LUKKE ATNAM TATPONA DOOYINGE 20 - DEENA BAIBÉL (BSI)

Jisuke Ralnamem Íngkí Bengkíname

¹ Longekonem ami kídíem Jisu bí kumkeng ekumlo ngiitom luyilbola delokke tatpona ngiitomem pogoola yédungem, ríne kídíelang ukilkídíe, miro kídíem lekope bíkkíng aabosuto.

² “Ingkona ralnamlok no sim atíkídí sim idune?” emla bulu pokai, “Sékodí nom sim ralnam sim bitune?”

³ Bí poyansuto, “Ngokom nolum agomko íngkípe. Ngom pobitola,

⁴ ‘Joanke baptis inamde teyong telokkía ma, tani kídí lokkía?’ ”

⁵ Bulu buluke aralo luposudola pobosuto, “Ngolu ‘teyong telokke’ emmílo bí, ‘Kapeila nolu bím aro míímane?’ emla tatkíyé.

⁶ Delokke ngolu ‘Tani lokke’ emmílote ami takam si ngolum elínglok geyé, kapeila Joan bí kaaluna miriko emla bulum pobitung.”

⁷ Dekepe ila bulu poyansukai, “De ingkolokdí ikane ngolu kénmang.”

⁸ Jisu bí poto, “Demílo ingkona ralnamlok sim atí kídí sim idudí ngokom pobimayé.”

Aríklo Bara Ina Amikolo Luyiisuname

⁹ Bí sim luyiisunam agomsim ami kídíem poboto: “Amikone aríkko kato, dem bara ina ami kídílo bipala mootengko amolo oolko yéto.

¹⁰ Ali gaddíku moodílo amide béérangem bara ina ami kídílo, bulukelok ali ayokonem laadokupe emla melíkto. Idakkom bara ina ami kídíde bím demla delokke arape melíktoku.

¹¹ Bí angukon béérangko melíktoku, idola arík ina ami kídíe bímte demla iréé sinyola ipala arape melíktoku.

¹² Bí lengumnape ako melíkto kukéng, dem bulu modíp geyéla elpakto.

¹³ Delokrongem arík atode pokai, ‘Ngo kape imíloi? Ngo ngokke ayanam uem melíkpe, bulu bím míngge yépe emla míídung.’

¹⁴ Idakkom bara ina ami kídíde bím kaayédem bulu agomdem porubosuto. Bulu poto, ‘Simino ruutum doge penade, kaju bím mokalaju, delomin ruutum doge penamde ngolukepe iyéne.’

¹⁵ Dekepe iname bulu bím arík ramgomlo gíbola petto. “Delo arík atode bulum ingkoko ipene?

¹⁶ Bí aala bara ina ami kídí dem petgeyéla angukonlo arík dem biyé.” Dem ami kídíde tayyédem bulu “Depe ima rudak langka” emla poto.

¹⁷ Jisu bí jonnampe bulum kaasudola íngkíto, “Demílo sikepe atbomnam ortode ingkuedi: “ ‘Ekum mona kídarlokke mepaknam líídude takam lokke míngkepe ikaku.’

¹⁸ Delo elídelo olíkna mipíde ammín kope iyé, idakkom líítam delokke ojétnam mipídem lajépyé.”

Kajanang Bigangem Íngkí Bengkíname

¹⁹ Ukil kídí elang ríne kídíe bím menarupe umpe emla pongkok mata tatíto, kapeila bulummin sim luyiisunam agom sim pobomdune emla bulu míísuto. Idola ami kídíem bulu pesoto.

²⁰ Jisume an gap dope emla bulu aina dengena amipe iruna amieke bulu melíkto. Bulu Jisuke ponam agom kídarlok atíko gakla bím pauar kana ruutum kídílo delokke gobornorlo melíkdope emla mííbomto.

