LUKKE ATNAM TATPONA DOOYINGE 18 - DEENA BAIBÉL (BSI)

Meyéng Kolang Bisarna Amikolo Luyiisuname

¹ Delokrongem bulu agínpe duuyardope emla Jisubí luyii sunam agomko poyilto.

² Bí pokai, “Taon kolo Shédímete pesomana delokke amikídiemte míngge mana bisarna amiko kato.

³ Delo taon delo meyéng koteng bíkkíng aala, ‘Ngokke miruem jonnamlok luyin bilai,’ emnako kato.

⁴ Lekon lesagem bím luyasuto. Idakkom méélamdem bí agísue míísuto, ‘Ngo Shédíme pesomadokom delokke tanikídíem míngge madokom delokke,

⁵ si meyéng si ngom potí bomdung, bí jonnam bedangem paadokupe ngo kangkíyé, demílomin bí ngom ebínpe aatí bomyi mayéne!’ ”

⁶ Delokrongem Ruutum bí poto, “Jonnampe bisar imana ami delokke ponamem tatgaptola.

⁷ Delokke Shédíkíng longe yohpe kapguna kídíem bí bíkkelo ullennam amikídí legape jonnam agérem gérbi mayénía? Bí bulum mepak yélanga?

⁸ Nolum ngo podung, bí buluke jonnam agérem menape kaabiyé. Depe idokom Tanike Ue pííyém, bí tani amoso míngkengem paayékudí?”

Pharisi Kídí Lolang Kajanang Ulna Kídílo Luyiisuname

⁹ Agíem deenampe míísuna delokke ami takamem atí míngge mana ami ayokon legape Jisu bí sim luyiisunam agomsim pobito.

¹⁰ “Midum annyiko kumkeng ekumlo gíla kumto, akonde Pharisiko akonde kajanang ulnako.”

¹¹ Pharisi de dakdola agíe kumsuto, “Shédí, ngo abíd ami kísape pyoola dola, atímana agér ila, abír ajon ila demangkom sok kajanang ulna ami sok kísapete imang iname ngo nom yidgedung.

¹² Ngo hoptalo lennyiko domape nyodung delokke ngokke paanam lokke dohombag takamem bidung.”

¹³ Idakkom kajanang ulnade mootepe dakdola kumto. Bí taleng pete kaadu sumang, idola agí duuk ankíem agí angkengem kítsudola kumkai, “Shédía, paabna ami ngom ayatoyika.”

¹⁴ Nolum ngo podung, “Akonem emmape si ami si Shédíke keralo arona amipe ilangala ekumpe enkaku. Kapeila agísuem bottepe míísuna mipildem mogípyé, delokke agíem améngope míísuna miyongem bottemoyé.”

Koo Aména Kídíem Jisuke Lubéélíkname

¹⁵ Ami kídíe ojing kídíem ukkí bidope emla Jisukíng bomato. Luyilsuna kídíe dem kaayédem bulum luyato.

¹⁶ Idola Jisu bí koo aména kídíem gokpala poto, “Koo aména kídíem ngokkíng aamotoka, bulum lutum mapeka, kapeila Shédíke amode sikena kookídar lomin kadune.

¹⁷ Nolum ngo aruem pobidung, sékodí Shédíke amongem koo aména sok kísape torík sumayédí bí edílokom delo aalamang.”

Mirem Amiko

¹⁸ Jihudi ruutumkone bím íngkíto, “Aina saare, ngo turyarna yénamem paadope ingkoko iperung aidon?”

¹⁹ “No kapeila ngom aine emkane?” emla Jisu bí poyansuto. “Shédíke kékonlo aina kamang.

²⁰ No ngiitom kídíem kénsudung; ‘Abír imapeka, ami petmapeka, doppyo mapeka, menam hakii bimapeka, nokke ane abuem míngge langka.’ ”

²¹ “Dem takam ngo ko lokkekai igedung” emla bí pokai.

²² Jisu bí dem tayyédem, amidem poto, “No supakkom atelko pííramdung. Nokke bomnam takamem kogeyéla opan kídíem bitola, delomin teyong amotelo nokke kumsunge edííyéne. Delokrongem aatola, ngokkíng gímín getola.”

²³ Amide dem tayyéname, buulínge ikai, kapeila bí sérang kana rungkuai.

²⁴ Jisu bí bím kaasudola poto, “Shédíke amolo aanamde mirem ami kepe bomram runame!

²⁵ Aropaklok poyém, mirem amie Shédíke amolo aapemílo, uut simone pesi arulok péssuk namde ipoyaname.”

²⁶ Dem tatna kídíe íngkíto, “Sékoi demílo turlayékune?”

²⁷ Jisu bí poyansuto, “Tanike ila manamde Shédíke iponame.”

²⁸ Pitor bí bím poto, “Ngolu nokkíng gímín gekolok takamem mepaksuto!”

²⁹ Jisu bí bulum pokai, “Ngo nolum arope podung, agíke ekumem, demangkom méngem demangkom bíro kídíem demangkom ane abuem demangkom ome-uem Shédíke yéta legape mepaksuna mipilde

³⁰ siyum siroke yérumso delokke yépenam lokom turyarnam yénamem paaram mayé.”

Agíke Sipenamem Jisuke Lengumnape Pobisuname

³¹ Jisu bí midum íying kolang annyiem langu supala bulum poto, “Ngolu Jirusalemlo gídak, delokke Tanike Uem kaaluna miri kídíke atnam legangem aromoyé.

³² Bím mipak kídílo melíkyé.

³³ Bulu bím ipusilééla lupu luééla, takil sukkatla, demla delokke petyé, longum nanalo bí gerepyéku.”

³⁴ Luyilsuna kídíde dem atíkote tatkén tomang. Sokke ortode bulu kelokke kénpí mangkolo dungai, delokke bí ingko legangem podungadí bulu kénpí tomang.

Magoona Mingmana Amikonem Jisuke Ipíkuname

³⁵ Jisu bí Jerikolo píínín yékudelo, mingmana amikone bedang agéplo duudola kogoo dungai.

³⁶ Bí miti maklínge gídakpe tayyédem, kape idunai emla íngkíto.

³⁷ Bulu bím “Najareth lokke Jisu bí gídak” emla pobito.

³⁸ “Dabidke Oo, Jisu, ngom yaasam toyika” emla gokto.

³⁹ Bedalo gígena kídíe bím “Asoope duulangka” emla lutumkíto, idakkom bí botte yape gokai, “Dabidke Ue, ngom yaasam toyika!”

⁴⁰ Jisu bí dakpodola amidem bíkkíng aabodope políkto. Amide aanín yédem Jisu bí bím tatkíto,

⁴¹ “Ngom no nokke legape ingkoko imope míídune?” “Ruutume, ngo kaapadomílo emla míídung” emla bí poto.

⁴² Jisu bí bím poto, “Nokke amige migdar langka; nokke míngkenge nom ipí sutoku.”

⁴³ Menang asak bíkke amige kaalangkula Jisukíng gímín gela Shédíme yidgeto. Ami takame dem kaayédem, bulute Shédíme koyitto.