LEBITIKA 4 - DEENA BAIBÉL (BSI)

Paab Legape Amane

¹ Ruutum bí Mosime poto,

² “Israel kídíem sikepe polangka: Sékodí iperung mííla imape, Ruutum ke lutumnam akonem betla paab iyédí, bí sim ayon kídí sim igepe aiyé.

³ “Kumlíkla pídélíknam mirikone paab ila, ami kídílo imem boyémílo, bíkke paab imem legape tarí-tape atí kamana rupangko Ruutum ke keralo amanpe bomalangka.

⁴ Bí rupang dem Ruutum ke dungko Tombu delokke lamgé delo bomala delokke tukku delo alage gagdola Ruutum ke keralo pakape aiyé.

⁵ Delok rongem pídénam miride rupang delokke iyyi ayokonem bomla, Ruutumke Tombu arang delo bomala,

⁶ agí lakkéngem iyyi delo íknyom geyéla deena porda keradelo, iyyi delok lemkíníd kokai píkjépe aiyé.

⁷ Depe irodem bí Ruutum ke Tombu arang delokke nampona romtíko runggu lokke kéényung tuubu kídílo iyyi ayokonem melík langka delokke abíd iyyi kídíem Ruutum ke Tombu lamgélo duuna romlíkko runggu lerílo purgo líklangka.

⁸ Bíkke paab aman rupang delokke amíl arang lokke una tabungem,

⁹ katpí annyiemlang dem dunggo bomna ugíng anín lokke una kídíem delokke katpílo laatak supenam ayinem ilum bomna kídíem laalen langka.

¹⁰ Miride una kídídem laalenla, romko runggu delo, ashéng aman taro mokanam unem inam kísa romlík langka.

¹¹ Idola delokke asigem, adín kídíem, tukkuem, delokke ale-alag emla akii-asalem itaksula arang lokke abíd kídíem laala,

¹² dem tabudem notko luyuke metbu yoppom, deengko moolop delo esinglok eme parla romkut langka.

¹³ Ruutum ke poyil dola lutumnam akonem Israel opín tabunge atí kénsumape iperung emla mííla imatuakom, dekepe imem yémílo, bulu paab ikai.

¹⁴ Edílo bulu paabem kénsuyédí delo opín tabuupe rupangko paab amanpe bomape aiyé. Bulu deme Ruutum ke dungko Tombu delo bomala,

¹⁵ delokke tukku delo opín kídí lokke miro kídíe, bulu alage pida sudola delo pakape aiyé.

¹⁶ Delo miride rupang delokke iyyi ayokonem Ruutum ke Tombu delo bomala,

¹⁷ bíkke lakkénge iyyi delo íknyom geyéla, deena porda keradelo iyyi delok lemkíníd kokai píkjépe aiyé.

¹⁸ Depe irodem bí Ruutum ke Tombu arang delokke nampona romtíko runggu lokke kéényung tuubu kídílo iyyi ayokonem melík langka delokke abíd iyyi kídí dem Ruutum ke Tombu lamgélo duuna romlíkko runggu lerílo purgo líklangka.

¹⁹ Depe irongem bí una takamem laala runggu delo romyin líklangka.

²⁰ Kape kísadí bí paab aman delokke rupangem itodí deke kísape sim rupang simte ipe aido. Sike kísape ila bí ami kídíke paabem ipítyé, delokke buluke deemang-amoem mesam biyé.

²¹ Depe irodem bí agíke paabem ipaksudo delokke kísa rupang dem notko luyulo bomlen langkula rompakyé. Si moko opín tabungke paabem laabínnana aman ipage.

²² “Ruutum ke poyildola lutumnam akonem kebang mirokone kénsumape, iperung emla mííla imape imem yémílo bí paabkai.

²³ Edílo bí paabem kénsuyédí delo bí atí tarí-tape kamana bénboko amanpe bomape aiyé.

²⁴ Bí agí alagem bénbo delokke tukku delo pida sudola emelo rompak penam taro kídíem papom runggu lokke línggí danlo pakape aiyé. Si paabem ipak sunana amane.

²⁵ Delo miride bíkke lakkéng lok paab aman delokke iyyi delok ayoko laala romnam aman rungguke areng kídí delo ilíkla abídem runggu lokke lerílo purgope aido.

²⁶ Depe irongem ashéng aman lokke tarongem kape kísa mokapala, unem romdudí, deke kísape delokke una kídíem romyinpe aido. Sikepe miride kebang miroke paab legape amanem ipakpe aiyé, depe imílo bím mesam biyé.

²⁷ “Ruutum ke poyil dola lutumnam akonem, momem amikone atí kénsumape iperung emla mííla imape, imem yémílo bí paabkai.

²⁸ Edílo bí paabem kénsuyédí, bí atí tarí-tape kamana bénneko amanpe bomape aido.

²⁹ Bí agí alagem paab aman delokke tukkulo pida sudola, emelo rompak penam taro kídíem papom runggu lokke línggí danlo pakape aiyé.

³⁰ Delo miride bíkke lakkéng lok, runggu delokke kéényung tuubu kídílo iyyi ayokonem ilíkla abídem runggu lokke lerílo purgope aido.

³¹ Depe irodem ashéng aman lokke taro lokke unem ikutnam kísape bí, delokke una tabungem ikutla dekedem runggu delo romyinlíkpe aido. Depe imílo delokke aríe Ruutum me ashéng modung. Sikepe momem ami delokke paab legape miride amanem ipak ibipe aiyé, depe imílo bím mesam biyé.

³² “Amikone paab amanpe mérko bomayémílo, de tarí-tape atí kamana kope ipe aido.

³³ Bí agí alage delokke tukkulo pida sudola, emelo romlíknam taro kídíem papom runggu delokke línggídan delo pakape aido.

³⁴ Delo miride bíkke lakkéng lok paab aman delokke iyyi delok ayoko laala romnam aman runggu delokke kéényung kídílo iyyi ayokonem ilíkla abídem runggu lokke lerílo purgope aido.

³⁵ Depe irongem ashéng aman lokke taroem kape kísa mokapala unem laabínla romdudí, deke kísape una kídíem bí laabínla, Ruutum kíng eme lok aman romko delo lekope romtak sulíkpe aido. Sikepe miride amikon delokke paab legape amanem ipakpe aiyé, depe imílo bím mesam biyé.”