²¹ Dekepe iname miru kídíde bím íngkíto, “Saare, no aina agomem poyil luyilla inamem ngolu kéndung, delokke no lungu pongu agom pomang idakkom aro bedalok Shédíke agom emmin pobodune.

²² Kaisarme kajanang binamde bibaadunía ma, bibaamanía?”

²³ Idokom Jisu bí buluke budii aapíem kéndola bulum poto,

²⁴ “Ngom nokdiko lengkantola. Sékoke mimang elang amíne delo kadune?” “Kaisarke” emla bulu pobito.

²⁵ Bí bulum poto, “Demílo Kaisarke atíem Kaisarme bitola, delokke Shédíke atíem Shédíme bitola.”

²⁶ Bulu bím bíkke ami kídí keralo políknam agomlok mokit latomang. Delokke bíkke pobinam agomem tatla, bulu asoope dungkai.

Sikolokke Gerepkunam Legangem Íngkí Bengkíname

²⁷ Gerep kunamem aro míímana, Sadduki eke ayoko aala Jisume íngkíto.

²⁸ “Saare” emdola bulu ííto, “Mosi bí ngolum sikepe atbitung, ami akonlokke bírokone méngem ome-oo kamape sinyola imílo amide meyédem laalangkula bíkke nyokna bíro delok legape ome-oo obiladoku.

²⁹ Supak bíro kumsu kínítko katuai.Kerangkede méngko laato de ome-oo kamape sinyokai.

³⁰ Annyinape nadete depe ikai

³¹ delo angum nape nadete depe mime dem laala akamope ikai delokke kínít nape nadete ome-oo kamape sinyokai.

³² Méélamdem mimedete singum kai.

³³ Supak demílo, kínít dekai méépe bím iname, gerepdíku longelo, sékoke méépe bí iyékun?”

³⁴ Jisu bí poyansuto, “Silo meloke ami kídíe mime laala delokke milo ila idung.

³⁵ Idakkom mime dekom milo dokom angkupena gerepdíku longelo gerep kupenade milo méng imayé,

³⁶ delo bulu siyimayé; kapeila bulu teyong kotoki kídí kísape iyé. Bulu gerepkuna tanipe iname, bulu Shédíke ome-oo kísape iyéku.

³⁷ Sinam lokke gerep kunam legangem Mosi bíte berokrupe lengkan bitung. ‘Payémlo eme dorna’ emkolo bí Ruutumme, ‘Abrahamke, Isaakke delokke Jakobke Shédí’ emla mantung.

³⁸ Bí sina kídíke Shédímang, idakla turna kídíke Shédí emin, kapeila bíkke lokmin takame turdune.”

³⁹ Ukil ayokone dem tolíkdola pokai, “Saare, de arodung!”

⁴⁰ Delokke sékote bím íngkí bengkítope emla míílana kaimang.

Messiahke Legangem Íngkí Bengkíname

⁴¹ Delokrongem Jisu bí bulum poto, “Bulu kape kísa Kristo bí Dabidke Ue emkane?

⁴² Dabid bí agíe Mirilunggu Kitablo sikepe posutung: ‘Ruutum bí ngokke Ruutumme pokai;

⁴³ ngokke lakbíklo duulangka noluke miru kídíem ngokke ale rumkílo tujémmang tetengem.’ ”

⁴⁴ Dabid bí “Ruutum” emla gokto. “Demílo Jisu bí Dabidke oope iyénía?”

Ukil Kídíem Jisuke Luname

⁴⁵ Takam amie tatla duudungem Jisu bí bíkkelo luyilsuna kídíem poto,

⁴⁶ “Ukil kídíem ansu langka. Bulu galuk edorna gela gígoolídung, dukan bojarlo kaarík irík kosulídung, kumkeng ekum kídarlo aiyalumna dungkuem matadung delokke dokul tíngkullo mínggepeko dungkolem mííbomdung.

⁴⁷ Bulu meyéng ekum kídíem rotkamdung delokke kaayé tayyépe emla bodo dora kumdung!”