LEBITIKA 23 - DEENA BAIBÉL (BSI)

Doman Adeng-ape Kídíe

¹ Ruutum bí Mosi me poto,

² “Israel kídíem sipe polangka. Sikesi Ruutum ke tolíknam doman kídíe. Ngokke elíknam doman kídí sim, nolu deena gídume emla moodílo gogyi bosu langka:

Sabbath Longe

³ “Longkéko nolu agér ilangka, idola longe kíníd nana longe de kumsudope gídum sula apéédí longe. Nolu íngkona regolo yédakkom agér atí imapeka. Si Ruutum ke Sabbath longe.

Gíbong Adeng-apelang Siiyé Líkmanam Ettínge

⁴ “Moodílo, noluke kumsupe gídum suyém ami takamem pogodope Ruutum ke tolíknam domane:

⁵ Ruutum ke Gíbong adeng-apede kerang yalum poolo lokke looying kola loopinana longe lokke doonyi uanglo ilendung.

⁶ Delok poolo delokke looying kola longe pilngo nana longelo, Ruutum ke siiyé líkmanam domanem dolenyé. Longe kínídko siiyé líkmanam ettíngem dolangka.

⁷ Kerang longe delo kumsu kolo gídum sulangka, delo agér-anam imapeka.

⁸ Longe kínídko amanem emelok Ruutum kelo romlíkdope bomalangka. Delokke longe kíníd nana longe delo kumsudope gídum sula atí agér-anam imapeka.”

Len-gena Ali-ayé Amane

⁹ Ruutum bí Mosi me poto.

¹⁰ “Israel ami kídíeme sipe polangka: Nolum ngokke bipenam amonglo nolu píínga rongem, edílo nolu min-gena ali-ayéme gattí-gatgolen yédí, delo noluke gatnam lok akékko, mirilo bomala bilangka.

¹¹ Deme miride Ruutum ke keralo leesak líkla irodem, deme noluke ayanpe toríksuyé. Idola dekeme miride Sabbathke kékon longelo leesakyé.

¹² Íngkona longelo nolu leesak yédí, delo tarí-tape atí kamana dukrík píína mér kolang,

¹³ delo lekope olib tél hoyél sunam kilogram annyi kope ina ettíng lok, Ruutum kelo eme lok romnam amanpe romlíkpe aido. De nampona arípe Ruutum kelo idung. Sike so onggur alang lok litar atel kope amanpe romtak sulíkpe aido.

¹⁴ Nolu dekepe iduem aní apimem éépete demangkom raala demangkom ettípe nííla, Shédí kelo sim aman kídí sim bomyin aamang tetengem dona kamapeka. Nolu íngkona among regolo yégoodokom, si noluke siirum tabulo iyar gepenam idonge.”

Gatdí-idí Domane

¹⁵ “Sabbath longe kékon delokke noluke gatnam akégem leesak amanpe bomadí longe delokke ila, hopta kíníd apíngko sanlangka.

¹⁶ Sabbath longe kíníd kékonke longe delo looying pilngo nana longe delo, Ruutum kelo ali-ayé aní konpe gatkunam amanem,

¹⁷ nolu íngkona among regolo yégodokom, erang miyoode ettílok pimpu annyiko ila, pimpu miyoode siiyé hoyél sunam kilogram annyina ettíng kope ila, Ruutum ke keralo len gena ali-ayé leesak amanpe bomalangka.

¹⁸ Ettíng pimpu kídíso lekope atí tarí-tape kamana dukríklo píína méro kíníd kolang delokke ruboko delokke mér annyiko bitak sulangka. Bulume Ruutum kelo romnam amanpe bilangka, delokke teyong delo ali-ayé aman emlang tíínam amanem lekope bitem langka. Sok aman kídíke aríeme Ruutum bí airupe míídung.

¹⁹ Sok kékonlo paab amanpe bénboko delokke ashéng amanpe dugríklo píína méro annyiko bila ipak langka.

²⁰ Miride méro annyi demlang ali-ayé len gena lokke ettíng pimpu dem Ruutum ke keralo leesak líkla, leesak amanpe ilangka. Dekede miri legape Ruutum kelo binam deena amane.

²¹ Delo longe pak delo nolu kumsupe gídum sulangka, delokke agér-anam atí imapeka. Nolu íngkona among regolo yégodokom, si noluke siirum tabunglo iyar gepenam idonge.”

