LUKKE ATNAM TATPONA DOOYINGE 3 - DEENA BAIBÉL (BSI)

Baptist Joanbí Bedangem Mogebone

¹ Tiberi Kaisarke takying kolang takngonape gomte ruutumpe iduem, Pontio Pilat bí Judialokke rojape, Herodbí Galil lokke rojape, bíkke bíro Philip bí Ituria lokkelang Trakoniti amolokke rojape, delokke Lusani bí Abilen lokke rojape ila

² Anna lang Kaiapha bínyi ríne ruutumpe idungem Shédíke agome Jekariahke oo Joankíng mooruk amolo pííto.

³ Bí Jordan ayir agong doolung takamlo, paabem maab dokupe míílat suku nana baptis legangem pogooto.

⁴ De sikepe Kaaluna miri Isaiahke kitablo atnam kísape itung: “Mootum aralo goggoona adudko si, ‘Ruutumke bedangem iruulangka, bíkke bedangem jonmo langka.

⁵ Kogong mipíem biitenla dííte moopang miyongem kemap moyéku. Bekerna bedang kídarem jonmoyéku, gíítung gírungem melyi suyéku.

⁶ Delo takam amie Shédíke mopít namem kaapayéku.’ ”

⁷ Joan bí bíkkíng baptis isupe emla aana amikídíem poto, “Tabíke ome-oo kídía, séko nolum aapena Shédíke marpenam lokke duggedope lunootune?

⁸ Aapí míílat supenamem arda langka. Delokke nolu agí agísue ‘Abraham bí ngoluke abusupe duusudung’ emrísula duumapeka. Kapeila ngo nolum pobidung sok elíng kídarsok Shédí bí, Abrahamke legape ome-uem gerep molayé.

⁹ Egííde esingem teeletpe emla idubong; delokke aina ayé éémana esing miyongem teeletla emelo yoplíkyé.”

¹⁰ “Demílo ngolu kape imílo aiyén?” emla amikídíe íngkíto.

¹¹ Joan bí poto, “Galuk annyi kana amide agí galuk akonem kamana akonlo orsupe aido, delokke donam kana dete depe ipe aido.”

¹² Kajanang ulna kídíete baptis ikosupe emla aato. “Saare, ngolu kape imílo aiyén” emla bulu tatkíto.

¹³ “Noluke ulgíngem ulban mapeka,” emla bí bulum poto.

¹⁴ Delokrongem sipaying kídíete bím “Ngolukom kape ipe aidon?” emla íngkíto. Bí poyansukai, “Murkongem rotbín mapeka delokke amiem menamlok míngum mapeka- noluke iresunam delo eetetpe duurí sulangka.”

¹⁵ Ami kídíde ankípe mííbomla kayato delokke Joan bí Messiah emnam Kristope ibange emla buluke aanglo mííto.

¹⁶ Joan bí bulum takamdem pobito, “Ngo nolum asilok baptis idung. Idakkom ngompenem pakyape pauar kana amiko aadak, ngo bíkke leyugemte yukbín bamane. Bí nolum Deena Aid loklang emelok baptis iyé.

¹⁷ Amyangem amgílok kabbín nana epode bíkkelo dung. Amdem bík kumsunglo gekumyéku, idola amyadem miyyi mana emelo romlíkyé.”

¹⁸ Delokrongem abíd abíd ngiitomem sikbila delokke tatpona dooyingem ami kídíem pobito.

¹⁹ Idakkom Joan bí Herod rojame agíke aní méng Herodiame bomla delok teyolo, deddína atímana agérem ikolok bím luto.

²⁰ Delokke teyolo, Herod bí Joanme pateklo líkla pakyape paab iko teyolo paab ito.

Jisume Baptis Iname

²¹ Ami takamem baptis idodelo Jisu mekom baptis ito. Delo bíkke kumsu dodem teyong eyabe siyyato

²² delokke Deena Aide pekí kísape batla bíkkíng oito. Delo teyong telok, “No ngokke ayarunam Ue, nokkíng ngo airupe ashédung,” emnako kato.

Jisuke Odonge

²³ Supak Jisuke tagying angumko iduem bí agérem ilento. Amikídíe míínampe bí Josephke ue, Joseph bí Hellike,

²⁴ Heli bí Mathatke, Mathat bí Lebike, Lebi bí Melkike, Melki bí Jannaike, Jannai bí Josephke

²⁵ Joseph bí Matthathiaske, Matthathias bí Amoske, Amos bí Nahumke, Nahum bí Eslike, Esli bí Naggaike,

²⁶ Naggai bí Maathke, Maath bí Mattathiaske, Mattathias bí Semeinke, Semein bí Josekke, Josek bí Jodake,

²⁷ Joda bí Joananke, Joanan bí Resake, Resa bí Jerubbabelke, Jerubbabel bí Shieltielke, Shieltiel bí Nerrike,

²⁸ Neri bí Melkike, Melki bí Addike, Addi bí Kosamke, Kosam bí Elmadamke, Elmadam bí Erke

²⁹ Er bí Joshuake, Joshua Eliejerke, Eliejer bí Jorimke, Jorim bí Matthatke, Matthat bí Lebike,

³⁰ Lebi bí Simeonke, Simeon bí Judahke, Judah bí Josephke, Joseph bí Jonamke, Jonam bí

³¹ Eliakimke, Eliakim bí Meleake, Meliak bí Mennake, Menna bí Mathatake, Mattatha bí Nathanke Nathan bí Dabidke,

³² Dabid bí Jesseke, Jesse bí Obedke, Obed bí Boajke, Boaj bí Salmonke Salmon bí Nahshonke,

³³ Nahshon bí Amminadabke, Amminadab bí Ramke Ram bí Hejronke, Hejron bí Perejke, Perej bí Judahke,

³⁴ Judah bí Jakobke, Jakob bí Isaakke, Isaak bí Abrahamke, Abraham bí Terahke, Terah bí Nahorke,

³⁵ Nahor bí Serugke, Serug bí Reuke, Reu bí Pelegke, Peleg bí Eberke, Eber bí Shelahke,

³⁶ Shelah bí Kainamke, Kainam bí Arphakshadke, Arphakshad bí Shemke, Shem bí Noahke, Noah bí Lamekke

³⁷ Lamek bí Methuselahke, Methuselah bí Henokke, Henok bí Jaredke, Jared bí Mahalalilke, Mahalalil bí Kainanke,

³⁸ Kainan bí Enoske, Enos bí Shetke, Seth bí Adamke, Adam bí Shédíke ue.