LUKKE ATNAM TATPONA DOOYINGE 23 - DEENA BAIBÉL (BSI)

Jisume Pilatke Keralo Bomaname

¹ Delokrongem kebang tabude gerepla bím Pilatkíng gíboto.

² Delo bulu bím sikepe ajéng luketla luto, “Ngolu sim ami sim ngoluke opínem bulmokanpe antung. Bí Kaisarme kajanang binamem akdung delokke agíem Kristo roja emsudung.”

³ Dekepe iname Pilat bí Jisume, “Nua Judai kídí lokke roje?” emla íngkíto. “E, nokke ponam pakde” emla Jisu bí poyansuto.

⁴ Delokrongem Pilat bí rínekídí lolang delokke mibam delo pokan bito, “Ngo sim ami sim ajéng luketnam leríng mapaamang.”

⁵ Idakkom bulu pokam keramkai, “Bíkke luyillok Judia among takame belengkai. Bí Galillokke ilangala enko tabung sope engen modung.”

Jisume Herodkíng Melíkname

⁶ Sim tatla, amide Galil amikodí emla Pilat bí íngkíto.

⁷ Edílo bí Jisu bí Herodke among goora lokke emla kéntodí, delo bí Jisume depe iduem Jirusalemlo duuna Herod kíng melíktoku.

⁸ Herod bí Jisume kaayédelo, bojérupe ashénge ito kapeila kerango pekai bí Jisume kangkírupe emla míítíto. Jisuke legangem bíkke tatnampe, bí irisinyo ayoko ibidomílo emla mííbomto.

⁹ Bí deddí kokai agomem ínge íngkurla Jisume ííto, idokom Jisu bí bím atí poyansumang.

¹⁰ Ríne kídí elang ukilkídíe delo dakla agírupe ajéng luket líkdung.

¹¹ Delokrongem Herodlang bíkke sipaying kídíe bím lupu luyééla ngilka songkaala ito. Galuk bodonako píllík pala bulu bím Pilatkíng melat líktoku.

¹² Delo longedelo Pilatlang Herod bínyi angong kumsupe ikai. Sokke kerape annyi si mirupe mííbo sudungai.

Jisume Petdope Luyinname

¹³ Pilat bí rínekídí emlang ruutum kídí emlang ami kídíem tomdum supala

¹⁴ bulum poto, “Nolu sim ami sim ami kídíem ebín bonakope mííla bomatung. Ngo noluke keralo íngka bengkaname, noluke bím ajéng luket peko leríng ngo mapaamang.

¹⁵ Nolu agíe kaasudung, Herod teng bím lukapeko bedang kaapa mala, ngolukíng bím melat sutungku.

¹⁶ Delok legape ngo bím ingéé geyéla delokrongem bím melenyéku.”

¹⁸ Podu attellok bulu, “Sim ami sim nyokmotoka! Barabbame ngolum melen bikui!” emla ugonla poto.

¹⁹ (Barabba me taonlo ebín ibola ami petgalok pateklo metungai.)

²⁰ Jisume melenkupe míídola Pilat bí bulum rogu tokuai.

²¹ Idakkom bulu, “Bím pansaatoka, bím pansaatoka!” emla goktíbomto.

²² Lengumnape bí bulum poto, “Kapeila? Ingkona imemko si ami si itune? Ngo bím pansaa nana leríng mapa rumang. Delok legape ngo bím mongéé geyéla melen yéku.”

²³ Idakkom bulu bím pansaape aido emla botteyape manduk yayang ibomkai, iname buluke tayyémpe mankolok ikai.

²⁴ Delo Pilat bí buluke konamem ibipe emla míílen sukai.

²⁵ Bí amikídí lokke kolen kunam ebín ibola, ami petkolok patek líknam amidem melen bitoku delokke Jisume buluke mínggípe iyépe emla melíkto.

Jisume Pansaaname

²⁶ Bulu bím gínyok bodagem Kureni lokke Simon emnam amiko gakla krossdem bíkke gordulo pyalíkla Jisuke méélamdelo joola gímoto.

²⁷ Deddína miti milinge bím ankína mime kídíe bíkkíng gímín geto.