²² “Edílo nolu aríklo ali-ayé gatyédí, delo arík lokke kéényung kerengke ali-ayéem gatta gomapeka, delokke gatruk lokke gadaknamem gattakumapeka. Dekeme opan arééna kepelang mibo-miying kepe mebilangka. Ngomino Ruutum noluke Shédí bí.”

Bikul-Tapung Muddí Lokke Doman Adeng-apee

²³ Ruutum bí Mosi me poto,

²⁴ “Israel kídíem sipe polangka: Poolo kíníd lokke kerang yalum longe delo, nolu gairuna apéédí longe kope haglík langka. Delo bikul tapung mudla, gídumsula kumbo sulangka.

²⁵ Delo longe delo agér-anam atí imape amanem bomala eme lok Ruutum kelo romlíkla ilangka.”

Ipítdí Longe

²⁶ Ruutum bí Mosi me poto,

²⁷ “Poolo kíníd sokke looying nana longede ipíddí longe. So longe so nolu doma-tíímape nyola kumbo sulangka, delokke amanem bomala eme lok Ruutum kelo romlíkla ilangka.

²⁸ Ruutum noluke Shédíke keralo, noluke paab kídíem ipíddí longepe itoname, so longe so agér-anam atí imapeka.

²⁹ Sékodí so longe so nyomayéne, bím Shédíke ami konpe hanyimayé.

³⁰ So longe so agér-anam ina ami dem, ngo ami kídí aralok nyokmoyé.

³¹ Nolu agér-anam atí imapeka. Nolu íngkona among regolo yégodokom, si noluke siirum tabunglo iyar gepenam idonge.

³² Si longe si apéédi Sabbath longe. Poolo sokke longe konangke yume delok ila longekon delokke yume loope nolu Sabbath sim nyola igelangka.”

Ippo pola Doman Adeng-apee

³³ Ruutum bí Mosi me poto,

³⁴ “Israel ami kídíem sipe polangka, poolo kíníd nake looying kola longe pilngo nana longe delo, Ruutum kepe ippo pola doman adeng-ape ilenla, longe kíníd loope ilíkyé.

³⁵ Delokke kerangke longede gídumsula kumbosudíe, iname delo agér-anam atí imapeka.

³⁶ Longe kínídko aman kídíem Ruutum kelo romlíkla, longe píínyi nana longe delo gídumsula, kumbosula tabunge lekope aman kídíem eme lok Ruutum kelo romlík bosulangka. Si iyindí longepe ikolok daadie kumbosula agér-anam atí ibosumapeka.

³⁷ (Sikesi loodí mipíke ilík penam romnam aman, ali-ayé aman delokke tíínam aman kídíem ipakpe bipenam kídíe. Sike si noluke gídumsula kumbosula, aman kídíeme eme lok Ruutum kelo romlík bosula ibosupenam kídíe.

³⁸ Si adeng ape kídí si iyar bomnam Sabbath teyolo item líknam kídíe. Sike sokke aman kídí sikom noluke biyar sunam teyolo; pésunam kídíem apíng moko lolang, agí mínggo supe amanem Ruutum kelo bitemsunam kídíe.)

³⁹ Depeila poolo kíníd lokke looying kolang longe pilngo nana longe lok ilenla, noluke arík kídílok ali-aamem isi-sasirongem, longe kínídko Ruutum kelo adeng-apeme ilangka. Kerangke longe de apéédí longe, delokke longe píínyi nana longe dekom apéédíe.

⁴⁰ Kerang longe delo nolu esing kídílok gaiyalumna siipí-siiyém píldum sula, kéjur annem pala, anne bojéna esing aag kídíem pala delokke poplar esing lok bomala, Ruutum noluke Shédíke keralo ashéla,

⁴¹ longe kíníd kope Ruutum ke keralo gíídí-siipepe erap bosulangka. Si siirum tabunglo iyar gepenam duuyarpena idonge, delokke sim poolo kínídlo ibosulangka.

⁴² Ippo pola longe kínídko duulangka. Israel ami kídare ippolo duupe aido.

⁴³ Sikepe ige kolok, ngokke Israel ami kídíem Ijipt among lok laalen rongkuem, bulu ippo pola deke delo duuyinto emla, buluke oten ome-oo kídíe kényé. Ngomino Ruutum noluke Shédíbí.”

⁴⁴ Sikepe Israel tabungem Ruutum ke tolíknam gíídí-siipe kídíem Mosi bí pokan biyinto.