LEBITIKA 5 - DEENA BAIBÉL (BSI)

Paab Aman Bipekue

¹ “Paab amanem bipe kode sikesi: Amikone bíkke kaanam demangkom tatnam atoem kebang keralo hakii bidope tomlate bí pomayé mílo bí imemkai.

² “Amikone deemana monkír lokke simangem, demangkom ekum gíída lokke taro simangem demangkom deemana eggoona ato simangem ukpala ponsumayémílo, bí deemangkai delokke imemkai.

³ “Amikone atí kénmape tani lok lenna ingkona deemang amona dakkom, ukkírongem, bíkke kénrong kudem bí imemkai.

⁴ “Amikone pupu-mumupe, ailai aimalai, ingkona ato lokkom pésula irongem bíkke kényékuem bí imemkai.

⁵ “Edílo amikone imemkadí, bí paab imemem ponkan supe aiyé.

⁶ Bíkke ajéng legape Ruutum kelo bí bénne mamílo mérneko amanpe bomape aido, delo miride ami delokke paab aman ipagem ibiyé.

⁷ “Amikone mérem demangkom sobénem bilamayémílo delok ayanpe pekí annyiko, demamílo perong annyiko bíkke paabem dorkunana pelang romnam amanpe Ruutum ke keralo bomalangka.

⁸ Bí kerape mirilo dekedem bomape aido. Deme miride paab aman ipakpe iyé. Bí dumpong eme ettungmape alíng delok pettang deme etsulpe aido.

⁹ Depe ipala delokke iyyiem runggu lokke abe kídílo píkjépe aido delokke abíd iyyiem runggu leríng delo nyumjin lenpe aido. Si paabem langkutnana ipak inam amane.

¹⁰ Delokrongem bí pettangkon dem ipak ayonpe romnam amanpe ilíkpe aido. Sikepe ami delokke paab legape miride amanem ipak ibipe aido, depe imílo bím mesam biyé.

¹¹ “Amikone pekí annyi demangkom perong annyiem bila mayémílo, bí kilogram atelko ettínglok paab aman legape bomape aido. Bí delo olib tél demangkom nampona atíem delo ilíkpe aimang, kapeila de ali-ayé amanmang, idola paab amane.

¹² Bí deme miri keralo bomayé. Delokke bíkke míípang sugenam legape delok lakyumko miride laala eme lok romnam ato kídí teyong delo lekope Ruutum kelo romtak sulíkbiyé. Kapeila de paabem laabín dope binam amane.

¹³ Sikepe ami delokke legape miride amanem ipakpe ibila bíkke paabem mesam biyé. Ali-ayé aman kísape delok abíd ettíng de miri kepe iyé.”

Imem Amane

¹⁴ Ruutum bí Mosime poto:

¹⁵ “Amikone atí kénsumape Ruutum ke deena ato sirolo paab iyémílo, bí delokke ajéngpe atí tarí-tape kamana mér mamílo bénboko dorkunam amanpe Ruutum kelo bomape aido. Delokke areme kebang tolíknam adupe ipe aido.

¹⁶ Bí bilangka emnam ajéng dem dorperung aiyé, delokke sok teyolo adu pilngoke adukonem dortem dola mirilo bipe aido. Delo miride ami delokke paab legape ipak amanem ibila ipe aido, delo bím mesam biyé.

¹⁷ “Amikone atí kénsumape Ruutum ke poyil lulígem imayémílo, bí imemkai, delokke bí ajéng dem dorkupe aiyé.

¹⁸ Bík ajéng dorna kunana amanpe atí tarí- tape kamana mér mamílo bénboko mirilo boma bipe aido. Delokke areem kebang tolíknam adupe ipe aido. Ami delokke imem kootírpe inam paab legape miride ipak ibipe aiyé, delo ami dem mesambiyé.

¹⁹ Si bíkke paab imem legape Ruutum kelo ajéng dorkunam ipak amanem ibikuname.”