LUKKE ATNAM TATPONA DOOYINGE 1 - DEENA BAIBÉL (BSI)

¹ Ayanam Theopil, deddína amie ngoluke gooraso arokuna atíkídí isabem atpe emla ralkítung.

² Agom pobina kídí elang delokke kerape agí amiglok kaasuna kídílok bulu ingkuem pobitudí dem bulu attung.

³ Delok legape, Mite Migoma, kapeila ngokke kera lokkekai si atí takam si aipakpe poriname, nokkepe kampope ripodem aipakpe atbi domílo aiyé emla ngo mííto.

⁴ Ngokke sikepe inamsi nom luyiltonam atí takam aruem apíípe no kéndope emla idung.

Baptist Joanke Aapenamem Pokanname

⁵ Judialokke roja Herodke yédudelo Jekariah emnam miriko kato. Bí Abijahke miri adong lokke; bíkke méng Elijabeth bí Aaronke otínge.

⁶ Annyide Shédíkelo yéji nekíai, bulu Ruutumke ngiitom delokke ayon takamem lupenam kamape míngge igeto.

⁷ Idakkom bulu ome-oo kamangai, kapeila Elijabeth negenpe yéto; delokke bínyi mijing eejo kaabong.

⁸ Longe konem Jekariahke agér idíe pííla, Shédíke keralo bíkke miripe agér iduem,

⁹ mirikídar lokke iyang iyape gíngkísula ikolok, Ruutumke kumkeng ekumlo bíkke pakyak nyotdíe pííto.

¹⁰ Delokke pakyak romdíe píído delo, kumsupena takame luyulo kumla duuto.

¹¹ Delokrongem Ruutumke Teyong kotoki kone pakyak meru nyotpom lokke lakbík danlo dagala bím lengkansuto.

¹² Jekariah bí bím kaayédem, bí pesola dan-geto,

¹³ Idola Teyong kotokide pokai, “Jekariah, no pesomapeka, nokke kumnamem tattobong. Nokke méng Elijabeth bí ooko oyé, delo no Joan emla amínem mínlangka.

¹⁴ Bí nokke ashéng shéngkepe delokke mííyum sukepe iyé, delokke amikídíe bím ogalok bojérungko ashéyé.

¹⁵ Kapeila Ruutumke kangkolo bí bottena amipe iyé. Bí onggur alang emlang siiyé líknam apongem tíímayé, delokke Deena Aide bím olen delokkekai duubomyé.

¹⁶ Bí Israel amiem bojéko buluke Ruutum Shédíkíng langaayéku.

¹⁷ Delokrongem bí Kaaluna miri Elijahke ralnam delokke pauar kana aapíem gela, Ruutumke keralo gígeboyé. Bí abukídí emlang ome-oo kídíem goodum suyéku; bí tatmana amikídíem leemo sudope iyé.”

¹⁸ Jekariah bí Teyong kotokidem íngkíto, “Ngo kape kísa dem berokpe kénsuyéne? Ngo mijingkai delokke ngokke méngete eejokai.”

¹⁹ Teyong kotokide pobito, “Ngo Gabriel. Ngo Shédíke keralo dakdung, delokke nom luposudope delokke nom sim aina kobor sim lukan bidope emla ngom melíktung.

²⁰ Delokke supak ngokke ponam kídísi píímang tetengem no agom pokénmape gommala duupoyé kapeila moodí aropaklo píípena ngokke agomem no arope míímato.”

²¹ Depe iduem, luyulo Jekariahme toyana amikídíde kapeilai bí kumkeng ekum delo deddí pekai adol líkkane emla mííto.

²² Luyulo bí lendokuem, bí bulum agom pobo sukén yimang. Bulu bí kumkeng ekum delo kaarí kaanyonam atíko kaatonape emla míngkai, kapeila bí agom pobolai mape, ruuyil petomlok bulum ibosuto.

