LUKKE ATNAM TATPONA DOOYINGE 19 - DEENA BAIBÉL (BSI)

Jisulang Jakai

¹ Jisu bí Jeriko doolung raadalok gídagai.

² Delo Jakai emnam amiko kato. Bí kajanang ulna ruutumpe ila mirem nakuai.

³ Bí Jisu de kape nakodí dem kaaperung emla mííto; idakkom andena amipe ikolok mibam raadadelo bím kaapí mínmato.

⁴ Dekepe iname bí kerape dugge dolangkula Jisuke gídagem kaape emla tapang esing anekolo reesangkai.

⁵ Jisu bí delo amodelo pííyédem, bí kaadu sudola bím poto, “Jakai menape oitolangku. Ngo nokke ekumlo silo duuperung aiyé.”

⁶ Dekepe iname bí menang asak oilangkula bím aipe kaarík sutoku.

⁷ Ami takame dem kaayédem bulu, “Bí paabgena lokke mibope idak” emla posi porumsula ito.

⁸ Idola Jakai bí darepla ruutumme poto, “Ruutume, kaasutola! Supak ngo ngokke sérang attung konem opan kídíem bipe delokke ngo atíkon legalok yattumílo, ngok yadnam poisarem lempiko bojéyape bikupe.”

⁹ Jisu bí bím pokai, “Silo turname so ekumso aadung, kapeila si ami sikom Abrahamke ue.

¹⁰ Legade Tanike Ue nyoknem mata langkula mosing kakupe emla aato.”

Uun Murkolo Luyiisuname

¹¹ Bulu dem tatgapla duudungem, bí bulum luyiisunamko pobipe ito kapeila bí Jirusalemlo anín dungkubong delokke ami kídíe Shédíke amonge letellok lensémyé emla míítuai.

¹² Bí poto, “Milo aroko mootengko doolulo agíe rojape ulko sugeyéla enlangkupe emla míínako kato.

¹³ Dekepe iname bí bíkke béérang íyingko tomla bulum uun murkong íyingko bito. Bí pokai, ‘Ngokke angku mangem sim murkong sim agér gérna langka.’

¹⁴ Idakkom bíkke yébonam ami kídíde bím akkai delokke bíkkíng ami melíkla, ‘Sim ami sim ngoluke rojape imolímang’ emla pokai.

¹⁵ “Depe idokom bím rojape ullenla bí ekumpe entoku. Delo bí bíkke murkong bilíkko béérang kídíem, delok murkong delok edítko paapek lentodí dem kaape emla gokto.

¹⁶ Kerangkede aala poto, ‘Saare uun balying lok balying konko paapekto.’

¹⁷ ‘Ngokke mííyum sunam béérange, airudo!’ emla bíkke ruutumde poyansuto. ‘Kapeila no ansoona atílote mínggap bomto, taon íyingem yébom langka.’

¹⁸ Annyi nanade aala pokai, ‘Saare, nokke uun aballok balngoko bojéyape paabanto.’

¹⁹ Bíkke ruutumde pokai, ‘No taon pilnguem yébom langka.’

²⁰ “Delokrongem béérang akonde aala pokai, ‘Saare, sina nokke murkonge; ngo gayin alopkolo yélla sim mesiito.

²¹ Ngo nom pesoto, kapeila no kaníína amiko. No agíe ibo saabonape imape igeyéla, ali petomem laapítkune’ ” emto.

²² Bíkke ruutumde poyansuto, “Ngo nom atímana bééra nom nokke agomsu delok bisar nayé! Ngo kaníína amiko, ngokke imanamem ngo laado kupe delokke ngokke lelík manamem no ngom gaddokupe kéndonía?

²³ Demílo ngokke aayékuem bojéyape paapek dokupe emla no kapeila ngokke murkongem bénglo memane?”

²⁴ “Delokrongem bí ampedelo dakna ami kídíem poto, ‘Sim uun abal sim bíkke lokke laalang kula uun balying bomna amidem bilangka.’

²⁵ ‘Saare, bí balyingko kadung’ emla poto.

²⁶ Bí poyansuto, ‘Nolum ngo podung, bojépe kana mipíem bojépe bitemyé, idakkom atíkote kamana dem anyong demte laabínyéku.

²⁷ Idokom buluke teyolo ngom roja imolímana mirukídíem so langaala ngokke keralo petpakto.’ ”

Jisuke Jirusalemlo Miramrupe Aaname

²⁸ Jisu bí dekepe porongem, bí Jirusalem lope kerape gígeto.

²⁹ Bí Olib dííte emnam etpang doolung bethpage lolang Bethanilo píínín yédem, bí bíkkelo luyilsuna annyiko bulum sikepe polík dola melíkto,

³⁰ “Noluke kerangke doolung delo gíkala, delo nolu pííyém ami reesang kímanam gado ooko ríntupe kaayé. Dem taala so buatokui.

³¹ Akone nolum, ‘Kapeila nolu dem taalíkdune’ emyémílo, bím potoka, ‘Ruutum bí dem míídung.’ ”

³² Megenam kídíde bíkke bulum pokam pakpe paato.

³³ Bulu gado oodem taalíkdungem delokke atode bulum íngkíto “Nolu kapeila gado oodem taalen dune?”

³⁴ Bulu poyansuto, “Ruutum bí dem míídung.”

³⁵ Bulu dem Jisukíng bua langkula, sokke teyolo ege pulíkla Jisume delo duumoto.

³⁶ Bíkke gídungem bedalo egem pubito.

³⁷ Bí Olib díítelok tokkuna bedang delo píínín yédem, luyilsuna kídíke yébonam milung apííde buluke irisinyo inam kídarem kaanam legape Shédíme írgarupe yidgeto.

³⁸ “Ruutumke amínlok aana rojade gérne!” “Teyolo yéponame delokke angun ralname Shédíkíng duudak langka!”

³⁹ Mibam delo yéna Pharisi ayokone Jisume poto, “Saare, nokkelo luyilsuna kídarem lutola!”

⁴⁰ “Nolum ngo podung,” emla Jisu bí pokai, “Bulu asoope imílo elíng kídare goklenyé.”

Jisuke Jirusalemlo Kapname

⁴¹ Bí Jirusalemlo píínínla taondem kaato, bí delo kapto

⁴² delokke pokai, “Nolu silo kénsu tuamílo edítko yéponamem paayane. Idakkom supak sim kaapamang!

⁴³ Longeko noluke mibo mirue aala yapgo molíkla delokke nolum gargoola rego mipílok uujét aabomyé.

⁴⁴ Bulu nolum noluke yapgo gooralo petyé, delokke noluke moolopso elíng atelkote melík mape idí longe nolukíng pííyé, kapeila Shédíke nolukíng angku penam longem nolu kénsumato.”

Jisuke Kumkeng Ekumlo Gíname

⁴⁵ Delokrongem bí kumkeng ekumlo gíla pesi koret ina kídíem monpak lentoku.

⁴⁶ Bí ami kídíem poto, “Sim sikepe attung, ‘Ngokke ekumde kumkeng ekumpe iyé;’ idola noludan sim doppyo tíísina matgope ibomdung.”

⁴⁷ Loodípe bí kumkeng ekumlo ngiitom luyil dungai. Idakkom ríne kídíela, ukil kídíe delokke ami kídíem yége daggebona kídíe bím petpe emla antí bomkai.

⁴⁸ Idokom bulu dekepe ipeko bedang katomang, kapeila ami kídíe bíkke agom kídarem erappe tatto.