LEBITIKA 24 - DEENA BAIBÉL (BSI)

Séragemla Ettíngem Kanggange

¹ Ruutum bí Mosi me poto,

² “Israel kídíeme olib esinglok nyumlennam takot kamana télem bomadope lulíg langka. Bulu dekepe imílo séraklo eme nyotbu dope téle kayaryé.

³ Ruutum ke Tombu lokke Daapong Sonduk keralo duuna porda luyulo, Aaron bí sérak kídí deme yume lokke ila rohlope, kaasi- kaamola nyotyar bompe aido. Si siirum tabunglo iyar bompenam idonge.

⁴ Uun kootír lok monam dakkeng delokke sérak kídídem Ruutum ke keralo agínpe kaasi kaamo ayar bompe aido.

⁵ “Kilogram íying kolang annyi ettíngko laala, goona ettíngpe íying kolang annyi pimpuko molangka.

⁶ Ettíng pimpu dem akké asak ila, ayon annyi kope mela Ruutum ke keralo uun kootír lok pílumnam tébul teyong delo leelangka.

⁷ Ayon annyi delo, goona ettíng kídí lo lekope deenamrupe ilennam nampona atolok, míípang sunana tarongpe, Ruutum ke keralo romlíknam amanpe idope melík langka.

⁸ Israel kídí tabungke ayanpe, iyar bomnam ayon idongpe, sim ettíng pimpu kídísim, Ruutum ke keralo Sabbath takamlo leeyar líklangka.

⁹ Si Aaron kelang bík oo kídílokke deena aloplo dopenam, deena tarong sue.”

Ruutum me Lupu-lulénaem Ajéng Iname

¹⁰ Méélam dem Israel mime ane lokke lang Ijipt abu lokke onam ami kone Israel goora delo gíala, Israel ami konem lumín suto.

¹¹ Depe lumín sudodem Ijipt abu kelang Israel ane lok onam ami de, Ruutum me bééla, lupu-luléto. Depeila bulu bíme Mosi kelo aaboto. (Ami delokke ane amíne Shelomith, bí Dan opín lokke Dibri ke ome.)

¹² Bulu bím, Ruutum ke míínam agomem tatpope emla pateklo tumpoto.

¹³ Depe irongem Ruutum bí Mosi me,

¹⁴ “Notko luyulo lupu-luléna ami dem gílenbola, bíkke agomem tatna tabude bík dumpolo alag kídíe leelíg geyéla daapongpe bím tabunge elíng lok gepet langka,” emla políkto.

¹⁵ Depe popala Ruutum bí potoku, “Séko amiedí Shédíme bééyéne, bí agíke paab ajéngem gesuyé.

¹⁶ Séko amiedí Ruutum ke amínem lupu-luléla iyéne, bím mokape aido. Agíke amisu dokom demangkom mibo-miying dokom, sékodí Ruutum ke amínem lupu-luléla iyéne, bím maglínge daapongpe elíng lok gekala simope aido.

¹⁷ Séko amie tani konke yénamem mokayédí, bím kom simope aido.

¹⁸ Séko amiedí akonke taroem ikayéne, bí dorkupe aido. Si turnakon adupe turna koneme iyan sukupenam idonge.

¹⁹ Séko ami konem tarí-tape iket yédí, bíkke itonam delokke kísa bímkom iyan sulangka.

²⁰ Along dírnam ayanpe alongem, amig ayanpe amigem, iipang ayanpe iipangem; kape kísa bí tarí-tape kadope itodí, dekepe bímkom tarí-tape kadope iyan supe aido.

²¹ Íngko amiedí taro atíko mokayéne, bí ajéng dorpe aiyé, idola íngko amiedí tani terengko mokayéne, bímkom mokape aido.

²² Israelke agí ami sutuakom, demangkom mibo-miying dokom, nolu sim ayon atel sim bombo supe aiyé. Ngomino Ruutum noluke Shédí bí.”

²³ Delo Mosi bí agom kídí sim Israel kídíem popala, bulu lupu-luléna ami dem notko luyulo gíbola, bím elíng lok gepetto. Ruutum ke Mosi me lulíknampe Israel kídíe ito.