LUKKE ATNAM TATPONA DOOYINGE 21 - DEENA BAIBÉL (BSI)

Meyéng Ane Kolokke Dokang Biname

¹ Jisu bí kaasuname, mirem ami kídíe buluke dokang amanem kumkeng ekumlokke dokang mekolo líkdope kaato.

² Bí opan meyéng kote pirling annyi petomko líkmín gedope kaato.

³ Jisu bí pokai, “Ngo nolum aruem pobidung, si opan meyéng si takam lokke bojé yalumpe bito.

⁴ Si ami takam si dokang amanem buluke agí kadulok líkto; depe idola si mime ane si opane séngé dolate bíkke dopenamem bingumsuto.”

Kumkeng Ekum Lokke Bénku Penamem Jisuke Pobiname

⁵ Bíkkelo luyilsuna kídí ayokone sim kumkeng ekum sim edítna kamporuna elí lok Shédíme biman sunam amanlok píname emla manto. Idakkom Jisu bí pokai,

⁶ “Noluke supakke so sikepe kaanam kísape elíng teyolo elínge kumten kumlem suyimadí longeko pííyé, delo elíng miyode bényéku.”

Adírdí Longe

⁷ Bulu ííto, “Saare, edílo de atí takamde aroyéne? Delokke moodílo ingkona iyode pííyéne!”

⁸ Bí Poyansuto, “Nolum yadpelo, ansulangka. Kapeila deddína amie ngokke amínem tosula, ‘Ngomin Jisu, moodíe anín dubong,’ emla manyé. Bulum aro míímapeka.

⁹ Nolu midu mimagem tayyém pesope mííma peka. Si atí kídarsi kerape kaperung aiyé, idakkom yéyin longe delokom píímang.”

¹⁰ Delokrongem bí bulum poto, “Opín opíne, delokke among amonge mirolpe lenbosuyé.

¹¹ Delo mooton taron mílí, dírí keno mílí among regolo iyé, delokke pesorunam delokke kangkí rumanam iyode taleng telo lenyé.

¹² Idakkom sok kerape bulu nolum umla iréé sinyola iyé. Bulu ngokke legalok nolum kumkeng ekum kídarlo pateklo mela, gobornor delokke roja keralo melíkyé.

¹³ De ngokkepe nolu buluke keralo hakii bidope iyé.

¹⁴ Idokom noluke aapí aange agíem kapei popít supene emla míídír sumapeka.

¹⁵ Legade nolum akna kídíe sékote pokí sulamanam gyanem nolum ngo biyé.

¹⁶ Noluke agí ane abue, bíro kídíe, edung erang kídíe, angong arum kídíe míírí míínyola, bulu nolum ayokonem petyé.

¹⁷ Ami takame ngokke legalok nolum akyé.

¹⁸ Idakkom noluke dumpong lokke dumíd míyyong kokom idílmayé.

¹⁹ Noluke mínggap sulok nolu turnamem paasuyé.”

Jirusalem Lokke Nyokku Penamem Jisuke Pobiname

²⁰ “Edílo nolu Jirusalemem sipayinge gargoodope kaayédí nolu kénlangka nyokmona atíe aníndung.

²¹ Depe iyém Judialo yénakídíe díítelo dugge langka, taonlo yéna kídíe gílen gelangka, delokke doolulo yéne taonlo angge mapeka.

²² Kapeila simin atla menam agomem aromopena anngéé sudí longe.

²³ Nganga gena delokke anyun sunna mime kídí kepe edítko de longe kídíde pesonampe iyéne! Delo amodelo atung arééyé ila amikídí teyolo Shédíke marlínge pííyé.

²⁴ Bulu yoksa aarlo siyé delokke opín rego mipílo abílpe umpit kosuyé. Jirusalem dem mipak amikídíe kurukyé, delokke buluke moodíe píímang adape dekepe bulu yébomyé.

Tanike Oolok Angkuname

²⁵ “Doonyilo, poololo delokke takar kídílo iyode lenyé. Amoso siyéng asie gumnam kísape nudu nutokla ikolok tanie kape ilapei emla míngasuyé.

²⁶ Tani kídíe tani amoso angkupena pesorunam atíem kaala ngegoo suyé, kapeila taleng telokke atí takame engenyé.

²⁷ Depe iduem Tanike Uem ralnamrupe delokke erkí gedope doomuglok aadakkupe bulu kaapayé.

²⁸ Si atí kídar si lenyémílo, dakrepla alage meedusula kumlangka, kapeila nolum repít díku longe anín dubong.”

Tapang Esing Anelok Kangkén Suname

²⁹ Jisu bí bulum sim luyii sunam agom sim pobito: “Tapang anemlang esing takamem kaasutola.

³⁰ Edílo ayine yinlen yédí, nolu agísue díyue aadakku emla kénsudung.

³¹ Dekepe edílo nolu sim atí kídar sim ilendope kaayédí Shédíke amonge anín dubong emla nolu kénsu langka.

³² “Ngo nolum arope podung, si yérumsi atí takam si pííyinmang tetengem berokpe nyokmayé.

³³ Taleng elang amonge nyokyé, idakkom ngokke agom kídarsi nyokyimayé.

An-gap Supename

³⁴ “Ansu langka, demamílo noluke aange tebege ila tíngírsula peso atí kamape dunge suduem de longede egum barunam kísape míínam sudí mangem nolukíng aapeke.

³⁵ Kapeila si tani among teyoso dungkína takamso pííyé.

³⁶ An gap suyar langka delokke nolu sikepe ipenam takamlo olík madope delokke nolu Tanike Uem dakríksula dope agínpe kumyar sulangka!”

³⁷ Loodíke Jisu bí kumkeng ekumlo ngiitom poyil bodungai, delokke yumdíke Olib emnam Díítelo yuem duulík kape emla gíyar dungai

³⁸ delokke ami takame rokompe kumkeng ekumlo bíkke luyilem tatkape emla gídungai.