²⁸ Jisu bí ngengkut sudo langkula bulum poto, “Jirusalem lokke ome kídara, ngokke legape kapmapeka; nolu kepelang noluke ome-oo yétíng legape kaplangka.

²⁹ Kapeila ‘Koo omana negen kídíe delokke anyun sunkí mana mime kídíde gérne!’ emla noluke podí longeko pííyé.

³⁰ Delokrongem, bulu dííte moopangem poyé, ‘Ngolum benjéttoi!’ Delokke edíng eragem poyé, ‘Ngolum bénlumtoi!’

³¹ Esing ane yayii dungadape tanie depe imílo sokke ereng yékuem kape iyén?”

³² Ayonlok imemna midum annyikote, pansaape emla bíkkíng bomtaksuto.

³³ Bulu tuklong among emkodelo pííla bím delo bottepe imemna ami annyi demteng akonem bíkke lakbík danlo delokke akonem bíkke lakké danlo lekope bím pansaato.

³⁴ Jisu bí pokai, “Yayie, bulum maab langka, kapeila bulu ingkuem idudí dem kénsumang.” Delo bulu luturi sola bíkke ege kídíem orpansuto.

³⁵ Ami kídíe kaala dakkai, delokke ruutum kídíe bím ngilkaato. Bulu pokai, “Bí abídem mopítdo; bí ullennam Shédíke Kristomílo, agíem mopít sumotoku.”

³⁶ Sipaying kídíete aala bím luman lusanto. Bulu bím onggur alangem bidola

³⁷ pokai, “No Judaikídíke Rojemílo, agíe mopít sukíto.”

³⁸ Delo bíkke teyodelo sikepe atbila medak; SI JUDAI KÍDÍ LOKKE ROJE.

³⁹ Imemkolok pansaanam ami akon dete bím lupu luyééla luto, “No Kristo manía? Agíemlang ngolum mopít tokupena?”

⁴⁰ Idola akonde bím ludola poto, “No agíete akamope pansangkolo daklate Shédíme peso manía?

⁴¹ Ngolum aro ayonlok ingéétung, kapeila ngoluke agér adulok ngolu sim paadung. Idola si ami si atí imem kama nakuai.”

⁴² Delo bí Jisume poto, “Jisua nokke rojape aayékuem ngomkom míípang sulangka.”

⁴³ Jisu bí bím poyansuto, “Ngo nom aruem podung, silo no ngokke yékolo yémín geyé.”

Jisuke Siname

⁴⁴ Depe iduem konang bajilokke ila adeng angum bajilope among tabude kaamue ito,

⁴⁵ kapeila doonyie angun biyimato. Delokrongem kumkeng ekum delokke lamgé donkom nana ege annyikope bétpan sukai.

⁴⁶ Jisu bí agíípe ulo gokla pokai, “Yayie, nokke alaglo ngokke aidem melík sudungku.” Bí depe emdola bínkai.

⁴⁷ Sipaying ruutumkone dekedem kanggeyéla Shédíme yidgeto delokke poto, “Berok si ami si deena amikuai.”

⁴⁸ Pansaa namem kaape emla aana ami takame kape ikadí dem kényin kaayinto, bulu agí angkengem kíssu langaala gíkaku.

⁴⁹ Idakkom bím kénna kídíe Galil lokkekai mamín gena mime kídíete ampelo sim atí takam sim kaala dakto.

Jisume Yuname

⁵⁰ Depe iduem kebang ruutum membor, milo arona, edíína, Joseph emnamko,

⁵¹ buluke luyin iyin namem tolík mínmana amiko katuai. Bí Judialo duuna Arimathia taonlo duula Shédíke yétem toya nakuai.

⁵² Pilatkíng gíla bí Jisuke simadem koto.

⁵³ Delokrongem bí dem laayila egelok yéllum pala lííreng líípíklo sékomete yukímangko agolo yuto.

⁵⁴ De iruu sarudí longe, delokke Sabbath longe anínpage.

⁵⁵ Galil lokke Jisukíng mamín gena mime kídíe Josephkíng gímín gela agodelo bíkke simadem kape kísa yutodí dem kaato.

⁵⁶ Delokrongem bulu ekumpe entoku delokke késiképa delokke nampona atíeke iruuto. Idola bulu Sabbath longedelo ngiitom agompe nyola duuto.