumlo gíka langku delokke edítko Shédí bí nokke legape ibitodí dem pokan tolangku.” Dekepe iname amide taon tabunglok gílangkula edítko Jisu bí bíkke legape ibitodí dem pobitoku.

Jairike Ome Delokke Jisuke Egem Ukkína Mimeko

⁴⁰ Supak Jisuke aalat yékudem, mibamde bím yamríkto, kapeila bulu takam bím míítíla dungai.

⁴¹ Depe idopagem Jairi emnam amiko, kumkeng ekumlokke ruutumko, aala Jisuke aledelo lebíng koníla, bíkke ekumlo aadope roguto;

⁴² legade bíkke dítage íying kolang annyina, ome atelde sipe ito. Jisu bí bedalo gídungem, milude bím elung elang ibomto.

⁴³ Delo mimeko dítag íying kolang annyikope iyyi bíttínako kato, idakkom sékote bím ipílamato.

⁴⁴ De mimede Jisuke méélamdelo aaníndola bíkke ege nomém ukkíto, delo menang asak bíkke iyyi bídnamde tengap kaku.

⁴⁵ “Sékoi ngom ukkítone?” emla Jisu bí íngkíto. Bulu takam togemape iyédem, Pitor bí poto, “Saare, ami kídíe lumbomdung delokke nom nyorkép bomdung.”

⁴⁶ Idakkom Jisu bí poto, “Amiko ngom ukkínako kato; ngokkelok pauare gílenkai dem ngo kénsudung.”

⁴⁷ Delokrongem de mimede, bí kénko sumape ikan mayé emnam dem kénsula, aala dandola bíkke alelo lebíng koníto. Ami takam kangko delo, kapeila bí Jisume ukkítone, delokke kape kísa bí letellok aikakudí dem lukan subito.

⁴⁸ Delo bí mimedem poto, “Ome, nokke míngkenge nom ipí sutoku. Aipe gílangkuka.”

⁴⁹ Jisu bí agom dem podung adape, kumkeng ekum ruutum jairike ekumlok amiko pííto. “Nokke omede sikai” bí emto. “Saar no míídír suyimangkom aiyé,” emkai.

⁵⁰ Dem tatla, Jisu bí Jairime poto, “Peso mapeka; arope míngke sulangka, delo bí aiyéku.”

⁵¹ Bí Jairike ekumlo pííyédem, bí séko meteng aamomape, Pitor melang, Joan melang delokke Jems, delokke koo delokke ane abuem aabola aradelo aato.

⁵² Takame koodem ankí kenuem kabbom rííbomla dungai. “Kabbom yimapeka,” emla Jisu bí poto. “Koo si simang ipdu namino” emto.

⁵³ Bulu koo sinamem kéndola, bím ngilkato.

⁵⁴ Idakkom bí koo dem alaglo bodola poto, “Ngokke kue gereptola!”

⁵⁵ Bíkke aide aatoku, delo bí dareptoku. Delokrongem Jisu bí koodem donam tíínamko bidope bulum políkto.

⁵⁶ Bíkke ane abude kaalom sukai, depe idokom Jisu bí ingkuem itodí dem séko mete pokan madope bulum lutumto.