LUKKE ATNAM TATPONA DOOYINGE 13 - DEENA BAIBÉL (BSI)

Noluke Paablokke Míílat Sulangkuka Demamílo Siyé

¹ Dekepe idodelo, ayokone dakla, Galil amikídí lokke Shédíme aman bila kumsu dungem, Pilatke bulum petla kumko jongko delo buluke iyyiem soyél sulík namem Jisume pokanto.

² Jisu bí poyansuto, “Buluke sikepe anngéé sukolok si Galil ami kídísi abíd takam Galil ami kídíem paab geyane emla nolu míídunía?

³ Ngo nolum podung, demang! Nolu míílat suku mamílo, nolu takamkom nyokyé.

⁴ Demangkom Silomlo duuna ekum gaange bénkanam midum íying kolang píínyide Jirusalemlo duuna abíd takam empemílo deemayane emla nolu míídonía?

⁵ Nolum ngo podung, demang! Idakkom nolu míílat sumadem, nolu takamkom nyokyé.”

Ayé Éémana Tapang Anekolo Luyiisuname

⁶ Delokrongem sim bí luyiisunam agom sim poto, “Amikone tapang aneko bíkke aríklo katuai, delo ayédem kaape emla gíto, idokom atíyang paamang.

⁷ Depe iname, bí arík kaabomna amidem pokai, ‘Tagum kokai ngo sim tapang ane sim ayé éémadí emla kaape gítí bomto idola atíyang paamang. Sim beepak toka! Emmumpe si kédengem dungee bomdung.’

⁸ Amide poyansuto, ‘Saare, dítag konko sim mekí potoka delo ngo sim konggoola haar bikípe.

⁹ Delo dítagkon delo si ayé éébiyémílo ainame! Éébi mamílo, beepak langka!’ ”

Ínggírna Mimekonem Jisuke Sabbath Longelo Ipíkuname

¹⁰ Sabbath longelo Jisu bí kumkeng ekumkolo ngiitom poyilbola dungai,

¹¹ delo mime aneko tagying kolang dítag píínyi kokai deemana aide dobét kolok tunggírla duuto. Bí tunggírla geejon kényimape ito.

¹² Jisu bí mimedem kaala tomnín supala bím poto, “Mime, nokke deemangem mepak bitoku.”

¹³ Delokrongem bí agí alage bíkkíng leetanto, delo menang asak geejon langkula Shédíme yidgeto.

¹⁴ Sabbath longelo Jisuke ipíkunamem kangkipe kaala, kumkeng ekum ruutumde ami kídíem poto, “Agér idíe longkéko kadung. Sabbath longelo imape delo longe kídí delo aala ipí pename.”

¹⁵ Ruutum bí poto, “Nolu aromana kídía! Nolu mipile Sabbath longelo agíke gooruem demangkom gaduem guallok taalenla írbín bíntí manía?

¹⁶ Demílo sim mime sim, Soitane dítag íying kolang píínyi kokai yééla menam Abrahamke ome sim yééna lokke taalen kuma yénía?”

¹⁷ Bí dem poname, bím akna kídíe míngkirunge ito, idokom ami kídíe bíkke irisinyo inam takamem airupe mííto.

Petu Amílo Luyiisuname

¹⁸ Delokrongem Jisu bí íngkíto, “Shédíke amode kape kísa idun? Ingkoloi ngo sim luyii supene?

¹⁹ Si amie agí baganlo kuunam tulang amí kísadung. Si siirepla minekai delo pettange sokke aaglo asup suplíkla ikai.”

Siiyélo Luyiisuname

²⁰ Lekoda bí tatkíto, “Ingkoloi ngo Shédíke amongem luyii supene?

²¹ De siiyé kísadung; mimekone aala bortonkolo bíísét dope monam ennoklo soyél sulíkla, duamang tetengem pokomla menam kísadung.”

Tapétna Lamgéye

²² Delokrongem Jisu bí taon taonlo delokke doolung doolunglo gígoola. bíkke Jirusalem danpe endagem luyilgooto.

²³ Ayokone bím tatkíto, “Ruutume, turku pena ami kídíde anyongo kua?” Bí bulum poto,

²⁴ “Tapétna eyabdelok aape emla rallangka, kapeila ngo nolum podung, deddína amie aape emla ralkíyé idokom depe ilamayé.

²⁵ Ekum atode leko gerepla eyabem sittum rodem, nolu luyulo dakla pigala delokke ‘Saare ngolum eyabem siyyabi’ emla rogula itíyé. Idakkom bí poyansuyé, ‘Ngo nolum kénmang delokke ingkolok nolu aadudí ngo kénmang.’

²⁶ Delo nolu poyé, ‘Ngolu nom dobo tííbosuto, delokke no ngolum ngoluke bedu bedalo luyil poyiltuai.’

²⁷ Idokom bí poyansuyé, ‘Ngo nolum kénmang delokke ingkolok nolu aadudí kénmang. Ngokke lokke gítolangku, nolu atímana agér inakídí nolu!’

²⁸ Nolu Abraham, Isaak, Jakob melang Shédíke amolo kaaluna miri kídí takamem duudope kaasuyém, delo nolu kapla rííla, iipange koteksula iyé idokom nolu agíem yoppak kosuyé.

²⁹ Ami kídíe sanggo loklang delokke sokko danlok aadumsula Shédíke amolo doman aran dobosuyé.

³⁰ Arope luyém kerana kídíe méélam yéku, delokke méélamna kídíe kerayéku.”

Jisuke Jirusalemem Ankíname

³¹ Depe iduem Pharisi kídíeke ayoko Jisukíng aala bím poto, “Sim among sim mepakla regokonlo gígéétoku, Herod bí nom petpe idung.”

³² Bí poyansuto, “Dem mensurung dem gíla potoka, ‘Ngo uyu kídíem monpak yéku delokke ami kídíem silo nyampo ipíyéku, delokke longum nanalo ngokke píípekolo pííyé.’

³³ Depe epe idakkom, ngo silo, nyampo delokke réé gíperung aiyé, kapeila berokpe kaaluna mirie sékokom Jirusalem luyulo silímang.

³⁴ “Jirusalem, Jirusalem, nolu kaaluna miri kídíem delokke nolukíng melíknam kídíem petna nolum, rongne agí labbílo roguem gubbomnam akampe, edítko noluke ome-uem gubbodope emla ankí kítídune, ilate nolu tatmang!

³⁵ Kaasutola, noluke ekumem arape nolum melíkdung. Ngo nolum podung, ‘Ruutumke amínlok aanade gérne,’ emla nolu emkumang tetengem nolu ngom kaapang kumayé.”