²³ Bíkke agérem iyinrodem bí ekumlo entoku.

²⁴ Delokrongem bíkke méng Elijabeth bí akiilo ooko gekai, delo poolo pilngoko rusisula yéto.

²⁵ “Ruutummin ngom sikepe ibitune”, bí emto, “So longe kídarso bí ngom ayato delokke ngokke amikídí gooralo annyingem laabín bitoku.”

Jisume Openamem Poruuname

²⁶ Poolo akkéko doorongem, Shédí bí teyong kotoki Gabrielme Galil lokke Najareth emnam taonkolo melíkto.

²⁷ Dabidke odolok lenna Josephkíng tatbinam Mari emnam mimekolo bí pobi penamko kato.

²⁸ Teyong kotokide mimedelo gíla poto, “Airuna ayangem paana mime no, míípo langka! Ruutum bí nokkíng dung.”

²⁹ Bíkke agom sim tatla Mari bí míngkén mííyén yimang ikai delokke si agom si ingkuedí emla míísuto.

³⁰ Idakkom Teyong kotokide bím poto, “Mari, no pesomapeka, Shédí kelok airuna ayangem no paato.

³¹ No koo gela ooko oyé, delokke no bíkke amínem Jisu emlangka.

³² Bí tumilonmona amipe iyé delokke bím kedon yalumna Shédíke Ue emyé. Ruutum Shédí bí bíkke abu Dabidke dungkengem bím biyé.

³³ Delo bí Jakobke opín teyolo ruutumpe iyarbomyé; bíkke amode edílote nyokyimayé.”

³⁴ “Ngo mílípe dungada, kapeila dekepe iyéne?” emla Mari bí poyan suto.

³⁵ Teyong kotokide poyansuto, “Deena Aide nokkíng aayé, delokke kedon yalumna Shédíke ralname nom duubomyé. Sok legape dem openam deena koodem Shédíke Ue emyé.

³⁶ Nokke erang Elijabeth bíteng eejodola kooko oyé. Bíkke ko geronge poolo akkéko ikabong.

³⁷ Depe ila Shédíke iramnam atí kamang.”

³⁸ Mari bí poyansuto, “Ngo Ruutumke béérange, ngokkíng nokke pokampe idaklangka.” Delokrongem Teyong kotokide gíkaku.

Elijabethme Marike Kangaaname

³⁹ Dekepe irongem Mari bí oolkote doomape leemosula menape Judialokke etpang teyolo duuna doolung kolo gíla,

⁴⁰ Jekariahke ekumlo aala Elijabethme ashépe kaaríksuto.

⁴¹ Edílo Elijabeth bí Marike ashéng lupuem tattodí, delo akiidelo koo genamde belengkai, delokke delo Elijabethme Deena Aide duulup bomkai.

⁴² Bí bottepe ngasala poto, “Mime aralokke no gérne, delokke nokke koo openam dete gérne!

⁴³ Idokom ngok Ruutumke ane ngom, kangaanam gérnamsi ingkolokyi ikane?

⁴⁴ Kapeila nokke ashéng lupo agom adude ngokke nyorulo pííyéname, ngok akii sokke kue ashéla belengkai.

⁴⁵ Ruutumke poname aroyé emla arope míína mime no gérne.”

Marike Shédíme Yidgenam Mirie

⁴⁶ Delo Mari bí poyansuto: “Ruutumme ngokke aapíe yidgedung.

⁴⁷ Ngom mopítna Shédíkíng ngokke aide ashédung,

⁴⁸ kapeila bí bíkke arééna béérangem míípang subito. Supak lokke ila tani siirum siirume ngom gérne emyé.

⁴⁹ Kapeila ralna Shédí bí ngom bottena atíko bito. Bíkke amínde deene;

⁵⁰ bíkke ayangde bím pesona takamlo siirum siirumlope kadung.

⁵¹ Bí bíkke lakbíklok tolnam agérem ito; agí aapí aralo adum ale míína kídíem nyokpan sumoto.

