LEBITIKA 20 - DEENA BAIBÉL (BSI)

Agom Tatmana Lokke Ajénge

¹ Ruutum bí Mosi me poto,

² “Israel kídíem sipe polangka; Israel ami akone demangkom Israel aralo duuna mibo-miying kone, séko agíke ome-oo akonem, Molék uyu kíng amanpe biyédí, dem amidem simope aido. Opín kídíe deme elíng lok gekape aido.

³ Ngok mikmoe delokke mirolpe ila bík opín-odong keralok, ngo bím nyokmoyé. Kapeila Molék uyu kíng bík ome-oo akonem bila, ngok Deena Tombuem deema molang, ngokke deena amínem belum modung.

⁴ Edílo de amide bíkke ome-oo akonem Molék uyu kíng depe bidungem bíkke opín-odonge, deke deme kaapakpeela bím mokamape iyémílo,

⁵ ngo agísue amidem lang bíkke edung-erang delokke mirolpe ila, Molék uyu kíng deemang-amo ina kídí tabungem, agí amipe hanyimayé.

⁶ Séko amiedí urom tomnalo gíla, urom kídílo deemang ibosula bulukíng yémín geyédí, dekenem ngo agí amipe hanyimayé.

⁷ Ngo Ruutum noluke Shédíe, nolu agíem tosak sulíkla deelangka.

⁸ Ngokke poyil lulígem igap bomyar langka. Kapeila nolum deenape mengusuna Ruutum bí ngomino.

⁹ Séko amiedí agíke abuem demamílo agíke anem bééyédí, bím moka langka. Bí agíke abuem demangkom anem béngkolok, bík ajéngde agísulo kasukai.

¹⁰ “Séko amiedí akonke mime teyolo abír-ayo ila, agíke kumrí-donggong mimelo abír-ayo iyédí, dem ami demlang mime dem mokape aido.

¹¹ Séko amiedí agíke abuke mime konkolo deemang-amo ibosuyédí, dekena amide agí abuke mikmo-lepangem nyokmodung, dekepeila dem ami demlang mime dem mokape aido. Bínyike ajéde bínyike teyong sulo kasu tereyé.

¹² Séko amiedí agíke nyamenglo deemang-amo ibosu yédí, bínyim mokape aido, bínyike ségude ayonem ipatsudung, dekepeila bínyike ajéngde bínyike teyong sulo kasu tereyé.

¹³ Séko amie mimelo ketbo sunam kísa milokong terelo ketbosuyédí, bínyi belum runam agér ine; dekepeila bínyim mokape aido. Bínyike ajéngde bínyike teyong sulo kasu tereyé.

¹⁴ Séko anemla omem mimepe bompum suyédí, bí atírumane. Noluke aralo dekena atímane kamadope ami demla ane ome kumsudem emelo romkape aido.

¹⁵ Sékodí taro kolo deemang-amo ibosuyéne, bím mokape aido, delokke taro demte petpakpe aido.

¹⁶ Séko mimedí taro kolo deemang-amo ibosupe emla aayédí, delo mime demlang taro dem mokape aido. Annyi delokke ajéngde bínyikelo kasu tereyé.

¹⁷ “Sékodí agí bírmeme emnamde bík abu lokke demangkom ane lokke angu konlo ogonam omeme deemang-amo ibosuyédí, de edung erangem mikmo lepang kamomane. Dekena amiem agí amipe hanyimapeka. Legade bí agí bírmeko mikmo lepangem kamoyimadung. Bínyike ajéngde bínyike teyong sulo kasu tereyé.

¹⁸ Séko amie deemang-kodang ina mime kolo deemang-amo ibosuyédí, de amide mime bíkke deemang-kodangem lengkankai, delokke mime dete lengkansukai. Iname bínyime agí amipe hanyimapeka.

¹⁹ “Agíke ane mamílo abuke bírmelo deemang-amo ibosumapeka. Depe inamde agíke anín aloona edung erangke mikmo-lepangem kamoyimadung. Bínyike ajéngde bínyike teyolo kasu tereyé.

²⁰ Séko agíke akí lokke mimelo deemang-amo ibosuyédí, bí agíke akíem mikmo lepang kamoyimadung. Bínyike ajéngde bínyi kelo kasu tereyé delokke bínyi ome-oo kamape siyé.

²¹ Sékodí agíke bíro mimem méngpe bomyéne de deemana agére. Bí agí bíro mikmo-lepangem kamoyimadung. Bínyi ome-oo kabo sumayé.

²² Ngokke poyil-lulíg emlang ayon tabungem bomgapla igelangka. Depe imílo noluke yégape, ngo ingkona amonglo nolum gíbodudí, de among de nolum abatpe batpak sumayé.

²³ Noluke keraloge ngokke monpak penam ami kídí sokke ségu-siyangpe nolu yémín gemapeka. Kapeila bulu sikena belumnamem ila, ngo bulum míípakto.

²⁴ Idola ngo nolume, ‘Nolu yébom dokupe, gakíre lang ngullange biingko amongem, ngo nolume biyé,’ emla togesuto. Nolume opín tabulok angu rusupe langusuna, Ruutum noluke Shédíbí ngomoko.”

²⁵ “Dekepe ila noluke aralo deenem lang deemana taroem, deenem lang deemana pettangem airupe kaapan-ipan sulangka. Noluke legape ngokke, deemane emla ingusunam; amonglo eggoona tarodokom, pettang dokom delokke atí-atípe ina turna ato dokom, deke delok nolu agísueme deemang iket sulíkmapeka.

²⁶ Nolu ngokkepe deenape ilangka, kapeila Ruutum ngo deene, delokke nolum opín abíd kídílok, ngok agísu legape angurupe ingu sulenname.

²⁷ Noluke aralo sina ami kídíke aid kídíem íngkí-tatkína kídíem mokarupe aido. Bulum elílok geka langka. Buluke ajéngde bulu kelo kasu tereyé.”