LEBITIKA 27 - DEENA BAIBÉL (BSI)

Ruutum Kíng Aman Bigang Ayon Kídíe

¹ Ruutum bí Mosi me poto,

² “Israel kídíem sipe polangka: Edílo gairupe pésunamem ipíng kolok amikonem Ruutum kelo tolíkyédí, dem amidem sikena abal kídí sok tolík are adupe biyan langkula ipít lenyéku. Si are kídar si kebangke tolíknam adupe iyé:

³ Dítak íying annyina lokke ila takying akkéna milokongem nogdi lok balying pilngoko biyan yéku.

⁴ De mimekope iyémílo, deme nogdi lok balying angumko biyan yéku.

⁵ De dítak takngo lokke ila takying annyilo píína yaaméko imílo, dem nogdi lok balying annyiko biyan yéku. De mimumkope iyé mílo, nogdi lok balyingko biyan yéku.

⁶ De poolo atel lokke ila takngona milokongko iyémílo deme nogdi lok balngoko delokke mimedem nogdi lok balumko biyan yéku.

⁷ Dítak takying akké ngatna abu-abíngem nogdi lok balying kola balngoko, delokke mime anepe iyémílo nogdi lok balyingko biyan yéku.

⁸ Pésuna amide kebangke tolíknam arepe bilamana opan nakomílo, amidem miri keralo aabo langka, delokke miride bíkke biduk-bitung akorpe areme rumkípe embilangka.

⁹ Bíkke pélík sunamde Ruutum ke keralo amanpe torík subanam taro kope iyémílo, de tarode deena atope ikai.

¹⁰ Pélík suna amide tarodem, aima mílo ainako, ainako iyémílo aimana kope ipéé-iré sumapeka. kapeila ipéé-irémílo annyi dekai deena atope iyé.

¹¹ Bíkke pélík sunam tarode Ruutum kelo torík supe manam, dormo ayon lok deemana taro kope iyémílo, deme mirilo lengkan langka.

¹² Miride deme aina kodí ma aimana kodí emla kebang lubiyé. Depe mirike are polík namde delokke arepe iyé.

¹³ Taro delokke atode deme repít lenkupe mííyémílo, bí are delokke adu pilngoko bitem langka.

¹⁴ Amikone agí ekumem deena ato kope Ruutum kelo tolík suyémílo, miride delokke ainam emlang aimanamem íngkí-bengkí langka. Depe bíkke irodem, bíkke are-ame lukorpe delokke arede iyé.

¹⁵ Tolíkna amikone agí ekum dem repít lenkupe mííyékumílo, bí are delokke adu pilngoko bitem langkuka, dekepe irodem ekumde bíkkepe isuyéku.

¹⁶ Ami akone bíkke edung erangke among alop konem Ruutum kelo tolík suyémílo, among delo ali-aam sidlíkyém edítna ali-aamko sidlíkdudí, delokke areme kilogram íying annyi aamlo nogdi balyingpe ilíkla saplík langka.

¹⁷ Jubli dítaklo bíkke amongdem tolík suyémílo, delok arede apíng alongyé.

¹⁸ Delokke Jubli méélamlo bí tolík suyémílo, miride angupe Jubli dítak loope edít kodí dítage duudung adadín, deke delokke areme saplenla, delokke areme amépe ilangka.

¹⁹ Amikone agíke arígem tolík supala repít lenkupe mííyémílo, bí are delokke adu pilngoko bitem kumílo aríkde bíkkepe isuyéku.

²⁰ Idola bí arík dem repít kumape, amikon kolo kolík goyémílo, bí dem edílote repít lenlang kumayé.

²¹ Depeila edílo aríkdem Jublilo ilen yékudí, de Ruutum kíng tolíknam deena ekurangpe ila delokke de miri kídarke ekuserang pe iyé.

²² “Amikone bíkke edung erang malokke arík konem rela Ruutum kíng tolík suyémílo,

²³ miride Jubli dítak loope kíbom dola delokke areme ilenyé. Delo amide Ruutum kelo deena ato kope, deme delo longepak delo, delok areme bipe aido.

²⁴ Jubli dítaklo ami delokke rekoke amongpe ilat suyéku.

²⁵ Are-ame tabungde kebangke tolíknam adupe iyinyé.

²⁶ “Taro lokke oge yalumnamde Ruutum kepe irodem, sékote deke dem Ruutum kelo tolík mapeka. Ogenam taro dem gooru dokom demangkom mér dokom tolík mapeka.

²⁷ Tarode deemana kope iyémílo, amide are delokke adu pilngoko bitem langkula relang kuka. Bí relat kumayémílo, deme tolíknam are lok kolangka.

²⁸ “Idola ami konke apíírupe Ruutum kíng; tani dokom, taro dokom, delokke edung erang among dokom, tolík sunam dem kola demangkom repít langkula ilamayé. Ingko ato-siro dokom apíírupe tolík namde Ruutum ke keralo deenarunge.

²⁹ Tani aralo, tani konem apíírupe tolíknam amipe irong dem repít lenlang kumang. Repít lenyé kumílo dekena amiem mokape aido.

³⁰ “Among lok lenna ali-aam lokke lang siipí-siiyéke íying sanpek de Ruutum ke. De Ruutum ke keralo deene.

³¹ Amikone íying sanpegem repít lenkupe emla mííyémílo, bí are delokke adu pilngoko bitem langka.

³² Kaabomnake banggén rumkílo gíkína gooru, mér delokke sobén kídí takamke íying sanpekde Ruutum ke keralo deene.

³³ Taro kídí delokke atode, aimanem ulngu sula aina kídí lok ayanpe ipéé-irésula imapeka. Dekepe bí akon ayanpe akonem ila ipéé-irésula iyémílo ipéésunam annyi pakde deena tarope ila, deme repít lenkan yimape iyé.”

³⁴ Sinai díítelo sim ngiitom lulígnam kídar sim, Israel ami kídí legape Mosi me Ruutum ke biname.