⁵² Bí mite migom kídíem buluke dungkelok laayitoku, idokom amépe míísuna kídíem gerep moto.

⁵³ Bí keno tíílínge inem aina atíem bito, idakkom miremnem kenodope megéétoku.

⁵⁴ Bí bíkke Israel béérangem igulla, míípa sulangkula

⁵⁵ ngoluke abukídílo bíkke pébisunam kísape Abraham melang delokke buluke otíng oyin kídíem agínpe yaasamto.”

⁵⁶ Mari bí poolo angumko Elijabethkíng duubosula ipala ekumlo entoku.

Baptist Joanme Oname

⁵⁷ Delokrongem Elijabethke koo odíe pííla bí ooko oto.

⁵⁸ Bíkke repe sinying kídí elang erang kídíe Ruutumke bím botteruna ayangem lengkan binamem talla bím bulu ashébosuto.

⁵⁹ Koo delokke longe píínyi nanalo bím dínbíílo iyod líkdíe pííla, idola bulu bíkke amínem Jekariah emla abu amínpe mínpe emla buluke idungem,

⁶⁰ bíkke anede, “Ma, bíkke amínem Joan emla míndope potung” emla poto.

⁶¹ Delo bulu bím, “Nokke opín aralo sikepe amín gena atelkote kamang,” emto.

⁶² Delokrongem bulu ingkona amínkodí mínpene emla ruuyilla íngkíto.

⁶³ Delo Jekariah bí atkeng alopko kola, “Bíkke amíne Joan” emla atbito.

⁶⁴ Dekepe irong pakdem bíkke yokane beleng langkula, ayue polen langkula Shédíme yidge lentoku.

⁶⁵ Dekedem kaapala buluke repe sinying kídíe pesue ito, delokke Judialokke etpang doolung tabung ami kídíe poge lugekai.

⁶⁶ Dem tatna mipíde sai emdola, “Demílo ingkona koope ipenakoi de?” emla agí agísulo íngkísuto, kapeila Ruutumke ralname bíkkíng duumín geto.

Jekariahke Polupoornam Mirie

⁶⁷ Bíkke abu Jekariah bí Deena Aide duulup bomname kaalu kangor agomem pokai:

⁶⁸ “Israelke Shédí ruutumme yidge langka, kapeila bí agíke ami kídílo aala repíttoku.

⁶⁹ Bí bíkke béérang Dabidke odolok, ngoluke legape turmonako gerepmoto.

⁷⁰ Sim bí kerapekai bíkke deena kaaluna miri kídarlok pokansuto.

⁷¹ Bí mirulokke ngolum mopítpene, ngolum kangkina ralna kídílokke iturpene.

⁷² Bí ngoluke buku kídíem yaasamem lengkanla, delokke bíkke deena daapongem míípang sumotoku.

⁷³ Bí ngoluke abu buku Abrahamke keralo pésula;

⁷⁴ ngoluke miru keralok ngolum mosing langkula, delokke bím kumsukolo ngolu peso atí kamadope;

⁷⁵ ngoluke yéname bíkke keralo deenampe yédope emla pébisuto.

⁷⁶ Delokke nom koo nom kedon yalumna Kaaluna miri emyé; kapeila no Ruutumke keralo gígela bíkke bedangem mogebiyé,

⁷⁷ buluke paab kídarem maab bila bíkke amikídíem turku nana gyanem bidope,

⁷⁸ ngoluke Shédíke aapíe remak bikolok doonyi arsange teyo telok ngoluke teyolo saabomyé.

⁷⁹ Kaamo ruruklo duuna kídílo delokke gíímangko dungkolo angun dokupe ngoluke ale bedangem yépoko bedalo gíbonape iyé.”

⁸⁰ Delokrongem koode siisala aidlok ralkai; delokke bí Israel opín keralo lengkan sudí longe loope moonamlo yéto.